“Naningkamot nga makaabot sa Mars,” Higala, Abr. 2023, 40–41.
Naningkamot nga makaabot sa Mars
Si Michelle dunay misyon. Ug kining tanan nagsugod sa pagkat-on.
Kini nga istorya nahitabo sa USA.
Si Michelle mitakos og mga patatas ngadto sa iyang plato. Iyang gilibot sa pagtan-aw ang iyang pamilya libot sa lamesa. Siya ang kinamanghoran sa 10 ka igsoon, ug ang uban nila naa na sa kolehiyo karon. Gusto siyang makadungog nila nga moistorya mahitungod sa unsay ilang mga nakat-onan.
“Unsay gusto nimong tun-an kon magkolehiyo ka na?” nangutana ang iyang igsoong lalaki. Nag-eskwela siya aron mahimong usa ka engineer.
“Wala pa gyod ko kahibalo,” miingon si Michelle.
“Pwede pod kang mag-engineer,” giingnan siya sa iyang igsoong lalaki. “Maayo man kaayo ka.”
Ganahan si Michelle niana nga ideya. Ganahan siya og math og science. Siya maayo usab niini. Nasayod siya nga ang Dios ganahan nga siya makakat-on. Ug siya nasayod nga Siya motabang niya.
Dihang midako na si Michelle, nag-eskwela gyod siya og kolehiyo aron mahimong engineer. Naningkamot siya sa pagkat-on. Ang ubang klase lisod. Apan si Michelle wala mohunong.
Samtang naa siya sa kolehiyo, iyang gipaambit ang ebanghelyo ngadto sa iyang klasmeyt nga si John. Wala madugay naminyo sila sa templo. Nakagradwar si Michelle ug mikuha og master’s degree. Nahimo siyang inahan. Gani nakab-ot gyod niya ang iyang gipangandoy nga trabaho sa pagtabang nga makapalupad og mga rocket nga mosuhid sa kawanangan! Usa siya ka lider ug miorganisar og mga proyekto alang sa iyang team.
Usa ka adlaw ang boss ni Michelle mihangyo niya nga motrabaho sa usa ka espesyal nga proyekto. Motabang siya sa paghimo og usa ka robot nga gitawag og rover nga ipadala sa Mars. Mahinanom si Michelle! Sulod sa mga bulan, naghimo siya og bag-ong mga desinyo ug gipangtestingan kini.
Apan human nga iyang natrabaho ang rover sa Mars sulod sa hapit usa ka tuig, si Michelle ug ang iyang bana adunay importante nga video call. Tawag kadto ni Presidente Henry B. Eyring. “Gusto mi nga modapit ninyo nga mahimong lider sa misyon,” miingon si Presidente Eyring. “Dawaton ba ninyo ni nga calling?”
Nagtinan-away si Michelle ug si John. Ang pagserbisyo og misyon nagpasabot nga biyaan ni Michelle ang iyang gipangandoy nga trabaho. Dili niya masaksihan ang pagIunsad sa rover sa Mars! Apan nasayod siya nga ang pagserbisyo sa Ginoo mas importante. Dihang gibunyagan siya, misaad siya nga mobuhat sa bisan unsay Iyang ihangyo kaniya.
“Oo,” miingon siya. Ang iyang bana miyango. “Moserbisyo mi.”
Pipila ka semana human si Michelle ug John misugod sa ilang misyon, usa ka rocket nga nagdala sa rover sa Mars nga gipalupad. Si Michelle wala makatan-aw niini. Naghimo siya sa laing importante nga mga butang. Nagpaambit siya sa ebanghelyo ug nagtabang sa mga misyonaryo sa ilang misyon. Matag adlaw, magsul-ob siya og itom nga name tag nga nag-ingon “Sister Amos,” nga dunay ngalan sa Manluluwas sa ubos.
Human sa pito ka bulan, ang rocket nga nagdala sa rover sa kataposan miabot sa Mars—kapin sa 100 ka milyon ka milyas (160 ka milyon ka kilometros) ang gilay-on. Si Sister Amos gihatagan og pagtugot nga makatan-aw pinaagi sa online sa pag-landing niini. Gidapit niya ang ilang mga misyonaryo nga motan-aw usab.
Gikulbaan si Sister Amos. Siya ug daghan pang uban ang mitrabaho og maayo niini nga proyekto! Ang rover ba molanding nga luwas?
Ug mao gayod! Ang tanan nga misyonaryo miabiba. Dayon si Sister Amos mipaambit sa iyang pagpamatuod. “Si Jesukristo [milalang og mga kalibotan] hangtod sa kahangtoran,” siya miingon. “Siya ang mihimo sa mga bitoon, sa mga planeta, ug sa tibuok uniberso. Gusto Niya nga kita makat-on, motubo, ug mogamit sa atong mga talento alang sa kaayohan.”
Mipahiyom siya. Mapasalamaton siya sa mga paagi sa paggiya sa Dios kaniya sa iyang kinabuhi. Ug mapasalamaton siya nga nahimong usa ka misyonaryo—nga nagpaambit sa Iyang makahingangha nga gugma.
Mga paghulagway pinaagi ni Alyssa Tallent