“Masu nei Rosi,” iTokani, Me 2023, 14–15.
Masu nei Rosi
Sa oca mai o Rosi na vakila tiko nona sega ni dau ciqomi.
Na italanoa oqo a yaco e Amerika.
A botolaka yani na nona katodreketi ki na vuloa o Rosi. Se qai oti ga na ikarua ni nona siga ena nona kalasi vou. Ka a sega ni dua na siga vinaka.
“Na cava e leqa?” A taroga o Na.
A davo sobu ena idabedabe o Rosi. “Eso na gone ena noqu kalasi era vosa vakacacani au,” e kaya o koya. “Me baleta na roka ni yagoqu.”
E sega ni vuqa na tamata e koronivuli e roka vata na yagodra kei Rosi, ka vakila o koya ni sega ni ciqomi. Ia na veivakanini a vakararawataki koya vakaduanadrau sara.
A lomaleqa o Na. “Vosoti au,” a kaya o koya. A mokoti Rosi o koya. “Au na vosa vei nomu qasenivuli me baleta na ka oqo.”
Ia ena siga ka tarava e koronivuli, a vakatanini tale o Rosi. E dua na gonetagane ena nona kalasi a vakalialiai koya ena siga taucoko.
A sa yalo rarawa o Rosi. Ia a cudru talega o koya. Ena so na gauna ni viavialevu vua o koya, a sauma lesu o Rosi. Ia a sega ni vakayalovinakataki koya.
Ena dua na siga ni yaco i vale o Rosi mai koronivuli, a cici vakadodonu ki na nona rumu. Sa oca sara o koya na vakalialiai. Sa oca sara o koya ni vakila ni sega ni ciqomi. A ubia na matana ena nona ilokoloko ka tagi.
Cava beka meu na cakava? a vakasamataka o koya. A sega ni vinakata o koya me vaka tiko oqo ena vo ni yabaki ni vuli.
A qusia na matana o Rosi. A qai raica cake o koya na ivakatakarakara lailai kei Jisu ka toka ena nona vata ni ivola. A solia o Na vei Rosi me vukei koya me dau nanumi Jisu.
E rairai dodonu beka meu masu, a nanuma o koya. A tekiduru ka lobika na ligana.
“Tamaqu Vakalomalagi lomani, e sa rui mosi vakalevu na lomaqu. Era vakalialiai au na noqu lewe ni kalasi ena vuku ni roka ni yagoqu, ka sa vakararawataki au. Yalovinaka ni vukei au.”
A veivakalomavinakataki ni tukuna vua na Tamada Vakalomalagi na veika e vakila. A kila o koya ni a vakarorogo tiko o Koya. A vakila o koya na vakacegu kei na loloma, me vaka ga e ovici wavoliti koya tu e dua na itutuvi malumu. A vakila o koya ni totoka na roka ni yagona. O koya e dua na luve ni Kalou, ka lomani tu mai Vua.
Ni tinia na nona masu o Rosi, a yaco vua e dua na vakasama. E rairai levu beka na ka e rawa ni cakava o koya me veivuke kina ena nona koronivuli.
Ena macawa ka tarava, erau a vosa o Rosi kei na tinana vei ira na veiliutaki e koronivuli me baleta na veika a yaco tiko ena nona rumu ni kalasi. A vakaqarai ira na vo ni gone e koronivuli o Rosi ka ra dau vakasaurarataki ka yaco me veitokani vata kei ira. A saga o koya me kua ni kauwaitaka na gonetagane ka a vakalialiai koya. Ena lotu ena Sigatabu, a wasea kina na nona ivakadinadina ni lomani ira kece na tamata na Tamada Vakalomalagi.
Na veika e koronivuli a sega ni vinaka cake vakatotolo. Ia ni sotava na dredre, e dau nanuma o Rosi na veika a vakila ena nona masu. E luve ni Kalou o koya, ka sa lomani tu. Ka baleta ni kila o koya oya, ni sa rawa vua me cakava e dua ga na ka.
Droini mai vei Shawna J. C. Tenney