“O Le Fagu Vai Ta’e,” Uo, Aokuso 2023, itulau–itulau.
O Le Fagu Vai Ta’e
Sa fiainu Kadie. E mafai faapefea ona fesoasoani i ai Sofia?
O lenei tala sa tupu i Sierra Leone.
Sa faalogologo ma le toto’a Sofia a o faamatala atu e lona faiaoga le meaaoga o le matematika i luga o le laupapa.
“O lea la, o le ā le iva faatele i le fa?” na fesili atu ai le faiaoga.
Na sii i luga le lima o Sofia. “Tolu-ono!” o lana tala lea.
Sa ataata lona faiaoga. “E sa’o lelei, Sofia!”
Ina ua uma le vasega, na oo i le taimi e o ai i le fale. Sa savavali faatasi Sofia ma ana uo. Sa latou aumai uma i fafo a latou fagu vai e inu faauma vai na totoe. Sa vevela le asō!
Ae sa vaai Sofia i se mea na ese. Sa le’i inua se vai a lana uo o Kadie. Sa na ona savali filemu o ia.
“Kadie, o fea lau fagu vai?” Sa fesili atu ai Sofia. O taimi uma lava e fia feinu ai tagata uma pe a tuua le aoga.
“Sa ta’e ananafi, ma e le mafai ona ou toe maua se isi [fagu vai] fou,” o le tala lea a Kadie. “O lea la ua le mafai ona ou aumaia se vai i le aoga.”
Sa tilotilo ifo Sofia i lana lava fagu vai. Sa moomoo o ia maimau pe ana mafai ona ia faasoa atu! Ae ua uma lana vai.
I le aso atoa, sa mafaufau Sofia ia Kadie ma lana fagu vai ua ta’e. Sa le’i faigofie ona maua ni vai mama i le mea sa latou nonofo ai. O le toatele o tamaiti sa na o le tasi le faguvai e faaaoga i le tausaga atoa. Sa latou faatumuina mai se koneteina telē o vai mama i le fale. E mafai ona e ma’i mai le inuina o isi vai. Afai e leai se faguvai a Kadie, e le mafai ona ia maua se vai mai le fale e inu ai i le aoga.
O le taeao na sosoo ai, na mafaufau ai Sofia i le auala e mafai ona ia fesoasoani ai ia Kadie. Sa i ai i le aiga o Sofia ni fagu palasitika e tumu i vai. Sa faaopoopo e Sofia se tasi i lana atofaafafa, faatasi ai ma lana fagu uamea. Sa fai si mamafa ai o le ato, ae sa le afaina ia te ia.
Ina ua ia taunuu i le aoga, sa ia mauaina Kadie.
“Kadie, ua maua sau fagu vai fou?” Sa fesili atu ai Sofia.
Sa lulu le ulu o Kadie ma tilotilo i lalo.
“E le afaina,” sa fai atu ai Sofia. “Lea na ou aumaia se faguvai mo oe!”
Sa ia tuuina atu ia Kadie le fagu vai. Sa ataata Kadie.
“Faafetai lava, Sofia!” Sa matuā fusi e Kadie lana uo.
I le taimi o le vasega, sa inu Kadie mai lana fagu vai faatasi ma isi tamaiti. Sa fiafia Sofia e vaai i lana uo e le o toe fia inu.
O aso uma o lena vaiaso, na aumai ai e Sofia se fagu vai faaopoopo mo lana uo. Ona oo lea i se tasi taeao, na sii i luga e le tinā o Sofia lana atofaafafa.
“Mmm,” o le tala lea a Tinā. “E fai si mamafa nai lo le mea e masani ai.” Sa ia tatalaina le atofaafafa ma toso mai i fafo le fagu vai faaopoopo.
“Sa e fuafua e teu le faguvai faaopoopo lea mo le aoga, Sofia?” O le fesili lea a Tinā.
Sa luelue le ulu o Sofia. “Ua ta’e le fagu vai a Kadie, ma e le mafai ona ia maua se isi fagu. O lea sa leai ai sana vai i le aoga.”
“O le a le umi na e avatu ai se vai faaopoopo ia te ia?” Na fesili ai Tinā.
“Na o le vaiaso lava lenei,” o le tala lea a Sofia. “Ou te le’i manao ia Kadie ia fia inu.”
Sa ataata Tinā. “E ese lou agalelei ma lou mafaufau faapena i lau uo. O se mea lena e faia e Iesu. Ou te fiafia e vaai atu ia te oe o e pei o Iesu. Sa ia fusi mai Sofia. “Ma ou te manatu ua ou iloa se isi auala e mafai ona tatou fesoasoani ai.”
Sa tuu atu e Tinā ia Sofia se fagu uamea. “Ave le fagu lenei i lau uo ina ia mafai ai ona ia faaaogaina pea. O le auala lena e te lē tau aveina ai se fagu palasitika i aso uma.
“E mo’i?” Sa fesili atu ai Sofia.
Sa lue atu le ulu o Tinā. “Ioe. Tau lava o le fai i ai e teu faalelei.”
Sa ave e Sofia le fagu vai i le aoga. O le mea muamua sa ia faia o le tuu atu o le fagu ia Kadie.
“Oka,” o le tala lea a Kadie. “Faafetai lava, Sofia!” Sa fusi o ia e Kadie.
Sa lagona e Sofia le mafanafana i totonu. Sa ia iloa sa ia fesoasoani i lana uo, e pei ona faia e Iesu.
Ata na tusia e Melissa Kashiwagi