“O Le Auala na Ou Papatiso Ai,” Uo, Aokuso 2023, 12–13.

O Le Auala na Ou Papatiso Ai

Talofa! O a’u o Aranoarii. Ou te nofo i Tahiti. Ua 11 o’u tausaga, ma ou te mitamita e ta’u atu o a’u o se tagata O Le Ekalesia a Iesu Keriso o le Au Paia o Aso e Gata Ai.

Na faapefea ona e iloa e uiga i le Ekalesia?

Sa valaaulia e nisi o uo lo’u aiga i se gaoioiga a le Ekalesia. Sa valaaulia foi i matou i le papatisoga o se tamaitiiti. Sa ou fesili i lo’u tina pe mafai ona matou feiloai ma faifeautalai aua sa ou manao moni lava e aoao atili e uiga ia Iesu Keriso.

Na faape’ī le feiloaiga ma faifeautalai?

Sa matuā lelei lava faifeautalai! Sa ou fiafia lava i taimi uma i le faia o lesona faatasi ma i la’ua e uiga ia Iesu Keriso ma Lana talalelei. Sa ou fiafia i tala na la ta’u maia ia te a’u ma taaloga sa matou taaalo ai e fesoasoani ia te a’u e aoao.

Na faapefea mai lou papatisoga?

Sa papatisoina e lo’u tamā ia ma’ua ma lo’u tinā i lo’u aso fanau lona 11. Sa matuai ou fiafia lava! Sa matou valaauliaina le toatele o tagata matou te alolofa i ai. Sa o mai a’u uo ma lo’u faiaoga e lagolago a’u.

Ina ua ou alu a’e mai le vai, sa faatumulia a’u i le olioli. Sa ou ataata tele! Sa ou matuā fiafia lava ua mafai ona ou mulimuli i le faataitaiga a Iesu Keriso.

E faape’i lou alu i le Peraimeri mo le taimi muamua?

I le taimi muamua, sa ou popole lava na toetoe a ou tagi. Ae ina ua ou alu i se gaoioiga a le Peraimeri. Sa ou iloa tagata uma, ma sa ou faia ni uo.

Afai e te fou, o la’u fautuaga o le sau i lau vasega Peraimeri, e tusa lava pe e te fefe i le taimi muamua. Matou te alolofa i tagata fou!

E faapefea ona e mulimuli ia Iesu?

Ou te tatalo ma alu i le lotu i Aso Sa uma. Matou te talanoa ma lo’u aiga e uiga i le talalelei a Iesu Keriso.

Ou te taumafai e vaavaai mo isi o e manaomia le fesoasoani. I le fale, ou te fesoasoani i lo’u tina i feau. Ou te fesoasoani i lo’u tamā i le faia o togalaau, tātāina o fafie, ma le fausiaina o mea. I ni nai masina talu ai, sa i ai se faaaliga taleni a le matou uarota. O a’u o se tagata musika, o lea sa ou taina ai tagipalau i le po atoa!