“Ko e Kulupu Ngāue ki he Lelei Angé,” Ko e Kaumeʻá, Siulai 2023, 20–21.
Ko e Kulupu Ngāue ki he Lelei Angé
Naʻe ʻilo ʻe Siosi ha founga te ne lava ai ʻo muimui ki he sīpinga ʻa Sīsū Kalaisí.
Naʻe hoko ʻa e talanoa ko ʻení ʻi he ʻIunaiteti Siteiti ʻo ʻAmeliká.
Naʻe tangutu ʻa Siosi mo hono kāsini ko ʻEsilini ʻi ha lalo ʻakau ʻi tuʻa ʻi hono falé.
Naʻe talaange ʻe Siosi, “ʻOku ou fakaʻamu naʻe ʻi ai ha meʻa fakafiefia te tau lava ʻo fai ke maʻu ai ha paʻanga.”
Naʻe pehē ange ʻe ʻEsilini, “Mahalo te tau lava ʻo maʻu ha paʻanga ʻi heʻetau fai ha meʻa ki ha kakai.”
“Fēfē kapau te tau faʻu ha kiʻi kalapu?” Naʻe puna fiefia hake ʻa Siosi. “Hangē ko ha kulupu tokangaekina e kulií pe kalapu luelue mo e kulií.”
Naʻe pehē ange ʻe ʻEsilini, “Te tau lava ʻo fai ha ngaahi meʻa kehekehe.” “ʻOku fiemaʻu tokoni maʻu pē ʻa e kakaí. Pea te nau totongiʻi kitautolu.”
Naʻe moʻoni ʻa ʻEsilini. Naʻe mamata ʻa Siosi ʻi he ʻaho kotoa pē ki ha kakai naʻa nau fiemaʻu tokoni.
Fakafokifā pē kuo maʻu ʻe Siosi ha fakakaukau ʻe taha. Naʻá ne ongoʻi loto-māfana. Naʻá ne fakamanatu kiate ia ʻene papitaiso he taʻu kuo ʻosí. Naʻá ne palōmesi ke manatuʻi maʻu pē ʻa Sīsū mo muimui ki Heʻene sīpingá. Naʻá ne ʻilo ha founga ʻe taha te ne lava ai ʻo fai ia.
“Fēfē kapau ʻe ʻi ai haʻatau kiʻi kulupu ʻoku tokoni taʻetotongi ki he kakaí?” Ko e ʻeke ange ia ʻe Siosí. Naʻe fakaʻau ke mālohi ange ʻa e ongoʻi māfaná.
Naʻe fakaʻau foki ke fofonga fiefia lahi ange ʻa ʻEsilini. Naʻá ne pehē ange, “ʻE fakafiefia ia.” “Te tau lava ʻo tokoni ki he kakaí ʻi ʻapiako mo e lotú—meimei ʻi he feituʻu kotoa pē.”
“Te tau lava ʻo ui ia ko e Kulupu Ngāue ki he Lelei Angé!” Ko Siosi ange ia. “Tau kamata ʻapongipongi ʻi he akó.”
ʻI he ʻaho hono hokó ʻi he mālōlō siʻí, naʻe lele ʻa ʻEsilini mo Siosi ki he ngataʻanga ʻo e malaʻe vaʻingá.
“ʻOkú ke sio ki ha taha ʻoku fiemaʻu tokoni?” Naʻe tuʻu ʻete ʻa ʻEsilini ʻo sio fakahangatonu atu ki he meʻa vaʻinga lanu ʻumatá.
“Teʻeki ai.” Naʻe fakasio ʻa Siosi ʻi he tafaʻaki ʻoku fai ai e kaka ʻo tāupé mo e feituʻu ʻoku ʻi ai e heké. Naʻe fakapaheke mo heke ʻa e fānaú. Naʻa nau tā ha ngaahi foʻi pulu mo vaʻinga ʻaki ha ngaahi maea tāfue. Naʻe ʻikai ha taha ia ʻe hangē ʻokú ne fie maʻu tokoní. Naʻe hangē naʻe maʻu pē he tokotaha kotoa hano kaungāmeʻá. Naʻá ne sio atu leva ki ha kiʻi taʻahine ʻokú ne tangutu toko taha pē mo ha maea tāfue.
Naʻe puke ʻe Siosi e nima ʻo ʻEsiliní. “Sio atu ki hē!”
Naʻe maʻu ʻe Siosi mo ʻEsilini ha ngaahi maea tāfue peá na lue atu ki he kiʻi taʻahiné.
“Mālō e Lelei. Ko Siosi au.”
“Pea ko ʻEsilini au. Ko hai ho hingoá?”
Naʻe ʻohovale e kiʻi taʻahiné. “Ko Lesilī au.”
“ʻOkú ke fie vaʻinga mo kimaua?” Naʻe puke hake ʻe Siosi ha maea tāfue.
Naʻe malimali ʻa Lesilī. “ʻIo!”
Naʻe akoʻi ʻe ʻEsilini mo Siosi kia Lesilī ha ngaahi founga foʻou ki he tāfué. ʻI he tā ʻa e fafangú, naʻá na lea fakamāvae. Na‘e ongoʻi fiefia ʻa Siosi. Naʻá ne ʻilo ko e Laumālie Māʻoniʻoní ia.
Hili iá, ko e taimi pē naʻe sio atu ai ʻa Siosi mo ʻEsilini kia Lesilī ʻi he holó, naʻá na fakafeʻiloaki ange ki ai.
Naʻe kumi ʻe Siosi mo ʻEsilini ha kakai tokolahi ange ke tokoniʻi. Taimi ʻe niʻihi naʻá na lea ʻaki ha ngaahi meʻa lelei ki he kakaí mo feinga ke fakafiefiaʻi kinautolu. Taimi ʻe niʻihi naʻá na fakaafeʻi e fānaú ke nau vaʻinga mo kinautolu.
ʻI ha ʻaho ʻe taha, naʻe malimali ʻa Siosi ki ha kiʻi tamasiʻi ʻi tuʻa he ʻapiakó. Naʻá ne pehē ange, “ʻOku ou saiʻia hoʻo falani tainasoá.”
Naʻe malimali ʻa e kiʻi tamasiʻí peá ne sio hifo ki hono falaní. “Mālō.”
ʻI he tangutu hifo ʻa Siosí, naʻá ne fakatokangaʻi naʻe teʻeki ke ne fakakaukau ke fai ia maʻá e kulupú! Naʻá ne fai pē ia ʻiate ia.
Naʻe fakakaukau ʻa Siosi ki he ngaahi kaungāmeʻa kotoa kuó ne maʻu talu mei heʻena kamata mo ʻEsilini ʻena kulupú. Naʻe saiʻia ʻaupito ʻa Siosi ke tokoniʻi e kakaí. Naʻá ne ʻai ia ke ne fie fai ha ngaahi meʻa lelei ange maʻá e niʻihi kehé. Naʻe ngaohi ʻe he Kulupu Ngāue ki he Lelei Angé ke ne lelei ange. Pea naʻe ongo lelei ia.
Tā fakatātā ʻa Tania Rex