ʻOku talanoa ʻa Penisimani fekauʻaki mo e Hisitōlia Fakafāmilí

Ko Penisimaní mei Puenosi ʻAealesi, ʻĀsenitina. Naʻa mau ʻeke ange ha ngaahi fehuʻi fekauʻaki mo e hisitōlia fakafāmilí.

Ko e tamasiʻi ʻoku tangutu ʻo kūnima

Naʻe anga fēfē hoʻo kamata fakahoko e hisitōlia fakafāmilí?

Naʻá ku kamata fakahoko e hisitōlia fakafāmilí mo ʻeku tetí. Naʻá ma fakahoko fakataha ia ʻi he Sāpate kotoa pē. Naʻe tokoniʻi au ʻe heʻeku tangataʻeikí ke u ako e founga hono fakaʻaongaʻi ʻo e FamilySearch. Naʻe pau ke u toutou akoako. ʻOku ou fakahoko he taimí ni ʻa e hisitōlia fakafāmilí mo ʻeku tangataʻeikí pe ko hoku kāsini ko Sesiminá.

Ko e tamasiʻi ʻoku tangutu ʻi he komipiutá

Ko e hā e meʻa ʻokú ke saiʻia taha ai fekauʻaki mo e hisitōlia fakafāmilí?

ʻOku ou saiʻia ʻi hono kumi ha kakai foʻou ke tānaki ki heʻeku ʻakau fakafāmilí. ʻUluakí, ʻoku ou maʻu ha ngaahi lekooti motuʻa. Peá u fekumi leva ki he hingoa ʻeku ngaahi kuí. ʻOku ou kumi honau ʻaho fāʻeleʻí mo e feituʻu ne fāʻeleʻi ai kinautolú. ʻOku ou kumi foki mo ha ngaahi feituʻu kehe naʻa nau nofo ai.

Ko e hā kuó ke ʻiloʻi fekauʻaki mo hoʻo ngaahi kuí?

Kuó u ʻilo ai ʻoku ʻi ai ʻeku ngaahi kui mei ʻĪtali mo Siamane. ʻOku ʻi ai e hingoa tatau ʻo ha taha ʻo ʻeku ngaahi kui mei ʻĪtalí mo hoku tokouá! Ko e hingoa hoku tokouá ko “Sanitiako,” ʻa ia ko e “Siakiomo” ia ʻi he faka-ʻĪtalí. Naʻá ku toe ʻilo foki naʻe sipela kehe homau hingoa fakaʻosí kimuʻa.

Tamasiʻi ʻokú ne pukepuke ʻa e foʻi Māmani

ʻOkú ke tokoniʻi fēfē e niʻihi kehé ke nau fai e hisitōlia fakafāmilí?

ʻOku ou tokoni ki heʻeku kui fefiné ke ne fakaʻaongaʻi ʻa e FamilySearch. Naʻá ku akoʻi ia ki he founga ke tānaki atu ai ha ngaahi manatu. Naʻá ku tokoni foki ke ne tānaki atu ha niʻihi ʻoku puli, ki heʻene ʻakau fakafāmilí. Naʻe maʻu ʻe ha niʻihi ʻo hono kāingá ha ngaahi hingoa lahi! Naʻe fuoloa peá u toki fakahū kotoa kinautolu ki loto. Ka naʻá ku fiefia lahi ʻi heʻeku lava ʻo tokoniʻi ia ke ne ako ke fakaʻaongaʻi ʻa e FamilySearch, ʻo hangē pē ko hono tokoniʻi au ʻe heʻeku tangataʻeikí.

Telefoni mo ha fakatātā ʻo e tamasiʻi taʻataʻalo ʻi he screen

Ko e hā ha ngaahi ngāue hisitōlia fakafāmili ʻokú ke fie fakahoko he hoko atú?

ʻOku ou fie faʻu ha ngaahi vitiō maʻa hoku ngaahi kaungāmeʻá mo e fāmilí ke tokoni kiate kinautolu ʻi hono ako e founga fakaʻaongaʻi ʻo e FamilySearch. ʻI heʻeku kamatá, naʻe pau ke u ako ha meʻa lahi. ʻOku ou fie akoʻi e kakai kehé ke nau lava ʻo fai e meʻa tatau.

Talanoa ʻi he PDF

Ngaahi Tā Fakatātā ʻa Laura Zarrin