“O Le Aso Tele A Giorgia,” Uo, Aokuso 2023, 8–9.
O Le Aso Tele A Giorgia
“E le toe umi ae papatisoina au,” o le tala lea a Giorgia. “E pei lava ona sa faia e Iesu.”
O lenei tala sa tupu i Ausetalia.
Sa tamoe atu Giorgia i lona potu faatasi ai ma Matilda na latalata ane i ona tua . O se aso malie lava pe a sau lana uo e la te taaalo.
“E mafai ona ta taaalo ma lau ropati?” O le fesili lea a Matilda.
“Ioe!” Sa fai atu ai Giorgia. O se tasi lea o mea e sili ona ia fiafia e fai.
A’o aumai i fafo e Giorgia le ropati, sa matamata Matilda i ata o loo i luga o le puipui a Giorgia. Sa tusi atu lona lima i le ata i le ogatotonu.
“O le a lena mea?” o lana fesili lea.
“O Iesu Keriso lena ua papatisoina,” o le tala lea a Giorgia. “Ma o le a toe umi foi ae ou papatiso. E pei lava o Ia!”
“Aisea e te papatiso ai?” O le fesili lea a Matilda.
“Ona ou te fia mulimuli ia Iesu,” o le tala lea a Giorgia. “Pe a ou papatiso, o le mea lena o le a ou folafola atu e fai!”
Ona maua lea e Giorgia se manatu. “E te fia sau i lo’u papatisoga?”
“O le a ou fesili i lo’u tinā pe mafai,” o le tala lea a Matilda.
Na latalata mai lava le aso o le papatisoga o Giorgia. Sa ia faitau mai lana tusi o tala mai tusitusiga paia ma alu i le Peraimeri i vaiaso taitasi. A uma ona fai ana tatalo o le a moe, e tilotilo atu o ia i le ata o Iesu. Sa fiafia o ia e vaai faalemafaufau pe faape’i le papatisoga.
O le Aso Sa a o lumanai lona papatisoga, sa faia ai le faatalanoaga o le papatisoga a Giorgia. Sa latou talanoa ma ona matua i le epikopo i lona ofisa. Sa ia fai mai ia te ia ni fesili e fesoasoani ai ia mautinoa ua saunia o ia e papatiso.
“E te talitonu o Iesu Keriso o le Alo o le Atua?” na ia fesili mai ai.
Sa talitonu o ia! “Ioe,” o lana tala lea.
Sa ataata atu le Epikopo ia te ia. “O le papatisoga o se filifiliga taua tele. E te manao e papatiso?”
Sa mafaufau Giorgia i le tele o lona alofa ia Iesu ma sa manao e mulimuli ia te Ia. “Ioe!” o lana tala lea.
Mulimuli ane ua oo i le aso tele a Giorgia. A o laa atu o ia i totonu o le vai, sa ia vaaia ana uo ma lona aiga o matamata mai. Sa i ai foi iina ma Matilda!
Ina ua faia e lona tamā le tatalo o le papatisoga, o upu na lagona ai e Giorgia le toafilemu ma le fiafia i totonu. Ona ia fufui lea ma le faaeteete o ia i lalo o le vai ma toe ave a’e i luga. Ina ua sau o ia i luga, sa ia lagonaina le fiafia ma le mama.
Sa tuu atu e tamā ia te ia se opo lapo’a. Sa faatalitali tinā mo ia i le pito i luga o faasitepu ma se solo ma se ataata.
Sa lagona e Giorgia le mafanafana i lona loto. O se aso faapitoa. Sa filifili o ia e mulimuli ia Iesu. Ma sa ia manao e mulimuli pea ia te Ia i aso uma!
Ata na tusia e Shana Keegan