“Kipim Promes blong Hem,” Fren, Maj 2023, 10–11.
Kipim Promes blong Hem
Mi jes giaman naoia nomo long papa. ?Wanem nao?
Stori ia i hapen long Kana.
“!Sikis dei nomo i stap bifo mi baptaes!” Happiness i talem. !Dei ia i stap kam kolosap nao!
“?Yu yu rere?” papa i askem.
“Yes, mi ting,” Happiness i talem.
“Taem yu kasem baptaes, yu mekem wan kavenan” papa i talem. “?Yu yu tingbaot se hemia i minim wanem?”
“?Hem i wan promes, i stret?”
Papa i saksak hed blong agri. “!Yes! Yu promes blong folem Jisas Kraes mo obei ol komanmen. Papa long Heven i promes blong blesem mo helpem yu.”
Happiness i smael. Hem i save se hemia i wan impoten promes. !Hem i glad tumas blong mekem!
Long en, dei blong baptaes i kam. Happiness i jenis i go long ol waet klos. Tu narafala pikinini tufala i stap kasem baptaes tu. Olgeta evriwan oli wajem wota we i stap fulumap ples blong baptaes.
Taem we taem blong hem, Happiness mo papa tufala i stanap insaed long ples blong baptaes. Papa i talem prea blong baptaes. Afta, Happiness i holem nus blong hem blong blokem, mo papa i putum hem i daon andanit long wota.
Taem hem i kambak antap, !Happiness i filim gud tumas! Hem i wantem blong kipim promes blong hem blong folem Jisas. Hem i wantem blong filim klin olsem mo glad blong oltaem. Hem i neva wantem blong mekem wan rong joes bakegen.
Samfala dei i pas, Happiness i wekap mo tanem wota hita blong mekem se hem i save go swim. I tekem longtaem blong wota i kam hot. So, Happiness i onem TV. Hem i wantem blong wajem katun, blong stap wet.
Happiness i laf taem hem i wajem ol anamol we oli stap toktok. !TV so ia i fani tumas! I no longtaem, hem i fogetem wota hita.
Wan aoa i pas, papa i wokbaot i kam insaed long rum. “Hamas taem nao we wota hita i on blong?” hem i askem.
Happiness i lukluk i go antap. !Hem i bin wajem TV longtaem bitim we hem i stap tingting long hem!
“I no longtaem tumas,” Happiness i talem. “Ating blong hamas minit nomo.” Hem i ofem TV mo ron i go blong swim.
Be long haf dei ia, Happiness i filim nogud insaed long hat blong hem. Afta long baptaes blong hem, hem i neva wantem blong mekem wan rong joes. !Be hem i bin giaman nomo long papa!
Happiness i pulum longfala win blong hem. Hem i save wanem nao bae hem i mekem.
“Eh, papa,” Happiness i talem. “Mi bin giaman. Mi bin lego wota hita i stap blong longtaem, be mi no minim blong mekem olsem. Mi sore.”
“Hem i Oraet. Tangkyu blong talem long mi,” Papa i talem.
“Mi filim nogud tumas from we mi brokem promes blong baptaes blong mi,” Happiness i talem.
Papa i sidaon wetem Happiness long am jea. “Taem yu bin kasem baptaes, yu no bin promes blong stap stret gud evriwan. Yu promes blong traehad blong folem Jisas.”
Happiness i saksakem hed blong agri. Toktok ia i mekem hem i harem gud smol.
“Mo yu, yu save wanem blong mekem taem yu mekem wan rong joes?” Papa i askem.
“?Sakem sin?” Happiness i talem.
“!Hemia nao! Taem yumi sakem sin, Papa long Heven bae i fogivim yumi. Afta, bae yumi kam klin bakegen semmak olsem dei we yumi bin kasem baptaes. Sakem sin hem i pat blong kipim promes blong baptaes blong yu.”
Happiness i smael. “Bae mi go prea mo askem Papa long Heven blong fogivim mi.” Hem i glad hem i kipim promes blong baptaes blong hem.
Ol Pikja droing oli kam long Macky Pamintuan