“Hangtod sa Kahangtoran ug sa Kanunay,” Higala, Abr. 2023, 12–13.

Hangtod sa Kahangtoran ug sa Kanunay

Ni Lori Ries

(Gibase sa usa ka tinuod nga istorya)

“Makita pa ba nako si Rosie pag-usab?” Nangutana si James.

Kini nga istorya nahitabo sa USA.

Inahan, amahan, ug anak nga lalaki nagtan-aw sa usa ka album sa litrato samtang nanglingkod atubangan sa templo

Si James nag-inusarang naglingkod diha sa iyang higdaanan. Ang balay hilom kaayo. Gimingaw siya sa iyang manghod nga babaye, si Rosie. Siya namatay dili pa dugay. Nag-edad lang siya og duha ka semana.

Nakit-an ni James si Mama sa iyang kwarto. Siya mitan-aw sa kuna ni Rosie nga walay sulod. Nakapaguol kini niya.

“Ma,” hinay siyang miingon, “gimingaw gyod ko ni Rosie.”

Mipahiyom si mama, apan siya naguol usab. Gigakos niya si James pag-ayo. “Ako man sab.”

“Makita pa ba nako siya pag-usab?” Nangutana si James.

“Oo,” miingon si Mama. “Ugma damlag kita tanan makakita pag-usab ni Rosie.”

Gisulayan ni James nga ihulagway si Rosie sa iyang hunahuna. Naghunahuna siya sa iyang lumoy nga buhok ug gagmay nga mga kamot. Gipangga niya si Rosie. Nalipay siya nga iya siyang makita pag-usab ugma damlag. Apan sa pagkakaron, siya naguol nga wala na si Rosie.

Pipila ka adlaw ang milabay, panahon na alang sa gabii sa panimalay [home evening]. Usahay si Mama o si Papa magtudlo og usa ka leksiyon. Sa ubang mga panahon nag-uban sila sa paghimo og makaon. Apan karong semanaha miingon si Papa, “Manuroy ta.”

Gikuha ni mama ang dako nga libro, ug misulod sila sa sakyanan. Sa wala madugay si James nakakita og usa ka tanaman nga adunay, rosa [pink], pula ug yellow nga mga tulip. Nakakita siya og usa ka taas, puti nga gambalay nga adunay usa ka bulawan nga estatuwa sa tumoy. Adunay usa ka espesyal nga pagbati niining dapita.

“Nakahibalo ka kon asa kita?” Nangutana si Papa.

“Sa templo!” Miingon si James.

“Sakto ka,” miingon si Mama. “Kami ni Papa nimo ug ako dinhi gikasal.”

Nanganaog sila sa sakyanan ug nanglingkod sa lingkoranan. Giablihan ni Mama ang libro. Si James nakakita og usa ka litrato sa templo. Si Mama ug si Papa diha usab sa litrato. Si Mama nagsul-ob og usa ka taas, puti nga sinina.

“Mura ka og rayna tan-awon,” miingon si James ngadto ni Mama. “Ug ang templo mura og kastilyo tan-awon.”

Mipahiyom si Mama. “Ang templo mas espesyal kaayo kay sa usa ka kastilyo. Tungod sa templo, kita mahimong magkauban sa atong pamilya hangtod sa kahangtoran.”

Mipakli si Mama sa pahina. Mitudlo si James ngadto sa usa ka litrato sa usa ka batang masuso nga lalaki. “Ako ba kana?” nangutana siya.

“Oo,” miingon si Mama. “Kyut kaayo ka nga bata. Malipayon kaayo ko nga kami mahimong makauban nimo hangtod sa kahangtoran.”

Gipakli na usab ni Mama ang pahina. Anaa diha ang litrato ni Rosie.

“Si Rosie usab?” Nangutana si James.

“Si Rosie usab,” miingon si Papa. “Kon panahon na nato nga moadto sa langit, atong makauban pag-usab si Rosie,” miingon si Papa.”

“Hangtod sa kahangtoran?” nangutana si James.

“Sa Kahangtoran ug sa kanunay,” miingon si Mama. Siya mipakli sa kataposang pahina. Nakit-an ni James ang usa ka litrato sa iyang kaugalingon uban ni Papa, ug Mama, ug ni Rosie.

Mitan-aw si James sa templo. Gimingaw siya ni Rosie. Apan nalipay siya nga Ang Langitnong Amahan mihimo og paagi alang sa iyang pamilya nga magkauban hangtod sa kahangtoran.