“Na Yalovinaka e na Vodo Ose Lili,” iTokani, Maji 2023, 28–29.
Na Yalovinaka e na Vodo Ose Lili
A diva o Damien me a kua ni kailavaki ganena.
Ni curu yani o Damien ki na rara ni gade, a rogoca o koya na ivakatagi ni marau ni vakatagitaki tiko. O buna e a kauti rau tiko kei na ganena lailai, o Adele, me rau lako i vodoka na nona ose lili taleitaki. E tiko kina e dua na qito lasa ni qato. E a marau o Damien ni na vakaraitaka vei Adele na ivakarau ni qito.
Sega ni dede e ratou sa yatuni sara yani. E a ka levu ka duiroka na itautauri ni ose lili, ka tiko kina e levu na ose ceuti. E ra dabe toka e na ose na gone matadredredre ni ra vodo wavoki tiko.
“Kevaka o digitaka e dua na ose e sau, e rawa ni o qitotaka na qito ni qato!” A kaya o Damien vei Adele. “Raica na kau e ra taura tu na gone? Ka raica na tamata e tu vua na qato?”
A dusi koya na tamata cakacaka o Damien. A tucake volekata tu na ose lili ka dulaka tu yani na qato. Ni ra vodo toka e na ose lili, e ra saga na gone me ra vakacuruma na nodra kau ki na loma ni qato me ra toboka kina. E na veigauna kece e ra toboka kina e dua na qato, e na dulaka tale mai e dua na ka vou na tamata cakacaka.
A vakasausau o Adele. “Au vinakata me‘u toboka taucoko na qato!” a kaya o koya.
Ni oti e dua na gauna e ratou sa qai yacova yani ina mua ni yatu e liu. Ia a sa vo toka ga e dua na ose lili.
“Damien,” e kaya o Grand-mère (Bubu), “vacava me soli vei Adele na ose qo baleta ni sa bera ni bau vodoka vakadua? E rawa ni o qai vodo e na kena ka tarava.”
“Sa donu,” a kaya yani e na domolailai o Damien. A vakaraica tu yani o koya na nona vukei Adele na tamata cakacaka ki na ose masikuvui caliva. Sa qai solia o tamata cakacaka vei Adele e dua na kau me toboka kina na qato.
A tekivu na ivakatagi, ka sa tekivu me cowiri na ose lili. A saravi Adele mai taudaku o Damien kei Bubu. Ia o Adele e a taura tiko na mua ni kau cala! A sega ni taura tiko na kau e na diana levu, ia a taura tiko na muana balavu, lila me dau toboki kina na qato.
“Adele, vukica na nomu kau!” a kailavaka yani. Ia a sega ni vaka me rogoci koya o Adele e na levu ni rorogo. E na gauna e a sivita kina na qato, a tara na qato na kau. Ia na diana e sa rui ka levu ka sega ni curu rawa ki na loma ni qato.
“Adele, na nomu kau!” A tovolea tale o Damien. “O na sega ni rawa ni toboka na qato kevaka o taura tu va‘qori!”
Ia a sega ni rogoci koya o Adele. E matadredredre ka dredre voli ga ni cowiri tiko na ose lili. Na nona kau e tara tikoga na qato vakavicavata. A sega ni toboka vakadua e dua.
E a vutugu o Damien. E sa vakalusia wale o Adele na nona gauna! Ke a vodo tiko o koya e na ose lili, ke a toboka kece na qato.
Ni sa oti na vodo wavoki, a cici yani vei Adele.
“Au a tukuna tiko yani vei iko na i tautauri ni kau!” a kailavaka yani. “Na cava o sega ni vakarogoci au kina? E a cala kece na ka o cakava!”
A sega ni kaila lesu mai vei Damien o Adele. A sega ni tagi. A duri tu ga e kea ka yalo lailai tu.
E a tavatukituki na uto i Damien, ka vakila na katakata ni matana. A vakacudrui koya na nona raici Adele ni calata taucoko na qato oya! Ia oya e sa qai imatai ni gauna vei Adele. Sega wale ga oya, e vaka me a ka ni lasa tiko vua. Me yacova mai oqo.
A qai kila o Damien na cala ni ka e cakava ka rarawa na lomana. A diva o koya me a kua ni kailavaki Adele.
“Vosoti au,” e kaya mai vakamalua. “E sega ni vinaka na ka au a cakava oya.”
A rai cake o Adele.
“Vakacava ke‘u solia vei iko eso na ivakasala me baleta na toboki ni qato?” A kaya o Damien. “Au na dabe tikivi iko e na ose lili ka vukei iko.”
A deguvacu o Adele.
Sa qai vuki o Damien vei Buna. “E rawa beka ni rua na neirau tikite me rawa ni tovolea tale o Adele?”
A matadredredre o Bubu. “Io e rawa.”
Na italanoa oqo a yaco mai Varanise.
Droini mai vei Violet Lemay