“O Se Meaalofa Faapitoa,” Uo, Aokuso 2023, 18–19.
O Se Meaalofa Faapitoa
“Atonu o le Agaga Paia lea,” na mafaufau ai Merima.
O lenei tala sa tupu i Farani.
“Merima! Fatima! Lea ua iinei faifeautalai,” o le valaau lea a Tina.
Sa tapuni e Merima lana tusi o tala o tusitusiga paia ma tamoe atu i le potu malolo. Sa aoaoina e faifeautalai lo latou aiga e uiga ia Iesu Keriso. Na le o toe umi ae papatiso Merima ma lona aiga. Sa le mafai ona ia faatali!
Sa saofai Merima faatasi ma lona aiga.
“O le asō o le a tatou talanoa ai e uiga i le Agaga Paia,” na saunoa ai Elder Moea’i. “E fesoasoani o Ia ia tatou lagonaina le filemu ma le mafanafana mai le Tama Faalelagi.”
“Na te uunaia foi i tatou e faia mea lelei,” na faaopoopo mai ai Elder Campbell. “Ma e fesoasoani o Ia ia tatou iloa le mea moni. Atonu na e lagonaina muamua le Agaga Paia.”
Sa mafaufau Merima i le taimi na ia aoao ai e uiga i le Tusi a Mamona. Sa ia lagonaina le toafilemu ma le fiafia. O le auala lena na ia iloa ai e moni. Pe o le Agaga Paia ea lena?
“A uma ona e papatiso, o le a tuuina atu ia te oe le meaalofa o le Agaga Paia,” na saunoa ai Elder Moea’i. “O lona uiga e mafai ona faatasi pea o Ia ma oe e fesoasoani ia te oe ma taiala oe.”
“I lenei vaiaso, ia faalogologo lelei i ou mafaufauga ma lagona,” na saunoa ai Elder Campbell. “Vaavaai mo taimi e talanoa atu ai le Agaga Paia ia te oe.”
I lena po i le taimi o le tatalo faaleaiga, sa matauina ai e Merima ona lagona i totonu. Sa ia lagona le toafimalie ma le toafilemu. Sa pei uma lava na loo tuu atu e se isi se opo lapoa ia te ia. Atonu o le Agaga Paia lea, sa ia mafaufau ai.
I le lotu i le Aso Sa, sa faalogologo ai Merima i se pese e uiga ia Iesu Keriso. Sa ia lagona le fiafia. Sa ia manao ai e fesoasoani i isi tagata. Atonu o le Agaga Paia foi lea, sa ia mafaufau ai.
A o le’i moe, sa faitau e Merima lana tusi o tala o tusitusiga paia. O lona uso, o Fatima, na fesili mo lona taimi [e faitau ai]. Sa fai atu Merima e leai.
Sa faitau pea Merima. Ae sa ia lagona le faanoanoa ona o le lē faasoa atu.
“Ou te faamalie atu,” sa ia fai atu ai ia Fatima. “E te manao [ta te] faitau faatasi?”
Sa nofo Fatima i ona tafatafa. Sa la faitau feauauai. Sa lagona e Merima le mafanafana ma le fiafia. Atonu o le Agaga Paia lea, sa ia mafaufau ai.
Mulimuli ane, na oo mai le aso o la latou papatisoga. Sa o atu Merima ma lona aiga i le fale o le Ekalesia ma sui i ofu papae.
Sa papatisoina muamua Merima. Sa malulu le vai, ae sa fiafia o ia e osia se feagaiga ma le Tama Faalelagi. Sa faapulupulu o ia e tinā i se solo. Ona ia vaai atu lea i le papatisoina o lona Tinā, Papa, ma Fatima.
Sa toe sui Merima i ona ofu mago. Ua oo i le taimi e faamauina ai o ia.
Sa tuu e faifeautalai o latou lima i luga o le ulu o Merima. “Matou te faamauina oe o se tagata O Le Ekalesia a Iesu Keriso o le Au Paia o Aso e Gata Ai,” na saunoa ai Elder Campbell, “ma fai atu ia te oe, talia le Agaga Paia.” Sa lagona e Merima le mafanafana a o ia faalogologo i le vaega o totoe o le faamanuiaga.
Ina ua uma ona faamauina Merima, sa fusi o ia e lona Tinā. “O le a sou faalogona?”
“Matua lelei tele,” o le tala lea a Merima. “Ina ua uma ona tuu o latou lima i luga o lo’u ulu, sa ou lagonaina se mea, ma sa pei o le filemu.” Sa ataata o ia. “Sa pei na ta’u mai e se tasi ia te a’u ia ola i se olaga lelei, e fesoasoani i tagata, ma tausi poloaiga.”
“O e iloa le mea sa e lagonaina?” O le fesili lea a Tinā.
“Ioe, ou te iloa,” na fai atu ai Merima, sa susulu ona mata. “O le Agaga Paia lena!”
Ata na tusia e Alyssa Petersen