“Te Taua n Onimaki,” Te Rao, Turai 2023, 10–11.
Te Taua n Onimaki
E kan kabuburaa ao ni kakorakoraa ana onimaki Dashanel iroun Kristo.
E riki te karaki aei i Jamaica.
Dashanel e buoka mwaanena ae ikawai ni kaotinakoa te kariki ae karaoaki man te nut man te ainumwuum. E rangi ni boi kangkang!
Ngkanne e a ongo te karebwerebwe iaon te mataroa. “Ae a roko mitinare ikai!” e wewete tarina.
E biri Dashanel nakon te mataroa. E tangiria bwa a na roroko mitinare. E namakina te kukurei n taainako ngkana a roko. N tabetai a uoti bwaai n takakaro ibukina ma tarina ao mwaanena bwa a na takakaro iai.
“E a manga karaoa naba te kariki Tyrell ae karaoaki man te nut!” E taku Dashanel. E tangiria mwaanena bwa e na kukana te amwarake ibukiia mitinare.
“I aki kan tataninga bwa N na kataia ni karaoi tabeua,” E taku Unimwaane Colas. Ngaia ma Unimwaane Yusaki a rin ao a tekateka iaon te burooa. Dashanel, mwaanena ao tarina, ao Tinana e tekateka ni kaitaraia n are n iterana.
“Tera ae ti na karaoia ibukin te reirei n te bong aei?” E titiraki Dashanel.
E butii bwariko ni mwangko Unimwaane Yusaki ake a kauataoaki. “Ti nang katea te taua n onimaki. Mwangko aikai n tatabeua a tei ibukin te bwai ae ti kona ni karaoia ni katea ara onimaki iroun Iesu Kristo.”
E moanna ni katokatokai mwangko ni kauataoi Unimwaane Yusaki ni karaoia kanga te taua. E nooria Dashanel bwa iaon mwangko ao iai taeka n aron “tataro,” “kamatebwaian koroboki aika tabu,” ao “taromauri” ae a koreaki iaoia.
“Aikai bwaai ni kabane ake ko tuangiira bwa ti na karaoia n aron te utu,” e taku.
“E eti anne,” e taku Unimwaane Colas. “Ngkana ko karaoi bwaai aikai, ko katea am onimaki iroun Iesu Kristo.”
Dashanel ao tarina ma mwaanena a ikaruoruo ni katei aia taua n taian mwangko ngke a tabe n ongora n te reirei.
Imwiin nakoia mitinare, e iangoia Dashanel bwa tera ae a na anga reirei iaona. E tangiria ni kan kabuburaa ao ni kakorakoraa ana onimaki iroun Kristo, n aron te taua are e kateia.
N namwakaina aika a tibwa nako, e reiakina ae bati riki Dashanel n taekan te euangkerio mairouia mitinare. E moana nanakona n taromauri ma ana utu. E katamneia ana taua n onimaki bwa e rikirake n abwaabwaki ao man abwaabwaki.
Teuana te bong imwiin nakoia mitinare, e taetae Dashanel ma tinana. “I kona ni bwabetitoaki?” e titiraki.
“Ko bon koaua bwa ko a tauraoi?” e titiraki Tinana.
“Eng,” e taku Dashanel. “I kan iriira Iesu,”
“E TAMAROA,” e taku Tinana. “Ngkana ko tangiria, ko kona ni bwabetitoaki.”
Mwaanen Dashanel ma tarina a rineia bwa a na bwabetitoaki naba. E taku tinana bwa e namakinna bwa e tuai moa n tauraoi ni bwabetitoaki.
N te bong are a bwabetitoaki iai, Dashanel ma tarina ao mwaanena a bwainiia n te kunnikai ae mainaina. A tataninga ma te taotaonaki n nano ngke a nang bwabetitoaki.
Ngke e nang roko ana tai Dashanel, e buokia Unimwaane Yusaki nakon te ran. Ngkanne e a karaoa te tataro ni bwabetito ao ni karuoa nako nanon te ran. Ngke e a otirake Dashanel, e aki toki moangarena! E namakina te kukurei ao te itiaki. E bon aki tangiria bwa e na mwaninga taekan te namakin aei.
E teimatoa Dashanel ni karaoi bwaai ni katea ana onimaki iroun Iesu Kristo. E wareware ni koroboki aika tabu ma ana utu. E tataro nakon Tamana are i Karawa. E karaoi bwaai n te nanoanga ibukiia tabeman. Ao e uringnga bwa e kanga aron ana namakin ngke e bwabetitoaki. E tangira Tinana bwa e na karekea te aekaki n namakin naba anne.
“Tinau, bukin tera ngkai ko aki bwabetitoaki?” E titiraki Dashanel te bong teuana.
E aki kakarongoa tinana inanon tabeua te miniti. “Ko a tia ni katea te banna ni katotoo ae tamaroa ibukiu. Ngkai I riai ni katea te banna ni katotoo ibukim,” e taku. “I kan bwabetitoaki naba.”
N te bong are e bwabetitoaki iai Tinau, e rangi ni kukurei Dashanel. Ngke e a otirake Tinau man te ran, a bane ni moangare aomata. Ngkai ana utu Dashanel ae bwanin a kona ni katea aia taua n onimaki ni kabane.
Kamataata n te tamnei iroun Alyssa Tallent