“Ko e Fakamaʻa Ngoué,” Ko e Kaumeʻá, Siulai 2023, 4–5.
Ko e Fakamaʻa Ngoué
“Ko hai te tau fakaafeʻi ke nau tokoni mai kiate kitautolú?”
Naʻe hoko e talanoa ko ʻení ʻi ʻIngilani.
Naʻe kai fakaʻosi ʻe Siona ʻene meʻakaí mo mamali. Naʻe fakafiefia maʻu pē ʻa e maʻu meʻatokoni efiafí ʻi he taimi naʻe haʻu ai ʻa e ongo faifekaú.
Naʻe pehē mai ʻe Sisitā Keala, “ʻOkú ma loto ke vahevahe mo kimoutolu ha pōpoaki fekauʻaki mo e ngāue tokoní. Ko e hā ʻoku mahuʻinga ai e tokoni ki he niʻihi kehé?”
Naʻe pehē ange ʻe he kiʻi tuofefine siʻisiʻi ʻa Siona ko ʻIlaisé, “Koeʻuhí ʻokú ne ʻai ke fiefia ʻa Sīsū!”
Naʻe pehē ange ʻe Sisitā Kulisiteniseni, “ʻOkú ke moʻoni! ʻOkú Ne fiefia lahi ai. Pea ko e taimi ʻoku tau tokoniʻi ai e niʻihi kehé, ʻokú ne ʻai ke tau fiefia ai foki. ʻOkú ke ʻilo nai ha taha ʻoku fiemaʻu tokoni?”
Naʻe fakakaukau ʻa Siona ʻi ha kiʻi miniti siʻi. “ʻOku ʻikai ke u lava ʻo fakakaukau ki ha tokotaha, ka ʻoku ngali fiemaʻu ʻe he ngoue ʻi homau ʻapiakó, ha tokoni.”
Naʻe pehē mai ʻe he Fineʻeikí, “Fakakaukau lelei ia.”
Naʻe ʻi ai ha ngoue ʻi he ʻapiako ʻa Sioná te nau lava ai ʻo fai ha ngaahi ʻekitivitī ʻi tuʻa. Ka naʻe fuoloa mai kuo teʻeki ai ha taha ke ne tokangaʻi ʻa e ngoué. Naʻe tupu ʻafaʻafa ʻa e musié. Naʻe lahi foki mo e vaó.
Naʻe pehē mai ʻe Sisitā Keala, “Te ma fiefia ke tokoni atu ai! Ko hai te tau fakaafeʻi ke nau tokoni mai kiate kitautolu ki hono fakamaʻá?”
Naʻe pehē mai ʻe he tokoua ʻo Siona ko Sēkopé, “Ko hotau kāinga!”
Naʻe pehē ange ʻe Siona, “Mo ʻetau kalasi Palaimelí.”
ʻI he ʻaho hono hokó, naʻe talanoa ʻa Mami ki ha taha ʻi he ʻapiakó ke maʻu ha ngofua. Naʻa nau fili ha ʻaho ke fakamaʻa ʻa e ngoué. Naʻe tokoniʻi leva ʻe Mami ʻa Siona mo hono ngaahi tokouá mo e tuofāfiné ke nau telefoni ki honau kāingá mo e kalasi Palaimelí.
Hili ha ngaahi uike siʻi mei ai, naʻe fetaulaki ʻa Siona mo hono fāmilí mo e ongo faifekaú ʻi he ʻapiakó. Naʻe ʻi ai foki mo honau fanga kāsiní mo e ngaahi kaungāmeʻa Palaimelí. Kuo taimi ke fai e ngāué!
Naʻe tui ʻe Siona ha ongo kofunima ngaahi ngoue lalahi. “Sio mai, Mami. ʻOku lalahi hoku ongo nimá!”
Naʻe kata ʻa Mami. “Te ke lava ʻo ngāue ʻaki e ongo nima lalahi ko iá ke tokoni ki hono tā hifo e ʻakaú.”
Naʻá ne ʻoange kia Siona ha ngaahi helekosi kosi ʻakau ʻa ia ne hangē ha fanga fuʻu helekosi lalahi ʻaupitó. Naʻá ne tokoniʻi leva ia ke ne tuʻusi ʻa e ngaahi vaʻa kuo maté.
Naʻe pehē ange ʻe Siona, “ʻOku fakalata ʻeni.”
Lolotonga e kosi ʻe Siona e ʻakaú, naʻe tokoni ʻa ʻIlaise ke keli takai ʻi he ngoué. Naʻe tokoni ʻa Sēkope kia Teti ke langa ha fale foʻou maʻá e manupuná. Naʻe taʻaki ʻe he toengá ʻa e vaó mo tānaki ha ngaahi vaʻakau. Naʻa nau faʻo ia ʻi ha ʻū milemila pelesitiki lalahi lanu pulū. Naʻa mo e kiʻi tokoua siʻisiʻi taha ʻo Siona ko ʻĒselá, naʻá ne tokoni ʻi hono toʻo hake ʻo e ngaahi foʻi maká.
Naʻe ʻikai fuoloa kuo maʻa ʻa e ngoué. Naʻe lau ʻe Siona ʻa e ʻū milemila kuo nau fakafonú. Naʻá ne pehē mai, “Ko ʻū milemila eni ʻe 13!” “Ko e veve lahi kuo tau fakamaʻá.”
Naʻe malimali ʻa Sisitā Kulisiteniseni. “Taimí ni, te tau fiemaʻu homou sino lahí ke tokoni ki hono fetuku ʻeni ki he kaá.”
Naʻe takitaha toʻo ʻe Siona, Sēkope, mo ʻIlaise ha milemila. Naʻe ongoʻi fiefia ʻa Siona ʻi heʻene hiki hake ʻa e milemila fakaʻosí ki he kaá. Kuo fakafiefia ʻa e tokoni ki he ongo faifekaú. Naʻá ne fie hoko foki ko ha faifekau ʻi ha ʻaho. Kimuʻa aí, naʻe lahi ha ngaahi founga te ne lava ʻo tokoni ai. Naʻe ʻikai ke ne faʻa tatali ke fakakaukau ki heʻene ngāue hokó!
Tā fakatātaa ʻa Samara Hardy