iTokani ki na iTokani

Ciciva na Rarama

Mai vei Elder Peter M. Johnson

E na Vitusagavulu

Tauri mai na “Running toward the Light” (ividio), ChurchofJesusChrist.org.

Droini mai vei Adam Nickel

Au a tubu cake e na dua na yasa rerevaki ni dua na koro levu. Dua na siga au a taubale tiko ki koronivuli ka tiko e na noqu taga e so na ilavo. E a taqiri tiko na siliva ni‘u taubale tiko.

Ka‘u na taubale sivita e so na gonetagane qase e ratou lewena e dua na ilawalawa. Au a tovolea me‘u deivaka na yaloqu. Au a tovolea me‘u kakua ni rere. Ia e ratou a rogoca na rorogo tataqiriqiri. E ratou a vinakata na siliva ka tekivu me ratou vakacemuri au.

Au a cici vakatotolo sara me‘u dro yani. Au a curuma e dua na gaunisala lailai. Au a rawa ni raica na rarama e mua ni sala, ka‘u ciciva yani na rarama. Sega ni dede sa cegu na nodratou vakacemuri au, ka‘u kila n‘iu sa bula.

Sa yaco oqo me dua na ivakarau ni noqu bula. Au a drovaka na veika ca, ka‘u vakasaqara na veika vinaka. E na so na gauna au a yalolailai, ia au tovolea tikoga me‘u kunea na rarama.

Ni‘u lako ki na koliji, au a qito e na timi ni vakacuru polo. E vuqa vei ira na lewe ni noqu timi e ra lewena na Lotu i Jisu Karisito ni Yalododonu Edaidai. Au a vulica mai vei ira na kosipeli. Au a vulica ni‘u dua na luve ni Kalou. Kena ibalebale oya ni‘u rawa ni ulabaleta na veika dredre e so ka yaco me‘u vinaka cake. Au a curu ki na Lotu. Tekivu mai na gauna oya, au dau tovolea e veisiga me‘u vakataka vakalevu cake na Tamaqu Vakalomalagi kei na Luvena, o Jisu Karisito. Ka rawa talega ni o cakava vakakina!

Ni ko cici yani ki na rarama, sa tiko kina na inuinui. O kila ni o ciciva tiko na kaukauwa, vakacegu, kei na marau. E gadrevi me da ciciva taucoko yani na rarama.

Lasa e na Vakacuru Polo

A vulica o Elder Johnson na kosipeli ni qito vakacuru polo tiko. Sa nomu gauna oqo!

1. Kotiva tani na sukuwea e ra ka boboka ka moici ira me ra vaka na polo.

2. Veivukevuke me viritaki na polo ki na dua na bilo.

3. Ni tau e dua na polo e loma ni bilo, dolava na pepa ka sauma na taro!

• Na cava e dua na sala o rawa ni muria kina na Tamada Vakalomalagi?

• Na gauna cava o sa bau digitaka kina na dodonu?

• O raica vakacava na rarama nei Tamada Vakalomalagi e na nomu bula?

• Na cava e vukei iko mo vakila kina na loloma ni Tamada Vakalomalagi?

• E rawa vakacava ni o wasea na nona rarama na Tamada Vakalomalagi vei ira tale e so?

• Vola na nomu taro vakai iko!