“Cameron na Dautaba Piano,” iTokani, Me 2023, 40–41.
Cameron na Dautaba Piano
A sega ni kila tu o Cameron na vakatagitaka, ia a vinakata me veivuke.
Na italanoa oqo a yaco e Amerika.
“Au luve ni Kalou,” a lagasere o Cameron vata kei ira na gone tale eso ena Lalai. A dau dredre na nona rogoca o Cameron, ia e dau taleitaka me lagasere. Sega ni dede era sa dau lagasere tiko ena parokaramu ni Lalai. A sa vo ga e dua na vula!
Ni oti na gauna ni lagasere, a kacivaka o Sisita Jones e dua na itukutuku. “Sa na toki tiko na noda dautaba piano ni Lalai. Keitou na taleitaka me so vei kemuni me taba piano ena parokaramu ni Lalai. E dua beka vei kemuni e vinakata me vakatagitaka e dua na sere se rua?”
A laveta na ligana o Cameron. A vinakata o koya me veivuke ena parokaramu.
E vola sara o Sisita Jones na yacadra na gone era vinakata me ra veivuke. “Emma. Ben. Kei Cameron! Au sega ni kila ni o rawa ni taba piano.” A matadredredre mai o koya.
Se bera vakadua ni bau tauri lesoni e liu o Cameron, ia a taleitaka me dau bulia na sere eso ena piano ena vale nei buna.
“Au sega ni se vinaka sara,” a kaya o koya. “Ia au nanuma niu rawa ni cakava kevaka au vakatovotovo!”
“Vinaka vakalevu na lomasoli mo veiqaravi,” a kaya o Sisita Jones. A solia vei ira yadua na gone e rua na sere me ra vakatagitaka.
A via cici sobu sara ga ena olo o Cameron. A dau vinakata tu ga o koya me vulica, ia oqo sa na yaco dina!
“O sa rairai mamarau dina! A yaco beka e dua na ka ena Lalai?” A taroga o Na ni rau yaco yani ki na motoka ni oti na lotu.
A sigege mai o Cameron. “Au na vakatagitaka na piano ena parokaramu ni Lalai!”
“Au taleitaka ni o via veivuke,” a kaya o Na. “Ia o sega ni kila vakavinaka sara na taba piano mo rawa ni cakava oqori.”
A dabe vakadodonu cake o Cameron. “Au rawa ni vuli. Au na vakatovotovotaka ena kena kaukauwa sara! Au rawa ni vakayagataka na piano nei Bubu.”
“Ia, me daru sa tekivu sara yani!” A kaya o Na.
A vukei Cameron o Na me kunea e dua na qasenivuli ni piano. A vakaraitaka vua o qasenivuli na sala rawarawa me vakatagitaka kina na “Raica na Valetabu” kei na “Au Lewe ni Lotu i Jisu Karisito.”
A vakatovotovo o Cameron ena vale nei Bubu ena kena levu ga e rawata. A vakatovotovotaka na qaqa ni sere yadua ena veigauna. A cakava e levu na cala, ia a tovolea tikoga ka vakatagitaka tikoga. Emuri sa qai rawa ni vakatagitaka ruarua o koya na sere.
Sega ni dede sa gauna ni parokaramu ni Lalai. “Na cava o bau vakila?” A taroga mai o Na.
A mokota sara o Cameron na nona ivola ni piano volekata na serena. “Rere. Ia nanamaki talega.”
Ni yaco mai nona gauna me taba piano, a ninini vakalailai na ligai Cameron. Tamaqu Vakalomalagi, yalovinaka ni vukei au, a masu o koya ena nona vakasama. A mai taura yani o koya e dua na icegu levu. A qai taba piano yani ena kena vinaka duadua e rawata. Era a lagasere na vo ni gone.
Ni sa tini na sere, a matadredredre o koya. A ka marautaki oya! A kila o koya ni sa vukei koya tiko na Yalo Tabu.
Ia oqo ni sa vakatagitaka oti e dua na sere, sa yalodei sara o Cameron. A tekivuna o koya na ikarua ni sere. A toso kosova na itabataba na ligana me vaka ga a vakatovotovotaka tu mai o koya.
Na sere oqo a dau taleitaka sara o Cameron. E vakasamataka o koya na veimalanivosa ni vakatagitaka tiko. “Vakabauti Jisu Karisito. Meu taqomaka. A cakacaka vakaukauwa o Cameron me vulica na sere me baleta na parokaramu.
E rairai na taba piano e dua na sala ni wasei ni noqu ivakadinadina, a vakasamataka o Cameron.
Ni oti na parokaramu, a mokoti Cameron vakaukauwa o Na.
“A vakacava oya?” a taroga o koya.
“Au a rere taumada, ia a ka marautaki!” A kaya o Cameron. E vinakata o koya me vakatovotovo tikoga ka vulica e levu tale na sere.
Droini mai vei Adam Koford