“O Le Gaoioiga o le Tala o le Aiga,” Uo, Aokuso 2023, 30–31.
O Le Gaoioiga o le Tala o le Aiga
“E mafai ona e faamatala mai ia te a’u se isi tala o le aiga?” Sa fesili atu ai Lorrain.
O lenei tala sa tupu i Vanuatu.
Sa ataata Lorrain a o ia usuina upu mulimuli o le pese. Faatoa uma le taimi o pesepesega i le Peraimeri. Ua oo nei i le taimi e o ai i vasega.
Ae muamua, sa tu i luga Sister Taleo. “Ou te fia faamatala atu ia te outou e uiga i se gaoioiga a le Peraimeri o le a vave ona oo mai,” o lana tala lea. “Matou te mananao ia te outou taitoatasi e aoao e uiga i lou aiga. Fesili i ou matua e uiga i tala o le aiga. Ona oo lea i le gaoioiga, e mafai e outou taitoatasi ona faasoa mai mea sa outou aoaoina.”
Ina ua taunuu Lorrain i le fale mai le lotu, sa fiafia o ia. Sa ia maua se fasipepa lapoa ma ave i le laulau. Sa le mafai ona faatali o ia e aoao e uiga i lona aiga!
Sa tusia e Lorrain se gafa o le aiga i luga o le pepa. Sa fesoasoani Tinā ma Tamā ia te ia e sipela uma igoa. Ona ia faapipii lea o ata o tagata o lona aiga i luga o le pepa lautele o i ai se sāvali.
“O le igoa o le tina o lou tinamatua o Lorrain foi,” o le tala lea a Tinā. “Sa ma faaigoaina oe ia te ia.”
“Oka,” o le tala lea a Lorrain.
“O Tinamatua Lorrain sa o se tagata agaalofa tele.” Sa ataata Tinā. “Ina ua uma fafie a isi tagata o le latou nuu mo a latou afi, sa faasoa atu Tinamatua Lorrain ia i latou.”
O le aoao e uiga i lona aiga sa o se mea fiafia! “E mafai ona e faamatala mai ia te a’u se isi tala o le aiga?” Sa fesili atu ai Lorrain.
“E mafai ona faamatala atu e Tamā ia te oe e uiga i le taimi muamua na alu ai o ia i le malumalu,” o le tala lea a Tinā. “Sa na o le ono ona tausaga. Sa latou malaga umi ai ma ona mātua i le malumalu i Niu Sila.”
Sa fiafia Lorrain e faalogologo e uiga i le malumalu. “Faamatala mai ia te a’u le tala, Tamā!” o lana tala lea.
“Muamua sa matou o i se vaalele i Niu Sila. Ona matou tietie lea i se pasi. Sa o se malaga umi.” Sa faaali atu e Tamā ia Lorrain se ata o le malumalu. “Na i’u lava ina matou o ma o’u matua i totonu. Na faamauina i matou o se aiga. O lona uiga e mafai ona matou faatasi e faavavau!”
O lena mea na lagona ai e Lorrain le mafanafana i totonu. Sa fiafia o ia sa mafai ona ia faalogo i tala e uiga i lona aiga.
Na i’u lava ina oo mai le taeao o le gaoioiga a le Peraimeri. Sa fesoasoani Lorrain ia Tinā ma Sister Taleo e saunia mea uma i le falelotu.
Ona latou faalogoina lea o ni tala fiafia. O le a fausia se malumalu i lo latou motu!
Sa matuai fiafia lava Lorrain. A oo i le taimi ua lava lona matua e alu ai i totonu o le malumalu, o le a lē tau malaga mamao o ia!
I lena po, sa i ai uma uo a Lorrain i le gaoioiga a le Peraimeri. Sa auauai tamaiti e faasoa mai mea na latou aoaoina e uiga i lo latou aiga. Ina ua oo i le taimi o Lorrain, sa ia uuina i luga lana pepa lautele o i ai se savali o le gafa o lona aiga.
“Sa ou matuai fiafia lava e aoao e uiga i lo’u aiga,” o lana tala lea. “Sa ou aoaoina ua faaigoa a’u i le igoa o le tinā o lo’u tinamatua. Sa ou aoao foi e uiga i le taimi muamua na o ai lo’u aiga i le malumalu. E mafai ona fesoasoani le malumalu i o tatou aiga ia faatasia e faavavau. Sa toe foi mai le lagona mafanafana. “Ua ou fiafia lava o le a i ai se tatou malumalu iinei i Vanuatu.”
Sa nofo i lalo Lorrain ma se ataata lapoa i ona foliga. Sa faafetai o ia ona sa mafai ona ia tuputupu a’e atili e pei o Iesu. Ma sa faafetai o ia mo le malumalu! Ua le mafai ona ia faatali e alu i ai i totonu i se aso.
Ata na tusia e Emily Davis