“Maroroi ni Nona Yalayala,” iTokani, Maji 2023, 10–11.
Maroroi ni Nona Yalayala
Au se qai lasu ga qo vei Ta. Na cava me‘u na cakava?
Na italanoa oqo e a yaco mai Ghana.
“Vo ga e ono na siga me‘u papitaiso kina!” A kaya o Happiness. Sa voleka sara ga qo na siga!
“O sa vakarau?” a taroga o Ta.
“Au nanuma ni vakakina,” a kaya o Happiness.
“Ni ko papitaiso, o na vakayacora kina e dua na veiyalayalati,” a kaya o Ta. “O nanuma tiko na ibalebale ni ka o ya?”
“E dua na yalayala, donu?”
A deguvacu o Ta. “Io! O yalataka mo muri Jisu Karisito ka muria na ivakaro. E yalataka na Tamada Vakalomalagi me na vakalougatataki iko ka vukei iko.”
E a matadredredre o Happiness. A kila o koya ni sa dua na yalayala bibi oya. E marautaka o koya ni na cakava!
Sa qai yaco mai na siga ni nona papitaiso. A veisau ko Happiness ki na isulu vulavula. E rua tale na gone e rau na papitaiso talega. E ratou a sarasara kece toka ni sa vakasinaiti na tobu ni papitaiso e na wai.
Ni sa yaco mai na nona gauna, e rau a sobu ki na tobu ko Happiness kei Ta. A cabora o Ta na masu ni papitaiso. Qai tabonaka o Happiness na ucuna, ka qai vakotori koya me dromu e loma ni wai o Ta.
Ni duri cake mai, sa vakila o Happiness na vinaka ni lomana! E a vinakata me maroroya na nona yalayala me muri Jisu. E vinakata me vakila tu ga na savasava kei na marau oqo me tawamudu. E sega ni vinakata me na vakayacora tale vakadua e dua na digidigi cala.
Ni oti e vica na siga, a yadra cake mai o Happiness ka tabaka na ivakatakata ni wai me rawa ni sisili. A taura e dua na gauna balavu me katakata kina na wai. Sa qai vuki o Happiness ki na TV. E a vinakata me sarava na katuni ni wawa toka.
E a dredre o Happiness ni saravi ira tiko na manumanu ka ra vosa tiko e na sikirini. Sa lasa dina na iyaloyalo oqo! Sa mani mai guilecava vakadua o koya na ivakatakata ni wai.
Ni oti e dua na auwa, a curu yani o Ta ki na rumu. “Sa vakacava na dede ni kena waqa tiko na ivakatakata ni wai?” a taroga.
A rai cake o Happiness. Sa balavu cake sara na gauna ni nona sara TV mai na ka a nakita!
“Sega sara ni dede,” a kaya o Happiness. “E vica ga na miniti.” A bokoca na TV ka cici yani me lako i sisili.
Ia ena vo ni siga, a vakila o Happiness na sega ni vinaka ni lomana. Ni oti na nona papitaiso a vinakata me kakua vakadua ni vakayacora e dua na digidigi cala. Ia se qai lasu toka ga vei Ta!
E a cegulevu o Happiness. A kila o koya na ka e dodonu me cakava.
“I, Ta,” a kaya o Happiness. “Au a tukuna e dua na lasu. Au biuta tu na ivakatakata ni wai me dua na gauna balavu, ia au a sega ni nakita. Vosoti au.”
“Sa Donu. Vinaka vakalevu na nomu tukuna vei au,” a kaya o Ta.
“Au a yalo rarawa dina baleta ni‘u a voroka na noqu yalayala ni papitaiso,” a kaya o Happiness.
A dabe sobu o Ta vata kei Happiness e na idabedabe. “Ni o a papitaiso, o a sega ni yalataka mo taucoko sara. O a yalataka mo na tovolea vakaukauwa mo muri Jisu.”
A deguvacu o Happiness. Oqori a vakavuna yalo vinaka cake mai vakalailai.
“O kila beka na ka o rawa ni vakayacora ni o digidigi cala?” A taroga o Ta.
“Veivutuni?” a kaya o Happiness.
“Donu vinaka! Ni da veivutuni, e na vosoti keda na Tamada Vakalomalagi. E da sa qai rawa ni savasava sara me vaka na siga e da a papitaiso kina. Na veivutuni sa tiki ni kena maroroi na yalayala ni nomu papitaiso.”
E a matadredredre o Hapiness. “Au na masu ka kerea vua na Tamada Vakalomalagi me vosoti au.” A marau ni rawa ni maroroya na nona yalayala ni papitaiso.
Droini mai vei Macky Pamintuan