“Cakamana ni Valetabu i Jimena,” iTokani, Me 2023, 36–37.
Cakamana ni Valetabu i Jimena
E a taqaya o Jimena. Ia a kila o koya ni na vukei koya na Turaga.
Na italanoa oqo a yaco e Guatemala.
A vodo yani ki na motoka o Jimena ka daramaka na nona beleti ni idabedabe. O koya kei rau na nona itubutubu a gole tiko ki na valetabu. Oqo na imatai ni gauna me vakayacora kina o koya na papitaiso ena valetabu. Ena laki papitaisotaki koya o Ta ena vukudra eso na nodratou qase e liu. A sega ni rawa ni qai wawa o Jimena!
Ia a qai vakasamataka o Jimena e dua na ka a vakavuna me vakila na taqaya e loma. “Ta,” a kaya o koya, “vakacava na noqu pamu?”
E tauvi matenisuka tiko o Jimena ena kena mataqali na type 1. Me rawa ni tiko bulabula kina, e dau dara tu ga o koya e dua na misini lailai ka vakatokai na pamu ni insulini me vukea na lewai ni suka ena nona dra. Kevaka sa rui balavu na nona lako ka sega ni daramaka, a dau tauvimate o koya.
“Era na vakatara beka meu daramaka ena loma ni valetabu?” A taroga o Jimena. E a tavatukituki na nona uto. “Vakacava na gauna au na lako kina i wai?”
“Ena daumaka,” a kaya o Ta. “E rawa ni o daramaka na nomu pamu me yacova ni ko sa lako i wai. Sa na qai rawa ni vukei iko o Ná mo biuta lesu ena gauna ga o cabe tani mai kina.”
A deguvacu o Na. “Ka kevaka o sa tekivu vakila na tauvimate ni o papitaisotaki tiko, tukuna ga vei Ta ka rawa ni o cegu sara.” A boboka yani na ligana o Na. “Keirau na tiko vata kei iko ena gauna kece oya.”
“Sa donu,” a kaya o Jimena. A se lomaleqa tikoga o koya. Ia o Ná kei Ta a vukei koya me vakila ni sa vinaka cake vakalailai.
Ni ratou yaco yani, a taura o Jimena na ligai Na kei Ta ni ratou gole yani ki na katuba ni valetabu. Ena gauna ga a kalawa yani kina ki loma, a vakila o Jimena e dua na yalo vinaka, ka veivakacegui. A kila o koya ni tukuna tiko vua na Yalo Tabu ni na vukei koya na Tamada Vakalomalagi, dina ga ni lomaleqa voli. Ena vinaka na veika kece, me vaka ga a kaya o Ta.
A veisau sara o Jimena ki na isulu vulavula. Sa qai vukei Jimena o Na me luvata na nona pamu. “Ena taura e vica walega na miniti,” a kaya o Ná. A mokoti Jimena yani o koya.
A siro yani ki loma ni wai o Jimena. A waraki koya tu mai o Ta. A dodoka mai na ligana ka vukei koya me siro yani ena ikabakaba.
A cavuta o Ta na masu ni papitaiso ka tabadromuci Jimena e wai. Ni lamata cake mai, a matadredredre o Jimena. A qai papitaiso tale vakavica.
“O vinaka tiko?” A vakasolokakana yani e daligana o Ta.
“Io!” a kaya o Jimena.
A papitaisotaki koya o Ta me baleta e vica tale na tamata. “E rawa beka ni o cakava tale eso?” a taroga tale.
“Io!” a kaya o Jimena.
Ni cava na iotioti ni papitaiso, a vukei Jimena o Na me tokara na nona pamu ka dikeva sara na suka ni nona dra o Jimena. A matadredredre o Na. E a tu vakavinaka! A vaka ga ni a sega ni luvata tani o Jimena na nona pamu.
Tarava ya ratou a gole yani ki na dua na rumu lailai. A biuta na ligana o Ta ena ului Jimena. A vakadeitaki koya me lewena Na Lotu i Jisu Karisito ni Yalododonu Edaidai me baleti ira na tamata era sa mate ka a papitaisotaki taumada kina o koya ena vukudra. Qo era sa qai rawa ni digitaka na tubuna me lewena na Lotu i Jisu Karisito!
Ena lotu vakamatavuvale ena macawa ka tarava, eratou a veitalanoataka o Jimena kei rau na nona itubutubu na nodratou ilakolako ki na valetabu. “Na valetabu e vale ni Turaga,” a kaya o Ta. “Ni da sa lako kina, sa rawa ni yaco na cakamana ena noda bula.”
“Na mataqali cakamana vakacava?” a taroga na taci Jimena lailai, o Pablo.
“Au a ririko meu luvata tani na noqu pamu ni insulini meu lako i wai,” a kaya o Jimena. “Ia niu papitaisotaki tiko, au sega mada ga ni vakila na tauvimate. O ya a dua na cakamana levu!” A matadredredre o Jimena. “E dina ga niu a rere, a vukei au na Yalo Tabu meu vakila na vakacegu. Oqori talega a dua na cakamana.”
Droini mai vei Alyssa Petersen