“Taua ʻo e Tuí,” Ko e Kaumeʻá, Siulai 2023, 10–11.
Taua ʻo e Tuí
Naʻe fiemaʻu ʻe Tasaneli ke māʻolunga mo mālohi ʻene tui kia Kalaisí.
Naʻe hoko ʻa e talanoa ko ʻení ʻi Samaika.
Naʻe tokoni ʻa Tasaneli ki hono tuongaʻane lahí ke ʻave ʻa e foʻi mā natí mei he ʻōvaní. Naʻe namu lelei ʻaupito!
Naʻá ne fanongo leva ki ha tukituki ʻi he matapaá. Naʻe ui mai hono tokouá, “Ko e ongo faifekaú eni!”
Naʻe lele ʻa Tasaneli ki he matapaá. Naʻá ne saiʻia ai ʻi he taimi naʻe haʻu ai ʻa e ongo faifekaú. Naʻá ne ongoʻi fiefia maʻu pē ʻi he taimi naʻá na ʻaʻahi ange aí. Ko e taimi ʻe niʻihi naʻa nau ʻomi ha ngaahi vaʻinga maʻana mo hono tokouá mo e tuongaʻané ke nau vaʻinga.
Naʻe pehē ange ʻe Tasaneli, “Naʻe toe ngaahi mā nati ʻa Tailolo maʻatautolu!” Naʻe saiʻia hono tuongaʻané ke ngaohi ha meʻakai maʻá e kau faifekaú.
Naʻe pehē ʻe ʻEletā Kolasi, “ʻOku ʻikai ke u faʻa tatali ke u ʻahiʻahiʻi.” Naʻá ne hū mai mo ʻEletā Iusaki ki loto ʻo tangutu ʻi he falikí. Naʻe tangutu ʻa Tasaneli, mo hono tuongaʻané mo hono tokouá pea mo e fineʻeikí, ʻo fehāngaaki mai kiate kinaua.
Naʻe ʻeke ange ʻe Tasaneli, “Ko e hā ʻetau meʻa ʻe fai ʻi he lēsoni he ʻaho ní?”
Naʻe toʻo hake ʻe ʻEletā Iusaki ha fokotuʻunga ipu. “Te tau langa ha taua ʻo e tuí. ʻOku fakafofongaʻi ʻe he ngaahi ipu takitaha ha meʻa te tau lava ʻo fai ke langa ai ʻetau tuí ʻia Sīsū Kalaisi.”
Naʻe kamata ke fokotuʻutuʻu ʻe ʻEletā Iusaki ʻa e ngaahi ipú ki ha taua. Naʻe fakatokangaʻi ʻe Tasaneli naʻe ʻi ai ha ngaahi foʻi lea naʻe tohiʻi ʻi he ipú hangē ko e “lotú,” “ako folofolá,” mo e “lotú.”
Naʻá ne pehē, “Ko e ngaahi meʻa kotoa ʻeni kuó ke kole mai ke mau fakahoko fakafāmili.”
Naʻe pehē ange ʻe ʻEletā Kolasi, “Ko ia.” “ʻI hoʻomou fai e ngaahi meʻá ni, ʻoku mou fokotuʻu ai homou tuí ʻia Sīsū Kalaisi.”
Naʻe taufetongi ʻa Tasaneli mo hono tokouá mo hono tuongaʻané, ʻi hono langa ʻenau takitaha taua ʻaki e ngaahi ipú, lolotonga ia ʻoku nau fanongo ki he lēsoní.
Hili e mavahe ʻa e ongo faifekaú, naʻe fakakaukau ʻa Tasaneli ki he meʻa naʻá na akoʻí. Naʻá ne fiemaʻu ke māʻolunga mo mālohi ʻene tui kia Kalaisí, ʻo hangē pē ko e taua naʻá ne langá.
ʻI he fakaʻau ke ʻosi atu ʻa e ngaahi māhiná, naʻe ako lahi ange ʻa Tasaneli ki he ongoongoleleí mei he ongo faifekaú. Naʻe kamata ke ne ʻalu mo hono fāmilí ki he lotú. Naʻá ne sioloto atu ki he tupu māʻolunga mo māʻolunga ange ʻene taua ʻo e tuí.
Hili ha ʻaho ʻe taha mei he mavahe ʻa e ongo faifekaú, naʻe talanoa ʻa Tasaneli ki he Fineʻeikí. Naʻá ne fehuʻi ange, “ʻE lava nai ke u papitaiso?”
Naʻe ʻeke ange ʻe Mami, “ʻOkú ke fakapapauʻi ʻokú ke maau?”
Naʻe tali ange ʻe Tasaneli, “ʻIo.” “ʻOku ou fie muimui kia Sīsū.”
Naʻe talaange ʻe Mami, “SAI.” “Kapau ʻokú ke loto ki ai, ʻe lava ke ke papitaiso.”
Naʻe fili foki mo e tuongaʻane mo e tokoua ʻo Tasanelí ke na papitaiso. Naʻe talamai ʻe Mami ʻoku teʻeki ke ne ongoʻi mateuteu ke papitaiso.
ʻI he ʻaho ʻo ʻena papitaisó, naʻe teunga hina ʻa Tasaneli mo hono tokouá mo e tuongaʻané. Naʻa nau takitaha tatali ʻi he faʻa kātaki ke papitaiso.
ʻI he hoko e taimi ʻo Tasanelí, naʻe tokoniʻi ia ʻe ʻEletā Iusaki ki he loto vaí. Naʻá ne fai leva e kiʻi lotu nounou ʻo e papitaisó pea tuku hifo ia ki he loto vaí. ʻI he foki hake ʻa Tasanelí, naʻe ʻikai lava ke tuku ʻene malimalí! Naʻá ne ongoʻi fiefia mo maʻa. Naʻe ʻikai teitei loto ke ngalo ʻiate ia ʻa e ongo ko ʻení.
Naʻe hokohoko atu hono fai ʻe Tasaneli ha ngaahi meʻa ke langaki ai ʻene tui kia Sīsū Kalaisí. Naʻá ne lau folofola mo hono fāmilí. Naʻá ne lotu ki he Tamai Hēvaní. Naʻá ne fai ha ngaahi meʻa lelei maʻá e niʻihi kehé. Pea naʻá ne manatuʻi ʻene ongo ʻi he taimi naʻe papitaiso ai iá. Naʻá ne loto ke maʻu foki ʻe he Fineʻeikí ʻa e ongo ko iá.
“Mami, ko e hā e ʻuhinga ku ʻikai ke ke papitaiso aí?” Ko e fehuʻi ange ia ʻa Tasaneli ʻi ha ʻaho ʻe taha.
Naʻe kiʻi fakalongolongo e Fineʻeikí ʻi ha miniti. Naʻá ne talaange, “Kuó ke tā ha sīpinga lelei kiate au. ʻOku fiemaʻu leva ke u tā sīpinga kiate koe. ʻOku ou loto ke papitaiso mo au foki.”
ʻI he ʻaho papitaiso ʻo Mamí, naʻe fiefia ʻa Tasaneli. ʻI he ʻalu hake ʻa Mami mei he vaí, naʻe malimali ʻa e tokotaha kotoa pē. ʻOku lava leva ʻe he fāmili ʻo Tasanelí ʻo langa fakataha ʻenau ngaahi taua ʻo e tuí.
Ngaahi tā fakatātā ʻa Alyssa Tallent