“Ikapulo o Ice Cream?” Higala, Abr. 2023, 10–11.
Ikapulo o Ice Cream?
Mahimo ra unya kining ulian ni Katy sa dili madugay, dili ba?
Kini nga istorya nahitabo sa USA.
Si Katy ug ang iyang igsoong lalaki nga si Christian mibutang sa ilang mga bisekleta nganha sa sagbot.
“Gusto ka bang mopalit og ice cream sa tindahan?” Nangutana si Christian.
“Oo!” Miingon si Katy. Init sa gawas, ug lisod ang magbisiklita. Ang ice cream morag sakto gyod!
Si Katy midagan ngadto sa sulod. Nakita niya ang gamayng bag diin iyang gihiposan ang kwarta. Dihang giablihan niya kini, ningmug-ot siya. Kulang ang iyang kwarta para sa ice cream.
Dayon milantaw siya ngadto sa garapon nga may kwarta sa iyang estante. Didto niya gihiposan ang pang-ikapulo nga kwarta nga ihatag sa bishop. Dunay igo nga kwarta didto alang sa ice cream!
Mikuha si Katy og pipila ka sensilyo gikan sa iyang pang-ikapulo nga garapon. Dayon siya ug si Christian nagdali og adto sa tindahan ug mipunit sa mga lami [flavor] nga ilang gusto. Si Katy ingon og mibati sa gamayng sala samtang iyang gitilapan ang iyang apa sa tsokoleyt nga ice-cream. Apan dili kaayo dako ang kwarta nga iyang gikuha. Mahimo ra unya niya kining ulian.
Pipila ka semana ang milabay, si Katy miadto na usab aron mopalit og ice cream. Wala gihapon siyay igong kwarta, mao nga mikuha siya og mas dako-dako gikan sa iyang pang-ikapulo nga garapon. Ulian ra usab unya ni nako, miingon siya sa iyang kaugalingon.
Si Katy padayon nga mikuha og kwarta gikan sa iyang pang-ikapulo nga garapon. Nagsige siya og saad nga ulian kini. Apan lisod nang hinumdoman kon pila na ang iyang nakuha. Ug wala na siyay igong kwarta nga ipuli niini.
Karon panahon na sa iyang pamilya alang sa interbiyo sa ikapulo. Makigkita na sila ni Bishop Leavitt. Siya mangutana sa matag usa nila kon sila mibayad ba sa eksaktong ikapulo sa tanan nga kwarta nga ilang gikita nianang tuiga.
Niana nga Dominggo, gibutang ni Katy ang nahibilin sa iyang pang-ikapulo nga kwarta sulod sa sobre ug gihatag kini ngadto sa bishop. Apan nahibalo siya nga kulang kadto. Lain ang iyang pamati.
Sa wala madugay, ang pamilya ni Katy nagtupad sa paglingkod sa opisina ni Bishop Leavitt.
“Ikaw ba nagbayad og eksaktong ikapulo?” Si Bishop Leavitt nangutana ni Christian.
“Oo!” Miingon si Christian.
Miiswag si Katy sa iyang lingkoranan. Ok ra kaha kon sultihan siya [ang bishop] nga siya [si Katy] nagbayad sab og eksaktong ikapulo? Wala pa, niya maulii ang iyang tanan nga ikapulo, apan iya ra unya kining ulian!
“Ikaw ba nagbayad og eksaktong ikapulo?” Si Bishop Leavitt nangutana ni Katy.
Miduko si Katy. Sayop ang mamakak.
“Wala,” hinay siyang miingon. “Akong gigamit ang uban nako nga pang-ikapulo nga kwarta sa pagpalit og ice cream.”
“Nahibalo ko nga ang Langitnong Amahan mapasalamaton sa ikapulo nga imong gibayad. Ug kon kita makahimo og sayop nga pagpili, kita mahimong maghinulsol ug makapaningkamot sa paghimo og mas maayo.” Si Bishop Leavitt mipahiyom kang Katy. “Nasayod ko nga maningkamot ka nga imong maulian ang imong tanan nga ikapulo sa moabot nga adlaw.”
Miyango si Katy. Gusto siya nga mahimong tigbayad og eksakto nga ikapulo!
Pagkasunod higayon dihang nakakwarta siya og pipila, si Katy mibutang og 10 porsyento sa iyang garapon sa ikapulo. Dayon iyang gibutangan og dugang pa. Igo kaha kini nga puli sa akong nakuha? naghunahuna siya. Iya pa gyod nga gidugangan, aron masiguro.
Apan mibati gihapon siya nga may sala. Tingali dugangan pa gyod niya ang pagbayad sa ikapulo hangtod nga iyang mailisan ang tanan. Iyang gipatong iyang ulo diha sa iyang mga bukton.
Si Mama misulod sa kwarto. “Unsay problema?”
Nanghupaw si Katy. “Wala ko kabalo kon pila ang ikapulo nga kinahanglan nakong bayaran aron mapulihan ang akong nagasto.”
Gigakos ni Mama si Katy. “Nalipay ko nga ganahan kang matul-id ang imong sayop,” miingon siya. “Apan usahay kita nagkinahanglan lang nga magsugod kon asang dapita na kita ug maningkamot na usab. Ang Langitnong Amahan mopasaylo nato kon kita mohimo sa atong labing maayo aron makahinulsol.”
Tinuod ba na? Bisan sa iyang sayop sa ikapulo?
Dihang mibiya si Mama, nag-ampo si Katy. “Langitnong Amahan, pasayloa ko nga ako wala makabayad sa akong tanan nga ikapulo. Gusto nako kining ulian, apan wa ko kabalo kon pila ang akong nautang. Mahimo ba nga Imo kong pasayloon ug magsugod og usab ug maningkamot og usab?”
Si Katy mibati nga malinawon. Maanindot ang pagbati nga makapangayo og pasaylo. Nasayod siya nga ang Langitnong Amahan motabang niya nga makahimo og mas maayo sukad niadto!
Paghulagway pinaagi ni Matt Smith