“Faafitauli i le Paka,” Uo, Aokuso 2023, 46–47.
Faafitauli i le Paka
Sa manava tele i totonu Hunter. “Ou te le tautala i na upu.”
O lenei tala sa tupu i le ISA.
Sa taufetuli atu Hunter ma ana uo i le paka. Sa ataata o ia a o ia lagonaina le agi mai o le savili e pasi atu ma ia. Sa ia lagonaina le saoasaoa ma le māmā!
Sa muamua pa’i Kyle i le pa. “Ua ou mālō!” sa ia ee atu ai.
Sa taunuu Hunter i le pa i se taimi mulimuli ane. “E lē fea! Na e amata muamua.”
“Ioe,” o le tala lea a Miguel. “Ta mili i le laau!”
Sa amata ona toe tamoe Hunter. O le taimi lea, sa muamua pa’i o ia muamua i le laau. Ae sa latalata atu lava Miguel i ona tua.
“Ua ou malo!” Sa fai atu ai Miguel.
“Leai, e malo Hunter,” o le tala lea a Piper.
“Ioe,” o le tala lea a Kyle.
Sa piilima ia Miguel. Ona ia faia lea o se upu leaga.
Sa taliē isi tamaiti. Sa toe fai e Miguel le upu, ma sa atili ai ona latou toe taliē.
Sa lagona e Hunter le faanoanoa i lona loto. Sa ia iloa e le lelei le tautala i lena upu. Ae sa le’i manao e ulagia o ia. Sa le’i faia lava sana tala.
Sa toe fai atu e Piper se isi upu leaga. Ona fai lea e Kyle le isi [upu leaga].
“Ia fai sau upu, Hunter,” o le tala lea a Kyle.
“Ioe, fai loa,” o le tala lea a Miguel. “Fai se upu palauvale fou.”
Sa manava tele i totonu Hunter. “Ou te le tautala i na upu.”
“O le faia o se upu se tasi e te le afaina ai,” o le tala lea a Kyle.
“Ou te le fia faia,” o le tala lea a Hunter.
“E te palaai?” Sa ata Miguel.
Sa lagona le vevela o foliga o Hunter. “O le a ou alu e taalo i se isi mea.”
Sa taliē pea isi tamaiti ma fai upu leaga. Sa manao Hunter e aluese. Ua le lagona se fiafia i le paka i le taimi nei. “Toe feiloai i se isi taimi,” o lana memumemu atu lea.
Sa tuu e Hunter ona lima i ana taga ma savali lemu e pasi atu i isi tamaiti uma. Na te le’i toe lagonaina le saoasaoa po o le māmā. Sa ia lagona le mamafatu.
Sa ia maua atu Tinā ma Tamā o saofafai i luga o se nofoa. Sa tuu i lalo e Tamā lana tusi. “E i ai se mea ua tupu?”
Sa faamimigi tauau o Hunter. “Sa amata ona latou faia ni upu leaga. Ou te le’i manao e fai [ni upu leaga], o lea sa ou aluese ai.”
Na ataata Tinā. “Ese lou toa.”
“Ua ma mitamita lava ia te oe,” o le tala lea a Tamā. “E faigata ona faia ni filifiliga lelei pe a le faia e tagata o siomia i tatou.”
Sa mapuea Hunter. Sa fiafia o ia sa ia faia le filifiliga sa’o, ae sa le’i lelei pea ona lagona.
“Ua e fia alu i le fale?” O le fesili lea a Tinā.
Sa mafaufau i ai Hunter. “E le o le taimi nei,” na ia fai atu ai. Sa ia tilotilo atu i se isi vaega o tamaiti o loo taaalo i laina o le sipi. “O le a ou alu i ole.”
A o savali atu Hunter, sa talotalo atu se tasi o tama ia te ia. “Malo, O a’u o Tavita.”
“O a’u o Hunter. E mafai ona ou puna ma oe?”
“Ioe!”
Sa maua le avanoa o Hunter i le laina o le sipi ma lagonaina le agi mai o le savili. A o latou taaalo ma Tavita ma isi, sa ia toe lagonaina le saoasaoa ma le māmā. Sa ia faia le mea sa’o, e ui lava sa faigata. Sa fiafia o ia ona sa ia faia se filifiliga lelei.
Ata na tusia e Shawna J. C. Tenney