Fren i go long Fren

Ron i go from Laet

Elda Peter M. Jonson

Blong Olgeta Seventi

Oli stretem aot long “Running toward the Light” (video), ChurchofJesusChrist.org.

Pikja droing i kam long Adam Nickel

Mi groap long wan pat blong bigfala siti we i gat bigfala denja. Wan dei mi stap wokbaot i go long skul mo i gat sam mane long paket blong klos blong mi. Ol koen blong mane oli stap mekem noes long paket blong mi taem mi wokbaot.

Mi mas pas bitim sam bigfala boe we oli stap long wan grup. Mi traem blong mekem se mi no fraet. Mi traem blong no fraet. Be oli harem saon mo noes blong mani. Oli wantem ol koen mo oli stat blong ronem mi.

Mi ron spid we spid olsem we mi save mekem blong go longwe. Mi tanem i go long wan smol rod long medel blong tu bilding. Mi save luk laet long en blong smol rod ia, mekem se mi ron i go from laet ia. I no longtaem, oli stop blong folem mi, mo mi bin sef.

Hemia i kam wan paten long laef blong mi. Mi ronwe long wanem we i nogud mo lukaotem wanem we i gud. Samtaem tingting blong mi i kam slak, be mi gohed blong traem faenem laet.

Taem mi go long kolej, mi plei long basketbol tim. Plante long ol memba blong tim, oli ol memba blong Jos Ia blong Jisas Kraes blong Ol Lata-dei Sent. Mi lanem abaot gospel tru long olgeta. Mi lanem se mi mi wan pikinini blong God. Hemia i minim se mi save kamaot long ol hadtaem blong mi mo kam moa gud. Mi joenem Jos. Afta long taem ia, mi traem evri dei blong kam moa olsem Papa blong mi long Heven mo Pikinini Boe blong Hem, Jisas Kraes. !Mo yu save mekem tu!

Taem yu stap ron i go from laet, ples ia i gat hop. Yu save se yu stap ron from paoa, pis mo hapines. Yumi evriwan i nidim blong ron i go from laet.

Basketbol Fan

Elda Johnson i lanem abaot gospel taem hem i stap plei basketbol. !Naoia, hem i taem blong yu!

1. Katem ol skwea daon ia mo skwisim olgeta blong mekem ol balong.

2. Mekem wan i sut afta narawan, i go insaed long wan bolglas.

3. Taem wan balong i sidaon long bolglas, !openem pepa mo askem kwestin!

• ?Wanem wan wei we yu save folem Papa long Heven?

• ?Wetaem nao yu bin jusum blong mekem samting we i raet?

• ?Long wanem wei nao yu luk laet blong Papa long Heven insaed long laef blong yu?

• ?Long wanem wei nao yu luk lav blong Papa long Heven insaed long laef blong yu?

• ?Long wanem wei nao yu luk laet blong Papa long Heven insaed long laef blong yu?

• !Raetem kwestin blong yuwan!