“Na Lulu kei na Tavuto,” iTokani, Me 2023, 8–9.
Na Lulu kei na Tavuto
Ena vukei ira vakacava na tani na droini nei Dieter?
Na italanoa oqo a yaco mai Kenada.
A vinakata o Dieter me vakarorogo ki na koniferedi raraba. A tovolea o koya me dabe toka vakadua. A tovolea me vakarorogo ki na vosa eso. Ia na nona ituvaki vakaleqai vakayago sa dredre kina vua me vakanamata dei tiko. A veimoiyaki ena idabedabe. A qitora na nona ka ni vakatatalo. A veiciciyaki o koya.
A qai rai yani vei Ta. A dabe galugalu toka o Ta ka vakarorogo tiko vei ira na vosa. A vinakata o Dieter me vakataki koya. A mani taura mai na nona iyaya ni droini. E rairai na rokarokataki iyaloyalo ena vukei koya me dabe vakamalua.
Ni rokarokataki tiko, a vakarorogo voli o Dieter vei Elder Jeffrey R. Holland ni vosa tiko. A talanoataka o Elder Holland e dua na italanoa kei Jisu. A kerea o Jisu vua e dua na cauravou vutuniyau me solia taucoko na nona ilavo vei ira na dravudravua.*
A vinakata talega o Dieter me vukei ira na tamata e sega ni veirauti tu na nodra ilavo. A qai votu mai vua e dua na vakasama.
“Na, au via rokataka e dua na lulu,” a kaya o Dieter. “E rawa beka ni o droinitaka e dua vei au?”
“Donu,” a kaya o Ná. A droinitaka sara o koya e dua na lulu.
A tonia sara o Dieter na nona barasi ena iboro. A boroya e liu o koya na taba ni lulu. A cakava eso na vutina me dravu ka so na vutina me dromodromo katabuto. Ni boroya tiko, a vakarorogo voli ki na vosa tale eso. Ena gauna mada ga sa oti kina na vosa kece, a se cakacaka tikoga o Dieter. A vinakata o koya me vinaka sara na lulu.
E muri sa qai cakava vakaoti o Dieter. A vakaraitaka yani na lulu vei Na.
“Sa rairai totoka dina!” A kaya o Na. “E dodonu beka me tou vakaliliga?”
A kurea na uluna o Dieter ena sega. “Au vinakata meu volitaka ka solia na ilavo meu vukei ira na tamata e sega na nodra ilavo. Me vaka era a vunautaka ena koniferedi.”
A matadredre o Na. “Tou raica mada na cava e rawa ni caka.”
A tabaka o koya e dua na iyaloyalo ni droini nei Dieter me volitaka ena initaneti. A vola o Na ni na solia o Dieter na ilavo ki na nodra ivakaruru na tamata sega tu na nodra vale.
Ena siga ka tarava, rau a vakamuria sara o Dieter kei Na ena initaneti. A sega ni vakabauta rawa o Dieter! E vuqa na tamata era vinakata me volia na nona iyaloyalo. A marau o koya ni vuqa na tamata era via veivuke.
E dua na valenikana ena nona koro levu a kerea me volia na droini. A kaya ni na sauma vaka 10 cake mai na kena rau a kerea o Dieter kei nona Na! Eso tale na sitoa era kerei koya talega me baleta na droini. Sa levu cake na cakacaka me cakava o Dieter!
A droinitaka o Na eso tale na manumanu, ka taura mai o Dieter na nona iboro. A boroya e dua na wolifa, dua na laione, kei na dua na tavuto. A taleitaka vakalevu duadua o koya na tavuto. A vakatoka o koya me o “Otis na Tavuto.” A mani volia e dua na sitoa volekata nona vale. Ena gauna ka tarava a gole kina o Dieter ki na sitoa, a raica sara ni sa vakaliligi tu e lalaga!
“Raica, Na!” A dusia yani o Dieter na droini.
“Sa dina!” A kaya o Na. “Ia oqo e veigauna kecega tou lako mai kina eke, tou na daunanuma na sala a vukei ira kina na tamata na nomu taledi.”
A marautaka o Dieter ni ra taleitaka na tamata na nona droini. Ia a marau vakalevu cake o koya ni rawa ni vukei ira na tani. A marau o koya ni a vakarorogo ena gauna ni koniferedi raraba.
Droini mai vei Natalie Campbell