“Na Leqa ni Veiwasei,” iTokani, Maji 2023, 36–37.
Na Leqa ni Veiwasei
“Na veiwasei e dua na sala mo vakaraitaka kina vua e dua ni o kauwaitaki koya.”
Caquru, Caquru, Caquru. A tiloma na kena popcorn o Adriu ka yatova e dua tale na iluku.
Na tuakana, o Kelevi, e a bitalaki koya sobu e na idabedabe e yasana. “E, e rawa ni so na kequ?”
A sega ni rai tani mai na TV o Adriu. “Sega.”
“O, kua ni vaqori. O iko o rawa ni wasea.”
A yatova yani o Kelevi na bilo, ia a dreta tani o Adriu.
“Sega! Au sa tukuna oti vei iko e liu. Kakua ni kerekere tale!”
“Oi sa vinaka!” A tucake o Kelevi ka biuta na rumu.
E na siga ka tarava, a gole o Adriu ki valenikuro. A vakarautaka tiko o Kelevi na sushi kei na raisi, lumi, kei na vuaka tawa i tini.
E a titi na weli nei Adriu. “E rawa ni so vei au?”
“Sega,” a kaya o Kelevi.
A vakacudrui Adriu sara ga na ka oqori. A cici sobu ki ra me lako i tukuna vei Ta.
“Na cava na vuna sa rui kocokoco kina o Kelevi?” a taroga.
A vakaveveku mata o Ta. Au raica e nanoa na nomu sega ni via wasea na kemu popcorn. Na cava me veiwasei kina vei iko o Kelevi ni o a sega ni veiwasei vua?”
“Baleta ni taciqu o koya!” A kaya o Adriu.
“Na cava o a sega ni veiwasei kina vua?”
“O koya e sega vakadua ni dau veiwasei vei au! Kena ikuri, au a vakarautaka oya me baleti au ga, sega ni kena,” a kaya o Adriu. Ia a sega ni yalo vinaka sara o koya. E a sega beka ni vinaka na nona a sega ni veiwasei.
“O bau kila beka ni ka bibi sara mai Korea na veiwasei?” A taroga o Ta. E ratou a lako mai Korea na matavuvale nei Adriu. “Na veiwasei e dua na sala mo vakaraitaka kina vua e dua ni o kauwaitaki koya. Ia kevaka o sega ni veiwasei, e vaka mo kaya tiko ni o sega ni kauwaitaki koya.”
“Ia au dau kauwaitaki Kelevi.”
A vakasamataka o Adriu se cava e na vakayacora o Jisu. E nanuma lesu o koya na nona lomani ira na tamata kecega o Jisu—o ira sara mada ga e ra cati Koya.
“Au vakabauta me‘u na veiwasei vei Kelevi ni mataka ka raica se na vakaevei,” a kaya vei Ta.
A matadredredre o Ta. Au nanuma ni oqori e vakasama vinaka”
Ni lako i moce e na bogi oya o Adriu, a vakasamataka na veika vinaka tale e so e rawa ni vakayacora vei Kelevi. E a mamarautaka o koya ni sa na tekivu veiwasei!
E na mataka ka tarava, a yadra cake mai o Adriu e na kurabui. A caka i katalau o Kelevi me baleti koya vakatabakidua!
“A vosa vei au o Ta me baleta na veiwasei,” a kaya o Kelevi. “Au vinakata me‘u caka vinaka cake. Ka‘u mani vakarautaka kina oqo me kemu.”
“Vinaka!” A kaya o Adriu. “Au vinakata me‘u caka vinaka cake talega!”
E na mua ni siga oya, e rau a sarava vata e dua na iyaloyalo o Adriu kei Kelevi. A laiva o Adriu me digitaka o Kelevi se iyaloyalo cava. Sa qai vakarautaka eso na popcorn me kei Kelevi ga! E a irova yani na loma ni boulu. E vaka me kaya tiko na popcorn, “KANI AU!” Ia a sega ni kania e dua o Adriu. A solia vei Kelevi na bilo ka kaya, “Oqo e kemu taucoko. Vosoti au ni‘u a sega ni dau veiwasei e liu.”
E rau a veiwasei o Adriu kei Kelevi e na loma ni macawa taucoko. A vakalaivi Kelevi me wilika na nona ivola. A vakatara me vakayagataka o Kelevi na nona peni ni makamaka. A vakatara vei Kelevi me qitora na nona iyaya ni vakatatalo taleitaki. A solia talega e dua tale na gauna me qito kina o Kelevi ni rau qitora tiko e dua na qito.
Na levu ga ni nona veiwasei o Adriu vei Kelevi, na levu cake ni nona veiwasei vei koya o Kelevi! Sega ni dede e rau sa tekivu dui vakayaco veika vinaka me baleti koya kadua e na veigauna taucoko. A kila tu o Adriu ni a vukei koya tiko na Tamada Vakalomalagi me veiwasei vei tacina. A sega ni taucoko sara o Adriu me vakataki Jisu, ia a saga tiko o koya me vakataki Koya vakalevu cake e na veisiga.
Na italanoa oqo a yaco e Amerika.
Droini mai vei Adam Howling