“Karaki ibukin te Bwabetito,” Te Rao, Turai 2023, 30– 31.
Karaki ibukin te Bwabetito
“Te bwaeoniia bon te moan aomata ae iai te bwai ae karaoia,” E taku tinau.
E riki te karaki aei i Amerika.
E minomino Mary ao n tangira ana kunnikai ae mainaina are e taraia n te tirotaam. Bon aekan raoi te kunnikai are e kabongana tinana n ana tai ni bwabetito. Tibutoru-ae Marluce e a manga karaua ni karaoia bwa e aonga n tau iaon Mary. Ngkai e a kona ni kabongana Mary n ana tai ni bwabetito!
“Ko rangi ni botonnaine.” E taua bain Mary tinana ao ni manga kaminoa riki.
E ngarengare Mary. “I kona ni bwainna inanon te bong aei?”
“Ti a kawakinna bwa ko na bwainna ibukin am bwabetito bwa e aonga n taraaraoi ao n itiaki, E TAMAROA?” E taku Tinana.
“E TAMAROA.” E nang bwabetitoaki Mary ngkana e koro waniua ana ririki, ao e a kaman katauraoi teutana te tai ngkai. E nanako ni kaea te Moanrinan, wareware ni koroboki aika tabu, ao n iriira aia bwabetito raoraona. Ma taraan ae raroa n roko ana koronririki!
E a bwabwakoaki Mary iroun tinana iaon te kaintekateka te beera. “Tinau, iraua am ririki ngke ko bwabetitoaki?”
“E a koro 16 au ririki.”
“Auee! Bukin tera ngkai ko rangi ni maan n tataninga?”
E rabwataki Mary ao ni koonaki iroun tinana. “Ibukina bwa I tuai raoi ataa taekan ana Ekaretia Kristo ae kaokaki n te tai anne. Ma I moana nanakou ni kaaei ana waaki ni kakukurei te Ekaretia ma tabeman raoraou. Ao mwaitin te bwai ae I reiakinna, e a kakorakora riki nanou ni kan bwabetitoaki!”
“Bukin tera?” E titiraki Mary.
“Ibukina bwa I tangiria bwa e na reke au utu ae akea tokina.” Te tina aio e kotea tamnein te tembora are e tine ietaia. “I reiakinaki bwa n te bong teuana I kona ni kabaeaki ma au utu n te tembora n akea tokina. Karekean au utu ae akea tokina bon kanoan miiu. Ao te bwabetito bon te moan mwaneka! Ngkai e a korobukin miiu.”
E moangare Mary. “Iai Tamau, Mallory, ao ai Maeva ae uarereke! Ao ngai naba, kai e koaua.”
“Eng, e bon koaua. Ao tibu te unnaine ae Angela.”
“Ko bwabetitoaki ma Tibu te unnaine?”
“E tataninga tabeua te ririki. Ma ngkana ti mwamwananga irarikin te tembora, ti tangiria moa ni kan tei ao n tabe n taratarai.”
E tabe Mary n iangoa Tinana ao Tibuna te unnaine ngke a kaai n taratarai taian tembora. “Ao e kanga aron Tamau? Iraua ana ririki ngke e bwabetitoaki?”
“E a koro 11 ana ririki.”
“Ao e maeka i Brazil n te tai anne?”
“Eti anne,” e taku Tinana. “Iai aomata ni kabuta te aonaaba ae a reiakina taekan Iesu ao te bwabetito. Bon angiina tenaan bwaeoniia.”
“Bwaeoniia?”
“Te bwaeoniia bon te moan aomata ae iai te bwai ae karaoia,” E kabwarabwara tinau.
E tabe Mary n iangoa taekan anne. “N aron ae ngkoe bon te moan aomata man am utu ae ko bwabetitoaki?”
E katoutoua atuuna Tinau ao e moangare.
E aki maan, e a rin inanon te ruu Tamau ao n toka iaon te kaintekateka te beera.
“Tamau, ngkoe te bwaeoniia man am utu”
“Kanga taraana. Imwiin are I tia ni bwabetitoaki, I kunea bwa Tibu te unnaine ae Rosimere e a kaman kaaina ara aro! Ma e a maan n tuai n nanako n taromauri.”
“E koaua? Tera ae riki?”
I a moana nanakou n taromauri. Ngkanne mwaaneu e moana naba nanakona, imwiina Tibu teunnaine ae Rosimere naba. Riki Tibutoru ae Marluce e a kaainna naba!”
Mary e iango ngkana e a nako Tamana n taromauri n tii ngaia, imwiina e a kairiia riki ana utu aika a mwaiti mangaia.
“Auee,” e taku Mary. “I kan ongora ami karaki. A karika riki kukurei ni kan bwabetitoaki.”
“Ko raarabwa ngkai ko titirakiniira titiraki aikai ni kabane, Mary,” e taku tamau. “Ti kona n titirakiniko teuana te titiraki?”
E katoutoua atuuna Mary. Ai bon tera aia titiraki?
“Bukin tera ngkai ko tangiria ni kan bwabetitoaki?”
E iangoa te bwai are e reiakinna Mary man booki aika a tabu ao aron ana namakin n te taromauri. “Ibukina I kan iriira Iesu ao n mena irarikiia au utu n aki toki.”
Tamau ao Tinau a uaia ni moangare, ao Mary e kibariia ana karo ao n rabwatiia. “I aki manga kan tataninga!”
Kamataata n te tamnei iroun Tammie Lyon