“Noqu Lalawa me Baleta na iVola i Momani,” iTokani, Maji 2023, 31.
Gone kei na iTabagone
Noqu Lalawa me Baleta na iVola i Momani
Droini mai vei Rachel Hoffman-Bayles
Au a lalawataka me‘u wilika na iVola i Momani ni bera na noqu papitaiso, me vakataki rau na tuakaqu kei na ganequ. Ia ni yaco na COVID, au a calata e levu na vuli, ka sa dredre sara vei au na wiliwili. Na iVola i Momani e levu tu na kena vosa lelevu, ka‘u a gadreva na veivuke.
Keitou a qai vakasamataka kei rau na noqu itubutubu e dua na ka. Au a vakayagataka na Gospel Library app e na talevoni nei tinaqu me‘u vakarorogo kina ki na iVola i Momani. Keitou a vakamaluataka na irorogo ni domo me rawa ni‘u wiliwili ka vakamuria vakarawarawa. Au a tu vakadua talega e na so na gauna ka sarava na vidio ka sema tiko e na app. E na veigauna kece au wiliwili kina, au dau makataka ni sa wiliki oti e na dua na ivolakabi. Au a talanoataka vei tinaqu na veika au wilika tiko. E a ka ni lasa dina!
Sa vinaka cake mai na noqu wiliwili, ia au a nanuma ni‘u na sega ni rawa ni vakacavara ni bera na noqu papitaiso. Au a mani lewa me‘u kua ni vakacavara ni bera na noqu papitaiso, ia me‘u na vakaotia ni bera ni cava na yabaki (oya e na dua na vula ki muri). Au a wiliwili tikoga. E na so na gauna e rau dau wiliwili vata kei au o tinaqu se o tuakaqu yalewa.
E na ika 31 ni Tiseba, au a vakacavara kina na iVola i Momani! E ratou a kaila na noqu matavuvale taucoko. Au a qai gole ki na noqu rumu me‘u cabora e dua na masu. Au a taroga se sa dina na iVola i Momani, ka‘u a yalovinaka sara kina.
Au kila ni dau vakarorogo na Tamada Vakalomalagi ni‘u masu. Au kila ni rau lomani au na noqu itubutubu vakalomalagi. Au kila ni sa vosa ni Kalou na iVola i Momani, ka lomani keda o Jisu.