“Ayaw Gayod og Hunong,” Higala, Abr. 2023, 39.
Kabataan ug Kabatan-onan
Ayaw Gayod og Hunong
Atol sa ting-init nga walay eskwela, mikuha ko og klase sa robotic nga engineering sa high school duol sa among balay. Usa ko sa kinamanghoran sa klase. Sa unang adlaw ang among titser migrupo-grupo namo. Niini nga mga grupo nakat-onan namo unsaon sa paghimo og computer code sa robot. Ang pag-coding magtugot nga kami makaimbento og mga paagi nga ang mga robot makakompleto og lusot sa palibog-libog nga mga dalan. Lisod kaayo ang pagkat-on niadto, ug mikabat og daghang adlaw sa among grupo ang paghimo niini. Sa ubang adlaw, ang mga tawo dili mangeskwela, mao nga ako ra ug laing usa ka tawo ang nagtrabaho sa among proyekto.
Sa kataposang adlaw, ang mga titser mihukom nga maghimo og makalingaw nga dula sa tibuok klase. Ilang gihatagan ang matag grupo og 20 ka pinauga nga noodles ug tag-10 ka marshmallow. Gisultihan mi nila sa paghimo og kinatas-an nga tore. Sa akong grupo duha ra mi ang mitunga nianang adlawa, mao nga ang usa ka sakop gikan sa laing grupo mitipon aron motabang namo.
Paghulagway ni Macky Pamintuan
Gitrabaho namo ang tore sulod sa taas nga panahon ug gihimo ang kinamaayohan nga among mahimo. Ang tore nga among nahimo ingon og may pagkalapad ra ug dili kaayo taas. Mibati mi nga unta kami nakahimo og mas maayo pa. Ang akong mga kagrupo gusto nang mohunong, apan miingon ko, “Dili ta mohunong.” Among gikuha ang tanang piraso sa noodle gikan sa kilid ug gipamutang kini sa ibabaw. Sa hinay-hinay, nagkataas ang among tore!
Tungod kay wala mi mohunong, nakatabla mi sa laing grupo sa unang dapit. Akong nakat-onan nga bisan unsa kalisod buhaton ang mga butang, dili gyod kita angay nga mohunong!