“Te Ninikoria mairoun te Tamnei ae Raoiroi,” Te Rao, Turai 2023, 29.
Koreaki Iroum
Te Ninikoria mairoun te Tamnei ae Raoiroi
Kamataata n te tamnei iroun Toby Newsome
Ngke I uarereke, taokita a tuangiia au karo bwa e reke irou te aoraki ae te aki ngongoongo. Anne aki marurungin te iango ni maaku are e a karika kangaangan te taetae nakoia tabeman. I tii kona n taetae nakoia au utu ake I kaan mangaiia.
I namakina te raraoma n taai nako, ai moarara riki ngkana iai ae taetae nakoiu. Iai namakinan te nakoraoi ngkana I tataro n taainako ao n anganai te rau. I kawara naba te kauntira n te reirei ibukin buokau. Ma I namakinna bwa kanga I tuai namakina te marurung raoi. E a kuri ni bwara nanou, ma I teimatoa n au onimaki.
Iaon kawaina n roko au kawanua n ririki. A kaewenakoai au karo bwa N na wareka ana Boki Moomon ao ni buokai ni baireia ngkana N na bwabetitoaki. Ni katoa tairiki I tataro ni bubuti ngkana I riai ni bwabetitoaki. I karekea te kaeka n taainako ae ti te arona—te namakin ae abuee, ae rau inanou. I ataia bwa e tuangai te Tamnei ae Raoiroi bwa te bwabetito bon te rinerine ae eti.
Ngke I anganaki te Tamnei ae Raoiroi imwiin au bwabetito, I ongo te taeka ae kaantaninga, tangira, ao te kaunganano. I ataia bwa e na anganai te raunnano te Tamnei ae Raoiroi ao te ninikoria.
I baireia bwa N na kataia n taetae nakon raoraou ae te kabanea n tamaroa, Charlie. I kataia inanon te wiiki, ma e bon rangi ni kangaanga. Ma n te bong teuana bon tii Ngai ma Charlie inanon ana onaroka te reirei. I tataro n aki karongoa i atuu. Tamara are i Karawa, taiaoka buokai ni kona n taekina teuana naba te taeka.
Imwiina I a kaurea wiiu n taetae ao n taku, “Eei, Charlie!” E bon rangi ni miimi. I rangin ni kukurei!
Imwiin te bong anne, e bon bebete katiaakin riki tabeua kouru. N te tai ae aki maan I a taetae nakoia aomata aika a mwaiti! I kakaitau iroun te Tamnei ae Raoiroi bwa e anganai te ninikoria n taetae nakon Charlie.