“Na Masu e na Gauna ni Uneune,” iTokani, Maji 2023, 4–5.

Na Masu e na Gauna ni Uneune

Mai vei Noelle Barrus

(Yavutaki e na italanoa dina)

Ni yadra cake mai o Violet, e a sakure tu na ka kecega!

Na italanoa oqo a yaco e Peru.

Goneyalewa lailai ni yadra cecekala e na imocemoce ka taura tu e dua na itutuvi

A moce tu o Violet e na gauna a vakayadrati koya kina e dua na rorogo vakuru. Taumada, a nanuma o koya ni kurukuru.

Ia na vakuru oya sa vaka me rogolevu cake tikoga mai. E a kurea na katuba leka ni nona rumu ni moce.

A dabe cake vakatotolo sara o Violet. Oqo e dua na uneune!

O koya kei na nona matavuvale e ratou a toki ki Peru e na dua na gauna wale tikoga e liu. E kila o koya ni dau yaco wasoma eke na uneune. Ka ratou dau vakavakarau tu kina na nona matavuvale ka vakatovotovotaka na veika me ratou na cakava. Ia oqo e a vakarerevaki sara vakalevu mai na ka a nanuma taumada. E rawa ni vakila o koya ni sa sakure tu na yagona!

A cici o Violet ki valenikuro ka qasi e na ruku ni teveli. Ni oti e vica na sekodi, e rau a tomani koya yani o ganena kei tacina. Ka vakakina o Na kei Ta.

“Sa vinaka ni tou nanuma tiko na veika tou a vakatovotovotaka,” a kaya o Tata. “Dou vinaka kece tiko?”

E rau a deguvacu o ganei Violet kei tacina yalewa.

Ia o Violet e a rere. E a sogota na matana. E a dredre sara me kua ni kauwaitaka na sasakurekure a yaco wavoliti koya tu.

A qai nanuma mai o Violet me masu. A roqo liga ka vakacuvara na uluna. “I Tamaqu Vakalomalagi lomani,” a vakasolokakana yani, “yalovinaka ka karona na noqu matavuvale.”

Masu tiko na matavuvale ena ruku ni teveli e na dua na uneune

A masu tikoga o Violet. A vakila ni vaka me mokoti koya tiko e dua. Ni sa oti, a rai cake. E rau a roqo liga tu o Na kei Ta. Ka vakakina o ganena kei tacina. E ratou a masu kece tiko! Se sakure tikoga na qele. Ia a vakila o Violet na vakacegu ni yalona kei na nona vakasama.

Sa qai mai oti yani na sasakurekure. E ratou a tiko vakalalai tale e na ruku ni teveli o Violet kei na nona matavuvale, me ratou taqomaki.

“Na cava o vakila?” A tarogi Violet o Na.

“Sa vinaka,” a kaya o Violet. “Taumada au a rere vakaidina. Ia na masu a vukei au me‘u yalo vakacegu.” A mokoti Na o koya. A marau ni a vukei koya na Tamada Vakalomalagi me vakila na vakacegu.