“E Moanaki iaon te Marae ni Beitibooro,” Te Rao, Turai 2023, 32.
Te Rao nakon te Rao
E Moanaki iaon te Marae ni Beitibooro
Man te intawiu ma Lucy Stevenson Ewell.
Kamataata n te tamnei iroun Brian Michael Weaver
Ngke 13 au ririki, I kaaina te tiim n takakaro ae te beitibooro ma tabeman raoraou. Tiaki Ngai kaain Ana Ekaretia Iesu Kristo ibukiia Aika Itiaki ni Boong aika Kaitira, ma uoman kaain au tiim bon kaain te aro. Bon tenaan bwebwee. Araia bon Rob ao Lane.
N te bong teuana n tain te kataneiai a kaoai nakon te bootaki n utu n te tairiki ma aia utu. I aki ataia bwa tera ana tai te utu n te tairiki anne, ngaia are I a titiraki ibukina. A tuangai bwa ti na reiakina taekan bwain te aro ao n anenei kuuna. “I aki rangi ni kukurei n taekan anne. Ma a berita bwa iai te taonanimwi amwarake karewerewe, ngaia are I a baireia bwa N na nako.
Au utu a nako nakon aia auti ibukin te bootaki n utu. Iai te bwai ae I namakinna ae rangi ni kaokoro. I aki ataia bwa tera, ma e taraa n ae iai kinaakina. E tamaroa te namakin. E namakinna naba tinau.
I aki ataia ngkanne ae tinau bon kaain ngkoa te Ekaretia. E a kaman tia ni bwabetitoaki ngke te ataeinnaine ngaia. Ma e kangaanga nanakona n taromauri.
Imwiin te tairiki anne, tinau e a manga moanna n nanako n taromauri. I nanako mangaia ni kan reiakina riki ae bati. Tabeua te namwakaina imwiina, I a bwabetitoaki iroun taman Rob ao Lane.
I rangi ni kakaitau bwa Rob ao Lane a rangi n tabe ma ngai ibukin tibwauaan te euangkerio. N te bong aei I kakabwaiaki n reken au utu ae akea tokina. Ao e moanaki iaon te marae ni beitibooro!
N aron Rob ao Lane, iai am anainano ae moan te korakora iaoia tabeman. Ko kona ni karika te bitaki inanon am utu. Ko kona n tibwaua te euangkerio ma raoraom.