Ang Dako, Ngil-ad, Dunot nga Text

Ni Chelsea Bagley Dyreng

(Gibase sa usa ka tinuod nga istorya)

“Hala!” Miingon si Zack.

Kini nga istorya nahitabo sa USA.

“Palihog, Rachel!” Nagpakilooy si Zack sa iyang magulang nga babaye. “Palihog lang makigdula namo og kausa na lang!”

“Dili na ko, Zack. Ako adunay homework,” miingon si Rachel. “Tingali ugma na sa gabii.” Migawas siya sa kwarto.

“Ikaw dili na gayod makigdula nako!” Miingon si Zack, og mas kusog nga labaw pa sa iyang pagpasabot.

“Zack,” miingon si Papa, “tugoti siya nga mobuhat sa iyang homework.” Iyang gipasa ang laing piraso sa dula samtang si Zack nanghoyhoy sa iyang lingkoranan. Mura og si Rachel kanunayng magbuhat og homework. Ug sa sunod tuig siya mokolehiyo na! Panagsa nalang gayod siya makakita niya.

“Zack, imo nang turno,” miingon si Mama.

Gipalihok ni Zack ang iyang piraso sa dula ug mihulat sa iyang turno. Mitan-aw siya sa phone ni Mama. Aduna na siyay ideya. Gipunit ni Zack ang iyang phone ug daling gitype ang text.

Hi, Rachel. Ikaw usa ka dako, ngil-ad, dunot nga maldita. Nagmahal, Zack.

Ania. Mingisi si Zack ug gipindot ang send. Milingkod og balik sa iyang lingkoranan. Karon aron modaog sa dula.

Pipila ka turno ang milabay, ang phone ni Mama mibagting. Mibasa dayon siya sa screen.

“Um, Zack?” miingon siya. “Murag para ni nimo.”

Mipahiyom si Zack. Naghunahuna siya kon unsa kaha ang tubag ni Rachel. Gikuha niya ang phone ug gibasa ang text.

Kumusta, Zack. Ikaw usa ka balaan nga anak sa Dios! Nagmahal, Sister Stewart.

Gikulbaan si Zack. “HALA!” mihangos siya. “Hala, hala, hala!”

“Unsa man?” Nangutana si Papa.

Si Zack wala motext sa iyang igsoon nga si Rachel. Iyang gipadala ang text ngadto ni Sister Stewart! Rachel Stewart. Gisultihan niya ang kompanyon ni Mama sa pagpangalagad nga siya usa ka dako, ngil-ad, dunot nga maldita! Gitabonan niya ang iyang nawong sa iyang mga kamot. Gusto siyang mokamang ilalom sa lamesa ug magpabilin didto og gatosan ka tuig. Tingali liboan.

“Unsay nahitabo, Zack?” Nangutana si Mama.

“Nagpadala ko og bastos nga text ngadto ni Sister Stewart imbis ngadto unta ni Rachel. “Wala nako tuyoa!” Daling mitext og usab si Zack ni Sister Stewart.

Pasayloa ko, Sister Stewart. Kadto nga text para to sa akong igsoong babaye.

Nagpamahit si Zack sa iyang ngabil, nga naghulat sa iyang tubag. Masuko kaha siya? Si sister Stewart kanunayng maayo kaayo ngadto sa tanan. Unsaon nalang kon siya nakapasakit sa iyang mga pagbati?

Mibagting ang phone ni Mama.

Zack, Gipasaylo ko ikaw! Nalipay ko nga nakadungog gikan nimo, bisan ang mga pulong murag dili ikaw. Dugay na kong nakaila nimo, ug nasayod ko nga buotan ka nga bata kinsa mohimo og talagsaong butang ugma damlag. Tingali mohimo gani ka og butang nga talagsaon karong gabii!

Nanghupaw si Zack. Mibati gayod siya og mas maayo karon.

“OK ra ba ang tanan?” Nangutana si Mama.

“Tingali,” miingon si Zack.

“Swerte ka kay ang imong gitext si Sister Stewart ug dili ang laing tawo,” miingon is Mama. “Dali siya nga mopasaylo.”

Mitando si Zack. Si Sister Stewart usa ka maayong ehemplo. Ug siya nasayod dili to niya angay gipadala nga text, bisan ngadto sa iyang igsoong babaye. Siya nasayod nga importante ang paggamit sa iyang mga pulong sa mabination nga mga butang, dili makapasakit sa uban.

Miambak siya. “Mobalik ra ko. Aduna koy butang nga kinahanglan isulti ngadto ni Rachel!”

Paghulagway pinaagi ni Mike Laughead