“iTokani vaka-Origami,” iTokani, Me 2023, 30–31.
iTokani vaka-Origami
Eratou na rawa beka vakacava ni vukei Mrs. Franklin o Ari kei rau na nona itokani?
Na italanoa oqo a yaco e Amerika.
“Gauna ni vakacagicagi!” A kacivaka mai na qasenivuli nei Ari.
Era yatuni yani na lewe ni kalasi nei Ari me ra lako i tautuba ki na rara ni qito. Ia o Ari kei rau na nona itokani eratou dau lako ga ki na valenivola. Eratou dau taleitaka me dinautaki ivola ka caka cakacaka ni liga vata.
Rau a wawa rawa tu e katuba o Kristin kei Ella. A dreta mai na nona ivola o Ari kei na dua na binibini pepa. A qai liutaki ratou sobu yani ena olo.
“Au nuitaka ni sa vakalesui mai Na Veikavuni ni Dauvakatawa Drekoni!” A kaya o Ari. “Sa vakamacawa qo na noqu vinakata voli meu dinautaka.”
Ni ratou yaco ki na valenivola, erau a yaloyalo sara yani vei Mrs. Franklin, na daunivola ni koronivuli. A dau kidavaki ratou o koya ena matadredredre serau. Ia nikua a sega soti ni serau na nona matadredredre.
A mataruburubu o Ari ni biuta sobu na nona ivola ena dua na teveli. “E vaka beka me rarawa voli o Mrs. Franklin vei kemudou?”
A yavalata na tabana o Kristin. “E rairai osooso beka ga o koya.”
“Io beka.” A dabe sobu o Ari ka dreta mai e dua na tiki ni pepa. A lobika vakavinaka sara, ka vakayagoyagovinakataka na kena ilobi ena nona idovidovi ni kakana.
“Na cava me datou cakava tiko nikua?” A taroga o Ella.
“Vakacava na ivakatakilakila ni ivola?” A kaya o Ari. “E rawarawa sara. Au na vakaraitaka vei kemudrau.”
A sa dau vulica voli o Ari na icakacaka ni origami. Oqori e dua na cakacaka ni liga mai Japani, e dau caka ena kena dau lobiki na pepa ki na ibulibuli duidui eso. A kila tu o Ari na icakacaka ni veimataqali ibulibuli kecega, ka vakavulici rau nona itokani ena veika sa kila tu.
A vakaraitaka o Ari vei Kristin kei Ella na icakacaka ni ilobi yadua. Sega ni dede eratou sa yadua tu na ivakatakilakila lalai ni ivola.
“E vakaoqo na kena icakacaka ena tutuna.” A dolava o Ari na nona ivola ka daramaka na ivakatakilakila ni ivola ena tutu ni dua na draunipepa.
“Totoka!” A taura o Kristin e dua tale na pepa. “Au vinakata meu tovolea ga vakataki au.”
Ni ratou cakacaka tiko, eratou veitalanoataka na ivola eratou sa wilika oti kei na kena eratou via wilika tarava. A rai tale yani o Ari vei Mrs. Franklin. A vaka me se rairai rarawa vakalailai tu ga o koya.
Sega ni dede a mai duri tu o Mrs. Franklin ena nodratou teveli.
“Dou bula, na goneyalewa.” A biuta sara o koya e dua na ivola ena teveli. O ya na ivola Na veikavuni ni dauvakatawa drekoni! “Oqo me soli vei iko, Ari. Au kila ni o sa waraka tiko mo wilika.”
“Vinaka vakalevu!” A taura cake sara o Ari.
A mai cegulevu yani o Mrs. Franklin. “E dua a butakoca na noqu motoka nikua. A taura taucoko na noqu ivola kei na sereivakatagi.”
“Sa dua na ka ca!” A kaya o Kristin.
A solia mai e dua na matararawa o Mrs. Franklin. “Ia, era sa ka wale ga. E rawa ni ra sosomitaki. Au marau ni sega ni dua a mavoa.”
A vakaraici Mrs. Franklin o Ari ni sa lako yani.
“Au diva me rawa ni tou cakava e dua na ka me veivuke,” a kaya o Ella.
A raica sobu o Ari na ivakatakilakila ni ivola ni origami e ligana. “Edatou na rawa beka!”
“Me vakataka na cava?” A taroga o Kristin.
A matadredredre yani o Ari. “Drau qai lako mai ki na noqu vale ni oti na vuli. E dua na noqu vakasama.”
Ena siga ka tarava, eratou a gole ki na valenivola o Ari, Kristin, kei Ella ena gauna ni vakacagicagi, me vaka ga eratou dau vakayacora. Ia ena gauna oqo, eratou a sega walega ni kauta mai na ivola. Eratou a kauta mai e dua na ka talei vei Mrs. Franklin.
“Keitou a cakava oqo me baleti kemuni!” A mai solia yani o Ari vei Mrs. Franklin e dua na taga. “Keitou kila ni keitou na sega ni sosomitaka rawa na veika kece a butakoci, ia keitou nanuma ni veika oqo ena rawa ni vakamarautaki iko.”
A rai yani ki loma ni taga o Mrs. Franklin. A sinai tu ena origami—ivakatakilakila ni ivola, ika, uto, bebe. A matadredredre sara vakalevu o koya.
“Oqo sa veivakurabuitaki! Vinaka vakalevu sara.” A dreta mai o koya e dua na tiki ni origami mai na taga. A lobiki tu me cakava e dua na ivolalailai. “Au na vakayagataka na ivolaniveisiga lailai oqo meu vola kece kina na noqu vakanananu mamarau lalai eso!”
A matadredredre lesu o Ari. E rawa ni dau cakava e veigauna o koya e dua na ka vinaka vei ira na tani—dua na ilobi pepa ena dua na gauna.
Droini mai vei Brian Martin