“Lillian Nomo,” Fren, Maj 2023, 40–41.
Just Lillian
Lillian i no wantem se hemwan long Yang Woman.
Tedei hem i las dei blong Lillian long Praemeri. Lillian bae i misim ol narafala pikinini long Praemeri. I gat tri nomo long olgeta—tu yangfala gel mo smol brata blong hem, Michael.
“?Yu stap filim olsem wanem blong muv i go antap long Yang Woman?” Praemeri tija blong hem i talem.
“!Mi no save wet long taem blong go long klas wetem ol bigfala gel!” Lillian i talem.
“Mi glad se yu hapi,” tija blong hem i talem. “?Huia bakegen bae i stap long Yang Woman wetem yu?”
Lillian i tingting long ol bigfala pikinini insaed long wod blong hem. Summer mo Cova, tufala i jes finisim skul long kolej. Mo famli blong Melvina oli bin muvaot. Wet. Hemia i livim bian . . . Lillian nomo.
?Klas blong Yang Woman blong hem bae i olsem wanem nao? ?Tija nomo wetem hem? Hemia bae i had we—mo tufala stap tufala nomo. Blong stap tingting long hemia, i mekem Lillian i wari. Hem i mekem fes i nogud. Hem i no wantem se hemwan nomo long Yang Woman.
Long haf blong dei, Lillian i stap tingting se bae hemwan nomo wan yang woman. Long taem blong kaekae long naet, hem i stap muvum ol kaekae nomo raonraon long plet blong hem mo i no kakae. Hem i no rid klia taem, taem blong hem i rid long famli skripja stadi.
Mama i putum skripja blong hem daon. “?Wanem i rong?” hem i askem.
Lillian i pulum longfala win. “!Miwan nomo bae mi stap long Yang Woman!”
Mama i muv blong go sidaon long saed blong Lillian. Hem i haggem hem. “Hemia bae i no isi,” hem i talem. ?Wanem nao mifala save mekem blong helpem yu?
Lillian i tingting blong wan sot taem. “Ating bae yumi save prea blong wan narafala gel i muv i kam long wod. Mo, ating Papa i save givim wan blesing long mi.”
Papa i smael. “Olgeta aedia ia oli gud tumas.”
Famli oli nildaon blong prea. “Papa long Heven,” Lillian i statem, “Mi mi glad se mi stap muv i go long Yang Woman. Mi no wantem stap miwan, be sapos hemia i tingting blong Yu, be i oraet nomo. Plis helpem mi save wanem mi save mekem blong filim gud. Mo sapos Yu wantem blong givim insperesen long wan famli wetem wan gel we yia blong hem i semmak long mi blong oli muv i kam long wod bong mifala, hemia tu bae i gud tumas.
Afta long prea, papa i putum han blong hem long hed blong hem. “Mi blesem yu se bae yu filim pis long taem yu stap muv i go long Yang Woman,” hem i talem. “Papa long Heven bae i blesem yu taem yu askem help blong Hem.”
Lillian i bin filim pis. Hem i no sua yet long wanem hem i save mekem blong mekem se bae i kam moa isi blong stap muv i go long Yang Woman. Be hem i save se Papa long Heven bae i save helpem hem.
Long Sandei, Lillian i stap wari smosmol yet. Be hem i tingbaot pis we hem i bin filim afta long blesing we papa i givim long hem. Hem i save se bae hem i Oraet.
Long sakramen miting, bisop i anaonsem se, sista Barns bae i kam niufala presiden blong Yang Woman. Sista Barns i stanap taem oli singaotem nem blong hem. Lillian i no save gud hem tumas, be hem i luk olsem se hem i naes.
Mama i bin talem se taem we yia blong hem i semmak olsem blong Lillian, Yang Woman lida blong hem i kam wan long ol bes fren blong hem. !Ating Lillian mo sista Barns bae tufala save kam gud fren! Hemia i wan ansa long prea blong hem.
Afta long sakramen miting, Lillian i go long niufala klasrum blong hem. Wan bigfala gel i stap stanap long korido.
“Halo,” Lillian i talem. “?Yu stap visitim wod blong mifala?”
Gel i saksakem hed blong hem blong no agri. “No. Famli blong mifala i jes stap muv i kam long ples ia.”
Lillian i smael. “Welkam long wod blong blong yumi. Hemia i fas dei blong mi long Yang Woman.” Hem mo gel ia tufala i sidaon doan long klasrum. “I gud, nem blong mi Lillian.”
“!Truia!” niufala gel ia talem. “Nem blong mi tu, Lillian!”
Lillian i laf. !Papa long Heven i ansa long prea blong hem bakegen! Ating tingting ia blong stap yuwan long Yang Woman, bae i nomo wan man nomo nao.
Stori ia i hapen long Ostrelia.
Ol pikja droing oli kam Sue Teodoro