“Na iVola ni Dainaso,” iTokani, Maji 2023, 22–23.
Na iVola ni Dainaso
A vakaveveku mata o Sophia. Na cava na vuna a sega ni rawa kina ni taleitaki ira talega na dainaso o koya?
O Sophia kei Allie e rau drua, ka rau veitokani vinaka sara. E duidui na veika e rau taleitaka, ia oqori e vakavuna vakalevu me ka ni lasa! E rau dau taleitaka me rau qito vata.
Dua na siga e koronivuli, e a taura mai na valenivola o Sophia e dua na ivola me baleta na dainaso. A marautaka ni na vakaraitaka vei Allie.
“E sega ni rawa ni o wilika qori,” a kaya o Timmy, e dua na gonetagane e na nona kalasi.
“Baleta na cava?” A taroga o Sophia.
“E ra dau wilika ga na gonetagane,” a kaya. “Na dainaso sa baleti ira na gonetagane.”
A vakaveveku mata o Sophia. Na cava na vuna e na sega kina ni rawa ni taleitaki ira talega kina na dainaso o koya? A biuta o koya na ivola e loma ni nona kato dreketi. E sa na laki wilika ga.
E na siga taucoko, a vakasamataka o Sophia na veika a kaya o Timmy. E a lomabibi tikoga ni sa lesu i vale mai koronivuli.
“Na cava e leqa?” A taroga o Na.
“E kaya o Timmy ni‘u sega ni rawa ni wilika e dua na ivola me baleta na dainaso,” a kaya o Sophia. “E kaya o koya ni dainaso e baleti ira ga na gonetagane. E sega ni dina oya, se vavei?”
“Io e sega ni dina,” a kaya o Na.
A rai sobu o Sophia. “A cava ga a qai kaya kina va oya o Timmy?”
“E rairai e sega beka ni kila e dua tale na goneyalewa e taleitaka na dainaso,” a kaya o Na. “Ia na Tamada Vakalomalagi a sega ni buli keda me da tautauvata kece. Ka vinakata o Koya me da dau veilomani vakataki keda.”
A mokoti Sophia o Na. “Au rarawa ni a cakava va‘qori vei iko o Timmy. Ia o Tamada Vakalomalagi e lomani iko. Ka vakakina o au.”
“Vinaka, Na,” a kaya o Sophia. A vakila o koya ni sa vinaka cake mai.
“Au na vosa vei nomu qasenivuli baleta na ka oqo, donu?” A kaya o Na.
A deguvacu o Sophia. “Donu.”
A gole o Sophia me lako i qito vata kei Allie. E rau a bulia e dua na qito ka vakatokai na Super Princess Racer [Veitau Motoka Nei Raluve], ka ra draiva tiko kina ni motoka ni veitau na matakau nei Allie. E a veivolekati sara, ia a mani taura ga na icocovi o Princess Lightning Cheetah [Raluve Tibiniliva Jita]! E rau a kaikaila o Sophia kei Allie.
“O via raica na ivola ni dainaso au kauta mai nikua?” A taroga o Sophia.
“Io!” A kaya o Allie.
A matadredredre o Sophia. A marau ni rau dau veilasamaki kei Allie.
E na siga ka tarava, a kacivaka na qasenivuli nei Sophia e dua na itukutuku. “Kalasi,” a kaya o koya, “e tiko e dua na ka au via tukuna vei kemuni. E donu vinaka me taleitaki na veika duidui e so. Na noda ivola kei na ka ni vakatatalo kece e noda taucoko.”
A marau dina o Sophia! E na gauna ni wili ivola, e a ucuna mai na nona kato dreketi na ivola ni dainaso.
A lako mai ki na nona desi o Timmy. “Au rarawataka na noqu kaya ni o sega ni rawa ni wilika na ivola o ya,” a kaya. “Au taleitaki ira talega na dainaso.”
“Sa donu,” a kaya o Sophia. “O via wiliwili vata kei au?”
“Io!” A dabe sobu e yasana o Timmy. “Vinaka.”
A dolava o Sophia na ivola. O koya kei Timmy e rau duidui, ia e totoka na veiwasei kei na dua na itokani vou.
Na italanoa oqo a yaco e Amerika.
Droini mai vei Mark Robison