“Kanakoraoan Bwaai ibukin te Kirabu,” Te Rao, Turai 2023, 20–21.
Kanakoraoan Bwaai ibukin te Kirabu
Josie e ataa te kawai are e kona iira ana banna ni katooto te Tia Kamaiu.
E riki te karaki aei i Amerika.
E tekateka Josie ma ai tarina ae Ashlyn iaan te aroka itinanikun ana auti.
“I kantaningaia bwa iai te bwai ae kaunga ae ti kona ni karaoia ni karekemwane iai,” e taku Josie.
“Tao ti na kona ni karekemwane man karaoan bwaai ibukiia aomata,” e taku Ashlyn.
“Tera ngkana ti katea ara kirabu?” E kibirake Josie ma te kukurei. “Kanga n aron aia kirabu maan aika a tekateka ke aia kirabu kamea aika nakonako.”
“Ti kona ni karaoi aekakin nako bwaai,” e taku Ashlyn. “Aomata a kainnanoa te ibuobuoki n taainako. Ao a na bon kaboira.”
E eti ae taku Ashlyn. Ni katoa bong e noriia aomata Josie ake a kainnanoa te ibuobuoki.
N te tai ae waekoa ao e a manga reke ana iango riki teuana Josie. E namakina te kukurei inanona. E kauringnga taekan ana bwabetito n te ririki ae nako. E berita bwa e na ururinga Iesu ao n irii ana banna ni katooto. E ataa teuana te kawai ae kona ni karaoa naba anne.
“Tera ngkana e reke ara kirabu are e buokiia aomata n aki kabooaki?” E titiraki Josie. Te namakin n tangira e rikirake ni korakora.
A aure mwaaka matan Ashlyn. E na rangi ni kaunga anne, e taku. Ti kona ni buokiia aomata n te reirei ao te taromauri—n taabo aika a mwaiti.”
“Ti kona n aranna bwa Kanakoraoan Bwaai ibukin te Kirabu!” E taku Josie. “Ti na waakina karaoana ningabong n te reirei.”
Te bong teuana n te tain te motirawa ae uarereke, Ashlyn ma Josie a biri nakon tabon te tabo n takakaro.
“Iai temanna ae ko nooria ae ti kona ni buokia?” E tei Ashlyn iaon tabon waena ao e taraa te tabo ni katikeera ae tabukibuki aona.
“Tuai moa.” Ekakaea te kaibiti ibukiia mwangkii ao aia tabo n tie Josie. A katikeera ao n tietie ataei. A katebetebei taian booro ao n takakaro ma roobu ni kibakiba. Akea temanna ae kanga e kainnanoa buokana. Taraan ae aomata ni kabane a bane n iai raoraoia. Imwiina a noora te ataeinnaine ae tiku n tii ngaia ma te roobu ae te bwai ni kibakiba .
Josie e taua bain Ashlyn. “Taraa ikekei!”
Josie ao Ashly a kunei taian roobu ibukin te kibakiba ao a rianna nakon te ataeinnaine.
“Mauri. Ngai Josie.”
“Ao Ngai Ashlyn. “Antai aram?”
E taraa ni miimi te ataeinnaine. “Ngai Leslie.”
“Ko tangiria ni kan takakaro ma ngaira?” E tabeka ieta te roobu Josie.
E mongare Leslie. “Eng!”
Ashlyn ao Josie a reireina Leslie tabeua kawai aika a boou aron te kibakiba n te roobu. Ngke e tang te beero, a kaboo. E namakina te kukurei inanona Josie. E ataia bwa bon te Tamnei ae Raoiroi.
Imwiin anne, ngkana a kuba n noora Leslie Josie ao Ashlyn, a kamauria.
Josie ao Ashlyn a kakaiia aomata aika a na buokaki. N tabetai a taekin bwaai aika a raraoi nakoia aomata ao ni kataia ni kakukureiia. N taai tabeua a kaoiia ataei bwa a na takakaro mangaiia.
N te bong teuana, e moangare Josie nakon te ataeinimwaane ae mena itinanikun te reirei. “I tangira am kabaraaki ae te dinosaur,” e taku.
E wingare te ataeinimwaane ao e baraaki n taraa ana kabaraaki. “Ko rabwa.”
Ngke e tekateka Josie, e ataia ae bon tuai n iangoia ae e na karaoa anne ibukin te kirabu! E a bon tibwa tia ni karaoia.
E iangoiia raoraona ni kabane Josie ngke a bon tibwa waakina aia kirabu ngaia ma Ashlyn. E tangiria ni kan buobuokiia aomata Josie. E kan karaoi bwaai aika a tamaroa riki ibukiia aomata. Kanakoraoan Bwaai ibukin te Kirabu e bon kanakoraoa arona. Ao anne e nakoraoi namakinana.
Kamataata n te Tamnei iroun Tania Rex