“Ang Panihapon sa Jerusalem,” Higala, Abr. 2023, 4–5.

Ang Panihapon sa Jerusalem

Ni Lori Fuller Sosa

(Gibase sa usa ka tinuod nga istorya)

Si Gideon naghinamhinam niini nga tradisyon sa matag tuig.

Kini nga istorya nahitabo sa USA.

Pamilya nga nangaon diha sa gihanig nga habol

Kadto ang adlaw sa wala pa ang Pasko sa Pagkabanhaw. Kana nagpasabot nga karong gabii si Gideon ug ang iyang pamilya mangaon sa ilang panihapon sa Jerusalem! Si Gideon naghinamhinam niini nga tradisyon sa matag tuig. Nangandoy siya nga sila mobuhat niini sa makadaghan sa usa ka tuig. Apan si Mama miingon nga sila kinahanglan magpaabot hangtod sa Pasko sa Pagkabanhaw aron mahimo kini nga labi ka espesyal.

Sila si Gideon ug Amelia mihanig sa usa ka habol diha sa yuta aron makalingkod ang tanan niini. Dayon si Gideon miadto aron motabang ni Mama ug Papa sa pagkaon. Ganahan siya magluto. Ang pag-andam sa pagkaon mao ang paborito nga bahin ni Gideon.

Ang tanan nga pagkaon tingali ang mga butang nga lagmit gikaon ni Jesus sa dihang Siya dinhi pa sa yuta. Siyempre, sila dili gayod sigurado nga nasayod. Apan nindot hunahunaon nga si Jesus nagkaon niining sama nga mga pagkaon uban sa Iyang mga disipulo didto sa Jerusalem. Mao nga ang pamilya ni Gideon mitawag niini og usa ka panihapon sa Jerusalem!

Gidala ni Gideon ang usa ka bukag sa pyape nga pan [flatbread] ug usa ka panaksan nga gipauga nga mga dates. Siya mipahimutang niini diha sa habol. Dihay dugos usab nga ipahid sa pyape nga pan. Si Amelia nagdala og usa ka garapon nga mga oliba ug usa ka bandihado nga gipauga nga mga apricot ug mga almond. Nagsunod og abot ang pipila ka keso sa kanding ug inad-ad nga pipino. Dayon usa ka platong isda ug mga baso sa tubig. Ang mga bata nag-amping og maayo sa pagdala sa mga mainom aron dili kini matikba.

Ang tanan nanglingkod nga nag-alirong diha sa habol. Militok si Mama og pag-ampo bahin sa pagkaon.

“Salamat Kanimo alang niining higayon sa paghinumdom ni Jesus sa Pasko sa Pagkabanhaw,” nag-ampo siya.

Human sa pag-ampo, ang mga bata mipasa sa mga putahi sa pagkaon ngadto sa usag usa. Mikuha sila og pipila sa apricot ug mga pipino. Gilikay ni Gideon nga ang batang gamay makayabo sa mga oliba. Ang tanan nangaon nga nagkinamot. Nanag-istoryahanay sila ug nagkinataw-anay.

Gipahid ni Gideon ang pipila ka keso sa kanding diha sa iyang pan. Dayon midugang pa siya og pipila ka dugos. Lamian kaayo kadto!

“Unsa ang inyong paborito nga istorya kabahin ni Jesus?” Si Papa nangutana sa mga bata.

“Ganahan ko sa istorya bahin ni Jesus nga naglakaw sa tubig!” Miingon si Sullivan.

Mitudlo si Gideon sa plato sa isda. “Ug ganahan ko sa dihang Siya mipakaon sa tanan. Siya mipakaon sa liboan ka tawo gamit lang ang pipila ka buok pan ug pipila ka isda. Kana ang akong paborito.”

“Ganahan usab ko niadtong mga istorya,” miingon si Mama. “Gihimo ni Jesus ang mga butang nga posible nga kita dili gayod makahimo sa atong kaugalingon.”

“Atong nakita usab ang daghang milagro sa atong mga kinabuhi,” miingon si Papa.

“Sama sa kon giunsa nato pagkaplag og bag-ong mga higala sa matag higayon nga kita mamalhin,” Gideon said.

“Oo!” miingon si Mama. “Kita makakita sa mga milagro ug mga panalangin sa tanan natong palibot.”

Sa dihang nahuman na ang panihapon, silang tanan nabusog ug malipayon. Mitabang si Gideon sa pagdala sa mga plato ngadto sa lababo. Sunod tuig, sila aduna na usab usa ka panihapon sa Jerusalem. Apan siya dili na kinahanglan magpaabot hangtod niana aron maghunahuna kabahin ni Jesus. Siya makahimo niana sa matag adlaw!