“E Le Tuua Lava Na o Ia,” Uo, Aokuso 2023, 22–23.
E Le Tuua Lava Na o Ia
Ae faapefea pe afai e toe faamanu’alia Etana ae e leai se tasi na i ai iina e fesoasoani?
O lenei tala sa tupu i le ISA.
Sa faalue e Etana ona vae i luga o le taupega. Sa ia alu maualuga ma maualuga atu. O le matagi na ia lagona ai na pei ua lele!
Ona ta mai lea o le logo. Sa mapuea Etana. Sa le’i saunia o ia mo le uma o le malologa puupuu.
Na laina tamaiti e toe foi i totonu. Sa faalemu e Etana lana taupega. Ona ia laa ese lea mai le suigi e toe foi ai i le vasega.
Ae ina ua tau vae o Etana i le eleele, sa ia lagonaina se tiga matuitui i lona vae. Sa pa’u o ia i luga o le palapala. Sa ia taumafai e tu i luga, ae sa pei e mu lona vae . E matuai tiga lava!
“Fesoasoani mai!” O le ee atu lea a Etana. Na tafe ifo loimata i ona alafau. Sa taufetuli atu tamaiti ma faiaoga e fesoasoani ia te ia.
“O le a le mea ua tupu?” sa fesili atu ai se faiaoga.
“Ua gau lo’u vae!”
E le o le taimi muamua lea na gau ai se ponaivi o Etana. Sa le o le taimi lona lua po o le lona tolu foi! Sa maua Etana i le faama’i o ponaivi vaivai, o se ma’i na faigofie ai ona gaui ona ponaivi. E oo lava i mea laiti, e pei o le laa ese mai le auala po o le fetoai i se tasi, e mafai ona gaui ai ona ponaivi.
“O le a matou valaau i ou matua e ave oe i se fomai,” o le tala lea a le faiaoga. “O le a lelei mea uma.”
Sa fiafia Etana sa i ai tagata iina e fesoasoani ia te ia. O loo tiga pea lona vae, ae sa ia iloa o le a saogalemu o ia.
Na o atu Tinā ma Tamā i le aoga ma ave Etana i se fomai. Sa faasimā lanumoana lona vae ma alu atu i le fale e malolo.
Ona o le gau o lona vae, sa faaalu ai e Etana le tele o le taimi i le moega. Sa tele ni ana tusi e faitauina. O nisi taimi e o mai ai ana uo e taaalo ma ia i taaloga. Ae sa īvā pea o ia.
I se tasi po, na ala a’e ai Etana ma sa le mafai ona toe moe. Sa taumafai o ia e malolo, ae sa popole pea o ia. Ae faapefea pe afai e gau so’u ponaivi ae leai se tasi o i ai, e pei o le leva o le po? Sa mafaufau ai Etana. Sa tatavale lona fatu. Sa lagona lona fefe.
“Tamā!” O le ee atu lea a Etana.
Sa tamoe atu Tamā i le potu o Etana. “O le a le mea ua tupu?”
“Ua ou fefe,” o le tala lea a Etana. “Ae faapefea pe afai e toe gau se isi ponaivi ae leai se tasi o i ai iina e fesoasoani mai ia te a’u?”
Na saofai ane tamā i autafa o Etana i luga o le moega. “O se manatu taufaafefe lena,” o lana tala lea. “E tusa lava pe tatou te taumafai ia faaeteete ma saogalemu, e mafai lava ona tutupu mea leaga. Ae po o le a lava, o loo leoleo mai le Tama Faalelagi ia te oe.”
“O lona uiga la e faatasi mai o Ia ia te a’u i taimi uma?” Sa fai atu ai Etana.
“Sa’o lelei lava.” Sa opo lemu e Tamā ia Etana.
Sa mafaufau Etana i le vave na sau ai Tamā e fesoasoani ia te ia. Sa ia iloa e alofa Tamā ia te ia ma e manao i taimi uma e fesoasoani ia te ia. Atonu na faapena foi le Tama Faalelagi.
O le aso na sosoo ai, na faitau ai e Etana se mau i le mekasini o le Uo . Fai mai, “Ia fiafia, ma aua le fefefe, aua o Aʼu o le Alii ua Ou faatasi ma outou, ma o le a tu i tafatafa o outou.”*
Sa lagona e Etana le toafimalie ma le saogalemu ina ua ia faitauina le mau, e pei lava ona ia lagonaina ina ua ia talanoa ma Tamā. Sa ia iloa o le Agaga Paia lea sa faamafanafanaina o ia. Sa pei o loo ia toe opoina tamā.
Atonu o le a gau nisi o’u ponaivi, na mafaufau ai Etana, ae o le a ou le toe fefe. Sa ia iloa o le a le tuua lava na o ia.
Ata na tusia e Simini Blocker