Loto-toʻa mei he Laumālie Māʻoniʻoní.

Fai ʻe Mathias P., taʻu 13, Victoria, Australia

ʻI heʻeku kei siʻí, naʻe talaange ʻe he kau toketaá ki heʻeku ongomātuʻá ʻoku faingataʻa ke u lava ʻo lea. Ko ha faingataʻaʻia mei he loto-tailiilí ʻokú ne ʻai ke faingataʻa ʻeku lea ki he niʻihi kehé. Naʻá ku lava pē ʻo lea ki hoku fāmili ofi tahá.

Naʻá ku ongoʻi hohaʻa he taimi kotoa pē, tautautefito kapau naʻe lea mai ha taha kiate au. Naʻe ʻai maʻu pē ʻe he lotú ke u ongoʻi lelei ange mo nonga. Naʻá ku toe sio foki ki ha faifaleʻi ʻi he akó ki ha tokoni. Ka naʻá ku ongoʻi ʻo hangē naʻe ʻikai ke u toe sai angé. Naʻá ku meimei ongoʻi loto-foʻi, ka naʻá ku kei maʻu pē ʻa e tuí.

Naʻe ʻamanaki ke hokosia hoku taʻu valú. Naʻe fakatukupaaʻi au ʻe heʻeku ongomātuʻá ke u lau e Tohi ʻa Molomoná mo lotu ke tokoniʻi au ke u fili ke papitaiso pe ʻikai. Naʻá ku lotu ʻi he pō kotoa pē ke fehuʻi pe ʻoku totonu nai ke u papitaiso. Naʻá ku maʻu maʻu pē ʻa e tali tatau—ko ha ongo māfana mo nonga ʻi hoku lotó. Naʻá ku ʻiloʻi naʻe talamai ʻe he Laumālie Māʻoniʻoní ko e papitaisó ʻa e fili totonú.

ʻI he taimi naʻe foaki mai ai kiate au ʻa e meʻafoaki ʻo e Laumālie Māʻoniʻoní hili hoku papitaisó, naʻá ku fanongo ki ha ngaahi lea ʻo e ʻamanaki lelei, ʻofa, mo ha fakalotolahi. Naʻá ku ʻiloʻi ʻe fakafiemālieʻi au ʻe he Laumālie Māʻoniʻoní mo ʻomi kiate au ha loto-toʻa.

Naʻá ku fakakaukau ke u lea ki hoku kaungāmeʻa mamae ko Sialé. Naʻá ku feinga ʻi he uiké kakato, ka naʻe fuʻu faingataʻa. Ka ʻi ha ʻaho ʻe taha, naʻá ma toko ua pē mo Siale ʻi he ngoue ʻi ʻapiakó. Naʻá ku fai ha kiʻi lotu nounou ʻi heʻeku fakakaukaú. Tamai Hēvani, kātaki ʻo tokoni mai ke u lea ʻaki ha foʻi lea ʻe taha.

Ne u fakaava leva hoku ngutú peá u pehē, “Hei, Siale!” Naʻá ne fuʻu ʻohovale. Naʻá ku fiefia ʻaupito!

Hili e ʻaho ko iá, naʻe faingofua ange ke fakakakato ha ngaahi taumuʻa lahi ange. Ne ʻikai fuoloa kuó u talanoa ki he tokotaha kotoa pē! ʻOku ou houngaʻia ʻi hono ʻomi ʻe he Laumālie Māʻoniʻoní ʻa e loto-toʻa ke u talanoa kia Siale.