“Luvuci ena Loloma,” iTokani, Me 2023, 26–27.
Luvuci ena Loloma
“E rawa beka ni daru vukei iratou talega na matavuvale nei Jose?” A taroga o Marius.
Na italanoa oqo a yaco ena Yatu Filipaini.
Ni lako cake yani o Marius ki na nona vale, a rogoci ira rawa na tamata ni ra vosavosa tiko e loma. A vakairoiro yani o koya ena katubaleka.
O cei beka e tiko qo, e vakasamataka o koya. A vakaitikotiko o tinana ena dua tale na vanua me baleta na cakacaka, ka vakavuqa sai koya ga kei Lola (Bubu) erau tiko e vale.
A dolava yani o koya na katuba. Era tiko kece e kea na nona itokani!
“Surprise!” era a kaya mai.
“Keitou via mai marautaka kei iko na nomu metali o rawata ena nomu veisisivi taekwondo,” e kaya o Jose, na itokani vinaka duadua nei Marius.
“Au sa rui cibitaki iko dina.” A boboki Marius o Lola ni mokoti koya vakaukauwa. “O tinamu sa wawa tiko ena talevoni! Au kila ni na via rogoca taucoko o koya me baleta na nomu metali.”
Ni vosa oti o Marius vei Na, a marautaka sara na pati o koya kei ratou na nona itokani. Eratou a marautaka na veivosaki kei na kakana totoka nei Lola.
“O via lai vaqiqi polo vata kei au ni mataka?” A taroga mai o Jose ni bera ni biubiu.
“Io!” A kaya yani o Marius.
Ena bogi oya ni bera ni moce, a cabora o Marius e dua na masu. “Tamaqu Vakalomalagi, vinaka vakalevu na nomuni solia vei au na itokani kei na matavuvale cecere vakaoqo. Yalovinaka ni vakalougatataki tinaqu ni sa tu yawa sara. Ka yalovinaka ni vakalougatataki au meu marautaka na vaqiqi polo kei Jose ni mataka.”
Ia ena siga ka tarava, a sega ni lako rawa i vaqiqi polo o Marius. A yaco mai e dua na cava levu, ka ra tiko vakadua ga kina e vale na tamata kecega. A dabe toka e vale o Marius, ka vakarogoca na uca ni bisa tiko na dela ni vale. A diva o koya me raici Jose.
E tolu sara ga na siga, a tau tu ga kina na uca. A luvuci ena wai na veigaunisala. Eso na vale ena itikotiko nei Marius a luvuci talega.
E muri a qai kunei Lola o Marius ena valenikuro. A vakasaqara tiko o koya e dua na ka a boi vinaka sara.
“Na cava o vakasaqara tiko?” a taroga o koya.
“Au vakasaqa kakana tiko me baleta eso na matavuvale ena nodatou tabanalevu,” a kaya o koya. “Sa luvu na nodratou veivale, ka kerei au o bisopi meu veivuke.”
A vakasamataki Jose sara o Marius. “E rawa beka ni daru vakasaqa me baleta na matavuvale nei Jose? Eratou na rairai gadreva talega na veivuke.”
“Oqori sa dua na vakasama cecere,” a kaya o Lola.
A vakasaqara o Marius eso na raisi ka tavuteketaka na yaloka me baleti Jose kei na nona matavuvale. A qai vukei Lola me vakatawana na kakana.
Sa qai mudu na uca. Rau a vutona yani o Marius kei Lola na gaunisala me rau veisoliyaka na kakana. Na wai a yaco e durui Marius!
Erau kunei Jose kei na nona matavuvale ni ratou tucake tu ena taudaku ni nodratou vale. A tagi tu o Jose.
A mokoti nona itokani o Marius. “Au sa loloma ni luvu na nomudou vale,” a kaya o koya. “E lomani iko o Jisu Ka o keirau talega.”
Rau a veivuke vata o Marius kei Jose ena vakasavasavataki ni de ni waluvu ena vale nei Jose. A lagata voli o Marius na “Au Luve ni Kalou” ni rau cakacaka tiko. Ni rau cegu vakalailai, a solia o Marius vei Jose na kakana a cakava me baleti koya.
“Vinaka vakalevu na vukea noqu matavuvale,” a kaya o Jose. “Ka vinaka vakalevu na kakana! E kana vinaka.”
“Ka marautaki,” a kaya o Marius.
“O nanuma beka ni o rawa ni tukuna vei au eso tale na ka me baleti Jisu? Kei na sere o a lagata tiko?” a taroga mai o Jose.
“Donu!” A kaya yani o Marius. “O na via lako mai ki lotu vata kei au ena Sigatabu? Oqori na vanua au vulica kina me baleti Jisu. Ka rawa ni da lagasere vata talega.”
“Sa donu,” a kaya o Jose.
A vakila o Marius na reki e lomana. A marau o koya ni rawa ni vukei Jose kei na nona matavuvale. Ka sa marau ni rawa talega vua me wasea na kosipeli.
Droini mai vei Jamie Bauza