“Kaitiakan te Onaroka,” Te Rao, Turai 2023, 4–5.
Kaitiakan te Onaroka
“Antai ae ti na kaoa bwa e na buokiira?”
E riki te karaki aei i Engiran.
E kana kabanean kanana Jonah ao e moangare. E kaunga riki te amwarake ni katairiki ngkana a roko mitinare.
“Ti kan tibwaua te rongorongo ma ngkoe ibukin te mwakuri n ibuobuoki,” e taku Titita Kearl. “Bukin tera ngkai e kakawaki bwa kona beku ibukiia tabeman?”
“Ibukina bwa e na kukurei iai Iesu!” e taku Eliza, mwaanen Jonah ae uarereke.
“Eti ae ko taku! E karika kukureina ae moan te bati. Ao ngkana ti buokiia tabeman, e karika naba kukureira,” e taku Titita Christensen. “Iai temanna ae ko ataia ae kainnanoa te ibuobuoki?”
E iango Jonah tabeua te miniti. “Akea temanna ae reke n au iango, ma ara onaroka n te reirei e kainnanoa tabeua te ibuobuoki.”
“Te iango ae nakoraoi,” e taku Tinau.
N ana reirei Jonah iai ana onaroka ike a kona ni karaoki iai waaki ni kakukurei itinaniku. Ma bon akea ae e tabeakina te onaroka inanon te tai ae maan. A buakoako taian aroka ake a riki. A rangi ni mwaiti naba taian uteute.
“Ti kukurei ni buoki ngkami n anne!” e taku Titita Kearl. “Antai ae ti ko na ni kaoia bwa e na buokiira ni kaitiaki?”
“Ai tarira!” e taku Jacob, tarin Jonah.
“Ao kaain ara kiraati n te Moanrinan,” e taku Jonah.
N te bong are imwiina, e taetae Tinau ma temanna n tain te reirei ni karekea te kariaia. A rinea te bong are a na kaitiaka iai te onaroka. Ngkanne tinau e a buoka Jonah ao tarina ma mwaanena n tareboniia naan nako ai tariia ma mwaaneia ao kaain te kiraati n te Moanrinan.
Tabeua te wiiki imwiina, Jonah ma ana utu a kaitibo ma mitinare n te reirei. Naan nako ai tariia ma mwaaneia ao raoraoia man te Moanrinan a mena naba ikekei. E a boo tain te mwakuri!
E karin nangoan baina Jonah aika a rabwa aika bwain te onaroka. “Taraia, Tinau. A rangi ni bubura baiu!”
E ngare tinana. “Ko kona ni kabonganai baai akana a bubura akanne ni korei aroka aikai.”
E angan Jonah te bwai ni koro aroka kanga ai bon taraan te tati ae totoakaei. Imwiina e a buokia ni korokorei mwaanga ake a mate.
“E rangi ni kaunga,” e taku Jonah.
Ngke e tabe ni koro aroka Jonah, e ibuobuoki Eliza ni keniken inanon te onaroka. Jacob e buoka Tamana ni katea nnen ara mannikiba ae boou. Ake tabeman a kou uteute ao n rikoi taian kai. A nnei inanon buraetitiki baeki aika a bubura aika a mata buruu mataia. E na angamwi naba tarin Jonah ae uarereke, Ezra, e ibuobuoki naba n rikoi taian atiibu.
N te tai ae aki maan ao e a itiaki te onaroka. E a wareki taian baeki Jonah ake a kanoai ni kaonrakei. “Bon 13 mwaitin te baeki!” e taku. “E mwaiti te maange ae ti kaitiakia.”
E moangare Titita Christensen. “Ngkai ti nang kainnanoia ni kabane naake a bubura aia mwatireti bwa a na buokiira n urakin bwaai aikai nakon te kaa.”
Jonah, Jacob, ao Eliza a rawei taian baeki ao ni uotii. E namakina te kukukurei Jonah ngkai e tabeka are te kabanea nakon te kaa. Buokakiia mitinare e bon rangi ni kaunga. E kan riki naba bwa te mitinare n te bong teuana. Ma n te tai aei, ao a mwaiti aanga ake e kona n ibuobuoki iai. E aki kona n tataninga n iangoa ana mwakuri n ibuobuoki are imwiina!
Kamataata n te tamnei iroun Samara Hardy