O Lilian Taudua Ga

Mai vei Mikaela Wilkins

(Yavutaki e na italanoa dina)

E sega ni vinakata o Lillian me o koya taudua ga me lewe ni kalasi e na Goneyalewa.

Nikua sa na iotioti ni siga nei Lillian e na Lalai. E na dau vakananumi iratou na vo ni gone e na Lalai o Lillian. E ratou lewe tolu tikoga—rua na goneyalewa gone sobu kei na ganena lailai, o Michael.

“Na cava o vakila tiko me baleta na toso ki na Goneyalewa?” a taroga na nona qasenivuli ni Lalai.

“Au sega ni rawa ni wawa me‘u gole ki kalasi vata kei ira na goneyalewa qase cake!” A kaya o Lillian.

“Au marau ni ko sa nanamaki tiko,” a kaya o nona qasenivuli. “O cei tale e na tiko vata kei iko e na Goneyalewa?”

A vakasamataki ira na goneyalewa qase cake e na tabanalevu o Lillian. O Summer kei Cova e rau se qai vakacavara ga oqo na vuli torocake. Ka ratou sa toki na matavuvale nei Melvina. Wawa. Sa qai vo ga … o Lillian.

E na vakacava beka na ituvaki ni nona kalasi ni Goneyalewa? O iratou ga na qasenivuli kei koya? E rogorogo sakasaka ka galili—oya. Na nona vakasamataka na ka o ya o Lilian e a vakavu taqaya vua. A matararawa. E sega ni vinakata me o koya duadua ga me lewena na Goneyalewa.

E na vo ni siga, a vakasamataka tiko ga o Lillian ni o koya sa na goneyalewa duadua ga. E na gauna ni vakayakavi, a biliga wavoki na kakana e loma ni nona peleti ka sega ni kania. A vosakudrukudru ni sa gauna me wiliwili kina e na vuli ivolanikalou vakamatavuvale.

A vakadavora sobu o tinana na nona ivolanikalou. “Na cava e leqa?” a taroga.

A cegulevu o Lillian. “Au na lewe taudua ga ni kalasi ni Goneyalewa!”

A toso o tinana me dabe e yasai Lillian. A mokoti koya. “Oqori e na sega ni rawarawa,” e kaya o koya. Na cava keirau na rawa ni cakava me keirau vukei iko kina?”

A vakasama vakalailai o Lilian. “E rawa beka ni datou masulaka me na toki mai ki na tabanalevu e dua tale na goneyalewa. Ka na rawa talega vei Ta me solia vei au e dua na veivakalougatataki.”

A matadredredre o Ta. “Oqori e ra sa vakasama totoka.”

E ratou a tekiduru na matavuvale me ratou masu. Tamaqu Vakalomalagi,” a tekivu o Lillian, “Au marau ni‘u na toso ki na Goneyalewa. Au sega ni vinakata me‘u tiko duadua, ia kevaka o ya na Nomuni lewa, sa donu vinaka. Yalovinaka ni vukei au me‘u kila na cava au rawa ni cakava me‘u yalo vinaka cake kina. Kevaka Ko ni vinakata moni vakauqeta e dua na matavuvale vata kei na dua na goneyalewa yabaki vata kei au me toki mai ki na neitou tabanalevu, oqori talega e na totoka sara.”

Ni oti na masu, a tabaka na uluna o Ta. Au vakalougatataki iko mo vakila na vakacegu e na nomu toso ki na Goneyalewa,” a kaya o koya. “E na vakalougatataki iko na Tamada Vakalomalagi ni o kerea na Nona veivuke.”

A vakila dina o Lillian na vakacegu. E a sega ni vakadeitaka rawa o koya na ka e rawa ni cakava me vakarawarawataka na toso ki na Goneyalewa. Ia a kila talega o koya ni na vukei koya na Tamada Vakalomalagi.

E na Sigatabu, a se taqaya toka ga vakalailai o Lillian. Ia a nanuma o koya na vakacegu a vakila ni oti na veivakalougatataki nei Tamana. A kila o koya ni na VINAKA na veika kece.

E na soqoni ni sakaramede, a kacivaka o bisopi ni sa na peresitedi vou ni Goneyalewa o Sister Barns. A tucake o Sisita Barns ni kacivi na yacana. A sega ni se kilai koya vinaka o Lillian, ia e vaka me rairai dua na itokani vinaka.

A kaya o Tinana ni yabaki vata kei Lillian, a qai yaco o nona iliuliu ni Goneyalewa me dua vei ira na nona itokani vinaka duadua. De na rawa beka ni rau veitokani o Lillian kei Sister Barns! O ya e a dua sara ga na isau ni nona masu.

Ni oti na soqoni ni sakaramede, a gole o Lillian ki na nona rumu vou ni kalasi. A tucake tu e na olo e dua na goneyalewa qase cake.

“Bula,” a kaya o Lilian. “O sikova tiko beka mai na neitou tabanalevu?”

A kurea na uluna na goneyalewa. “Sega. Na neitou matavuvale e sa qai toki ga mai qo.”

A matadredredre o Lillian. “O sa kidavaki mai ki na nodatou tabanalevu. Oqo na imatai ni noqu siga e na Goneyalewa.” E a dabe sobu kei na goneyalewa e na rumu ni kalasi. “O, na yacaqu o Lillian.”

“Sega ni rawa!” a kaya na goneyalewa vou. “Na yacaqu talega o Lilian!”

E a dredre o Lillian. A sa sauma na Tamada Vakalomalagi na nona masu! E na rairai sega beka ni galili sara na nona tiko e na Goneyalewa.

Na italanoa oqo a yaco e Ositerelia.

Droini mai vei Sue Teodoro