“Na Dolavi Raraba ni Valetabu,” iTokani, Me 2023, 16–17.
Na Dolavi Raraba ni Valetabu
Sa marau sara o Svetan me curu ki loma ni valetabu!
Na italanoa oqo a yaco e Amerika.
A marau o Svetan. Eratou a toki tiko na nona matavuvale mai Argentina ki Amerika. Sa qai yaco na kena gauna me vodoki yani na waqavuka levu!
A rai yani ki katubaleka o Svetan ni sa vuka cake na waqavuka. A vakananuma o koya se na vakacava tu beka na nona itikotiko vou. Ena duidui na ka kecega. Dua na vale vou. Dua na rumunimoce vou. E dua na yasa ni koro vou. Kei ira na itokani vou me ra sota! A marau sara o Svetan.
A kila talega o Svetan ni nona itikotiko vou e voleka sara ki na dua na valetabu se qai tara oti toka ga. Mai Argentina, a yawa sara na valetabu. A dau raica wale tu ga o koya ena iyaloyalo.
A vuki yani o Svetan vei Na. “O kila beka ni tou na rawa ni raica na valetabu mai lomalagi?”
A matadredredre o Na. “Au sega ni nanuma ni vakakina. Ia tou na raica ena dua na gauna lekaleka mai oqo.”
A matadredredre lesu o Svetan. Erau a kaya o Na kei Ta ni se bera ni dola na valetabu. Ia ena dua ga na gauna lekaleka mai qo sa na dolavi raraba kina. Oqori e kena ibalebale me ra curu ki loma na tamata me ra raica ni bera ni vakatabui. Ka ratou sa na gole tiko ki na vale dolavi raraba na matavuvale nei Svetan! A sega ni rawa ni wawa o koya me raica dina na valetabu.
Ni oti e vica na auwa, eratou sa tu ena nodratou vale vou o Svetan kei na nona matavuvale. E a levu tu na ka me caka. A veivuke o Svetan me talaca na nodratou kato eso ka tuvalaka vinaka na nodratou itikotiko.
Ena siga ni bera na dolavi raraba, eratou dabe sobu ena rumu levu me ratou veivosaki.
“Na valetabu sa vale ni Turaga,” a kaya o Na. “Ni da sa tiko e loma, sa dodonu me da dau vakarokoroko. O kila na kena ibalebale o ya?”
“Meda veivosaki vakamalua me rawa ni da rogoca vakavinaka cake na Yalo Tabu?” A taroga o Svetan.
“Sa donu vinaka,” a kaya o Na. “E rawa ni da vuli vakalevu ni da tiko ena valetabu.”
A deguvacu o Svetan. E vinakata o koya me dau vakarokoroko me rawa ni vakila na Yalo Tabu ena valetabu.
Ena mataka ka tarava, a yadra vakamataka lailai o Svetan. A vakaisulu sara ena nona isulu ni Sigatabu. Sa kena gauna sara me ratou sa gole yani.
Eratou yaco yani ki na valetabu na matavuvale nei Svetan. Era vukei ratou na tamata me daramaka na iubi palasitika lalai ena nodratou ivava.
“Na cava na vuna era biuta kina na taga lalai oqo e yavaqu, Na?” A taroga o Svetan.
“Baleta e loma ni valetabu na veika kece e se vou ka savasava. Eda vinakata me taqomaka.”
A kidavaki iratou mai e dua na marama. A wilika o koya na vosa ena katuba ni valetabu: “Tabu me Nona na Turaga—na Vale ni Turaga.”
A taura na ligai Na o Svetan. E ratou a gole yani ki loma. A totoka sara na ka kecega! E rairai vaka tu beka oqo o lomalagi.
“Raica!” A vakasolokakana o Svetan. A dusia yani o koya e dua na droini. “Sai Jisu oya!”
Ni ratou sa vakacavara, a vakila o Svetan na marau. A vakavinavinaka o koya ni rawa ni curu ki loma ni valetabu. A vinakata me curu tale i loma ni sa qase cake o koya.
Droini mai vei Mark Robison