“Ngaahi ʻEkitivitī ʻo e Haʻu, ʻo Muimui ʻIate Aú ,” Ko e Kaumeʻá, Siulai 2023, 6–7.
Ngaahi ʻEkitivitī ʻo e Haʻu, ʻo Muimui ʻIate Aú
Ki he efiafi ʻi ʻapí pe ako folofolá—pe ke maʻu ai ha fiefia!
Muimui ʻi he Takí
ʻŪ tā fakatātā ʻa Katy Dockrill
Ki he Ngāue 1–5
Talanoa: Hili e pekia ʻa Sīsuú, naʻe ui ʻa Pita ke hoko ko e taki ʻi he Siasi ʻo e ʻEikí. Te ke lava ʻo lau ʻa e talanoa ko ʻení ʻi he peesi 46 pe ʻi he Ngāue 2–3.
Hiva: “Tuʻu ʻi he Totonú” (Tohi Hiva ʻa e Fānaú, 81)
ʻEkitivitī: Fili ha tokotaha ke hoko ko ha taki. ʻAi e takí ke ne fai ha fakatātā (hangē ko e punopuna vaʻe taha pe vilo takai). ʻOku faʻifaʻitaki leva e toengá ki ai. ʻI he taimi ʻoku liliu ai ʻe he takí ʻa e meʻa ʻokú ne fakatātaaʻí, ʻoku faʻifaʻitaki leva e niʻihi kehé ki he fakatātā foʻou ko iá. Taufetongi ʻi he hoko ko ha taki kae ʻoua kuo maʻu ʻe he tokotaha kotoa pē hano faingamālie.
Toe Maʻa
Ki he Ngāue 6–9
Talanoa: Naʻe feinga ha tangata ko Saula hono hingoá, ke fakaʻauha e Siasi ʻo Sīsū Kalaisí. Naʻá ne fakatomala leva ʻo liliu ʻene moʻuí. Naʻá ne hoko ko ha faifekau peá ne akoʻi e kakaí kau kia Sīsū Kalaisi. Naʻá ne toki ʻiloa kimui ko Paula. (Vakai Ngāue 9:1–20.)
Hiva: “ʻOku Moʻui ʻEku Tamaí” (Tohi Hiva ʻa e Fānaú, 8)
ʻEkitivitī: Puke ha kelekele ʻi ho ongo nimá. Ko e hā hoʻo ongo ʻi he taimi ʻoku ʻuli ai ho nimá? Hokó, fufulu ho nimá ʻaki ʻa e koa mo e vai. ʻOku hangē hono fanofano hotau nimá, ko e fakatomalá. Koeʻuhí ko Sīsū, te tau lava ʻo fakatomala pea toe maʻa hili ʻetau faiangahalá.
Tukupā ʻa e Faifekaú
Ki he Ngāue 10–15
Talanoa: Ko Panepasa mo Paulá ko ha ongo faifekau (vakai Ngāue 13:2–4). Naʻá na akoʻi ki he kakaí fekauʻaki mo e Fakamoʻuí. ʻOku akoʻi foki ʻe he kau faifekau ʻo e ʻaho ní ʻa e kakaí ʻo kau kiate Ia.
Hivá: “Talamai ʻa e Ngaahi Talanoa ʻo Sīsū” (Tohi Hiva ʻa e Fānaú, 36)
ʻEkitivitī: Fili ha pole mei he peesi 38–39 ke fakahoko fakataha, hangē ko e tokoni ki ha kaungāʻapi. Te ke hoko fēfē nai ko ha faifekau he taimí ni?
Ko ha Fakatātā ʻo Koe
Ki he Ngāue 16–21
Talanoa: Naʻe akoʻi ʻe he ʻAposetolo ko Paulá, ko e fānau kotoa kitautolu ʻa e ʻOtuá (vakai, Ngāue 17:28–29). ʻOku ʻofa ʻa e Tamai Hēvaní ki Heʻene fānaú kotoa. Kuó Ne foaki mai kiate kitautolu takitaha ha ngaahi meʻafoaki mo ha ngaahi talēniti kehekehe.
Hiva: “Fānau Au ʻa e ʻOtuá” (Tohi Hiva ʻa e Fānaú, 2–3)
ʻEkitivitī: Tā ha fakatātā ʻo koe. ʻI ʻolunga, tohiʻi ʻa e “Ko e Fānau Au ʻa e ʻOtuá.” Tohiʻi pe tā takatakai ʻi he fakatātaá ʻa e ngaahi meʻa ʻokú ke manako ke faí. Te ke fakaʻaongaʻi fēfē hoʻo ngaahi talēnití ke tokoniʻi e niʻihi kehé?