“Naʻe Kamata ia ʻi ha Malaʻe Peisipolo,” Ko e Kaumeʻá, Siulai 2023, 32.
Kaumeʻa ki he Kaumeʻa
Naʻe Kamata ia ʻi ha Malaʻe Peisipolo
Mei ha ʻinitaviu mo Lusi Sitīvenisoni ʻIueli.
Ngaahi Tā Fakatātā ʻa Brian Michael Weaver
ʻI hoku taʻu 13, naʻá ku vaʻinga ʻi ha timi peisipolo mo ha ngaahi kaungāmeʻa. Naʻe ʻikai ko ha mēmipa au ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ka naʻe kau ki ai ha toko ua ʻo hoku kaungā vaʻingá. Ko ha ongo māhanga kinaua. Ko hona hingoá ko Lopi mo Lení.
Naʻá na fakaafeʻi au ʻi ha ʻaho ʻe taha ke u haʻu ki he efiafi fakafāmili ʻi ʻapí mo hona fāmilí. Naʻe ʻikai ke u ʻilo pe ko e hā ʻa e efiafi fakafāmili ʻi ʻapi, ko ia ne u fehuʻi fekauʻaki mo ia. Naʻá na talamai te mau ako fekauʻaki mo e ngaahi meʻa ʻa e siasí mo hivaʻi ha ngaahi hiva. Naʻe ʻikai ke u fuʻu loto-vēkeveke ki ai. Ka naʻá na palōmesi mai ʻe ʻi ai e hikinga ua, ko ia ai ne u fakakaukau ke u ʻalu.
Naʻe ō hoku fāmilí ki honau ʻapí ki he efiafi fakafāmilí. Naʻá ku ongoʻi ha meʻa naʻe kehe moʻoni. Naʻe ʻikai te u ʻiloʻi pe ko e hā, ka ne u ongoʻi maheni mo ia. Naʻe ongo lelei ia. Naʻe ongoʻi foki ia ʻe heʻeku fineʻeikí.
Naʻe ʻikai ke u ʻilo he taimi ko iá ko ʻeku faʻeé ko ha mēmipa ʻo e Siasí. Naʻe papitaiso ia ʻi heʻene kei finemuí. Ka naʻe tātātaha ʻene ʻalu ki he lotú.
Hili e pō ko iá, naʻe kamata ke toe ʻalu ʻeku faʻeé ki he lotú. Naʻá ku ʻalu mo ia ke ako lahi ange. Hili ha ngaahi māhina siʻi mei ai, naʻe papitaiso au ʻe he tamai ʻa Lopi mo Lení.
ʻOku ou houngaʻia ʻi he tokanga feʻunga ʻa Lopi mo Leni kiate au ʻo na vahevahe ʻa e ongoongoleleí. ʻOku ou monūʻia he ʻahó ni ke maʻu ha fāmili taʻengata. Pea naʻe kamata kotoa ia ʻi ha malaʻe peisipolo!
Hangē ko Lopi mo Lení, ʻokú ke maʻu ha mālohi lahi ki he niʻihi kehé. Te ke lava ʻo fai ha meʻa makehe ʻi ho fāmilí. Te ke lava ʻo vahevahe ʻa e ongoongoleleí mo ho ngaahi kaungāmeʻá.