“O Le Asoa Fe’ilafi,” Uo, Aokuso 2023, 42–43.
O Le Asoa Fe’ilafi
Sa na o le manao lava o Karolaina e taofi teisi le asoa.
O lenei tala sa tupu i Atenitina.
Sa musamusa atu Karolaina i le isi itu o le fanua. Sa i fafo lana uo o Isapela.
Sa talotalo mai Isapela. “Sau ta taaalo!”
Sa kolosi e Karolaina le fanua agai i le fale o Isapela.
Sa tago Isapela i totonu o lana taga. “Ou te fia faaali atu ia te oe se mea,” o lana tala lea. Ona ia aumaia lea i fafo se asoa aupito sili ona manaia ua vaai i ai Karolaina! O maataua laiti sa ese le iila ma le susulu.
“O le asoa a lo’u mama,” o le tala lea a Isapela. “Sa ia fai mai e mafai ona ou taalo ai nei. Vaai i ai i le la.”
Sa uu e Isapela le asoa i luga i le malamalama. E faitau selau nuanua na atagia mai i maataua. Sa ese le manaia!
“Ia ta ive’a loa!” Sa fai atu ai Isapela.
“Ua lelei,” o le tala lea a Karolaina. “E mafai ona ou fesoasoani e teu malu le asoa.”
“Faafetai lava!” Sa tuu atu e Isapela le asoa ia Karolaina, ma sa tuu e Karolaina i lana taga.
Sa le’i umi ae o’o i le taimi e alu ai Karolaina i le fale. Ina ua faatofa atu o ia, sa le’i fesili mai Isapela e uiga i le asoa. Atonu ua galo ia te ia. Ma sa le’i faamanatu atu e Karolaina ia te ia.
Sa le lelei le lagona e Karolaina i le aveina o le asoa i le fale. Ae sa manao o ia e taofi faaumiumi teisi atu. Sa le ano o ia i le lagona le lelei ma tuu le asoa i lalo o lona aluga.
O le aso na sosoo ai o le Aso Toonai. Sa fai e Karolaina ana feau ma alu i fafo e taalo. Sa galo lava ia te ia le asoa.
“Karolaina!” Sa valaau atu ai Papa. “E mafai ona e sau iinei?”
Sa tamoe atu Karolaina i totonu. “Ia?”
Sa uu e Papa le asoa i lona lima. “Na maua e mama le mea lenei i lalo o lou aluga. O ai e onaina?
“O Isapela.” Sa maligi loimata a Karolaina. “Sa ou teu maluina i la’u taga a o ma taaalo ananafi. Ae na ou filifili e aumai i le fale.”
Sa nonofo i lalo Mama ma Karolaina i le nofoa. “Faafetai mo le ta’uina mai o le mea moni. O le a sou manatu i le mea e tatau ona e faia i le taimi nei?
Sa filemu Karolaina. Sa mafaufau o ia ia Iesu. O le a manao o Ia ia faamaoni o ia ma toe faafoi le asoa.
“E tatau ona ou toe faafoi atu ia Isapela ma ou faamalie i ai,” o le tala lea a Karolaina. O le taimi lava na ia fai atu ai, sa aluese loa le lagona leaga. Sa ia lagona le mafanafana i totonu.
Sa alu Karolaina i le fale o Isapela.
“Malo,” sa fai atu ai Karolaina. Sa ia tuu atu le asoa ia Isapela. “Ou te faamalie atu ona sa ou taofia le mea lenei. E mafai ona e faamagalo mai a’u?”
“Ioe,” o le tala lea a Isapela. “Faafetai mo le toe faafoiina mai.” Ona ia ataata lea. “E te manao ta te toe taaalo ive’a?”
“Ioe! Faitau muamua oe—o le a ou lafi!”
I lena po, sa faia ai e Karolaina se tatalo. “Le Tama Faalelagi Pele e, faamolemole faamagalo mai a’u mo le taofiaina o le asoa. Ma faafetai mo le fesoasoani mai ia te a’u e faasa’o.
Sa toe lagona e Karolaina le lagona mafanafana. Sa fiafia o ia ua mafai ona ia faia le mea e finagalo Iesu na te faia.
O ata na saunia e Sue Teodoro