Kumusta gikan sa Nigeria!

Kat-oni ang mahitungod sa mga anak sa Langitnong Amahan sa tibuok kalibotan.

Usa ka litrato sa Africa nga nagtutok sa Nigeria

Ang Nigeria usa ka nasod sa Kasadpang Africa. Mga 216 ka milyon nga tawo ang nagpuyo didto.

Daghang Kultura

Pundok sa mga tawo gikan sa Nigeria

Mga paghulagway pinaagi ni Valeria Cis

Ang Nigeria mas daghan og tawo kay sa ubang nasod sa Africa. Kini adunay daghang managlahing pundok sa mga tawo, nga adunay kapin sa 500 ka pinulongan!

Maanindot Kaayong mga Ihalas nga Kinabuhi

Usa ka elepante, usa ka buaya, usa ka dako kaayo nga unggoy [baboon]

Ang Nigeria dunay mga disyerto, kapatagan, kalamakan, kabungtoran, ug kalasangan. Ang matag dapit maoy panimalay sa tanang matang sa tanom ug mananap.

Ang Simbahan sa Nigeria

Usa ka lalaki nga nagbunyag og mga tawo

Niadtong mga 1960, wala pay mga misyonaryo sa Nigeria. Apan daghang tawo ang gustong magpabunyag. Nanagsimba na sila ug misulat ngadto sa mga lider sa Simbahan. Nagmapailubon sila sa paghulat. Sa kataposan, niadtong 1978, nabunyagan ra sila! Karon ang Nigeria duna nay kapin sa 200,000 ka mga miyembro sa Simbahan.

Pang-Dominggo nga Kan-on

Usa ka panaksan nga kan-on ug tinula

Daghang Nigerian nga pamilya mangaon og kan-on nga sinagolan og mga lamas, utanon ug karne o puti nga kan-on nga adunay sabaw human sa pagsimba. Usa kini ka Dominggo nga tradisyon!

3 ka Templo

Ang Aba Nigeria temple

Ang Aba Nigeria Temple gipahinungod niadtong 2005, ug duha pa ka templo ang tukuron!

Kalihokan

Ang Bato Naglihok

Kamot nga naggunit og bato

Alang sa pagdula niini, pabaroga nga mag-alirong ang pundok sa mga tawo. Ipapasa ang bato libot sa alirong samtang manganta mo og usa ka awit. Kon ang kanta mahuman, ang tawo nga naggunit sa bato matangtang na sa dula! Padayon lang hangtod nga usa na lang ka tawo ang mahibilin.

Resipe

Mga Pancake sa Nigeria

Patongpatong nga pancake sa usa ka plato

1. Sa usa ka panaksan, isagol ang 1 ka takos nga harina, 1 ka kutsara nga asukar, usa ka puknit nga asin, ug usa ka wisik sa nutmeg.

2. Batila ang 2 ka itlog ug 1 ka tasa nga gatas.

3. Isagol ang tunga sa tasa nga tinagod-tagod nga sibuyas bombay. Kon ganahan ka, mahimo sab nimong dugangan og gamay nga tinagod-tagod nga preskong sili.

4. Inita ang kaha nga may gamay nga mantika. Alang sa matag pancake, pagtakos og gamay niana nga sinagol ngadto sa kaha ug lutoon sa mantika ang isig ka habig.

Salamat kang Unwana sa pagpaambit sa dula ug sa resipe!

Pangpahimsog nga Tabang

Lingawlingaw uban sa mga Higala

Usa ka batang lalaki nga naghimo sa iyang nawong nga makalingaw ug usa ka batang babaye nga nagkatawa

Ang paglingawlingaw kauban sa ubang tawo importante nga bahin sa himsog nga kinabuhi! Kitang tanan nagkinahanglan og panahon sa pagdula ug pagrelaks. Ug nagkinahanglan kita og maayong mga tawo sa atong palibot aron matabangan kita nga mobati nga malipayon ug luwas. Paghangyo og tawo nga makigdula kanimo ug sulayi ang paghimo nila nga mopahiyom!