“Pag-ugmad og Pagtahod,” Higala, Septiyembre 2023, 4–5.
Pag-ugmad og Pagtahod
“Ayaw pagsulti niana, palihog,” miingon si Noah.
Kini nga istorya nahitabo sa Australia.
Si Noah mitabang sa iyang igsoong babaye nga si Claire sa pagsab-ay sa humukon nga habol sa ibabaw sa mga lingkoranan.
“Ibutang ba nato kini dinhi?” nangutana siya. Giisa niya ang asul nga habol nga adunay litrato sa balyena niini.
“Oo! Ug magamit nato kini isip pultahan.” Mitudlo si Claire ngadto sa usa ka bahin sa kota.
“Oras na nga moadto sa eskwelahan!” Mitawag si Mama.
Si Noah mitan-aw sa iyang igsoong babaye. “Tingali mahuman nato ang atong kota human sa eskwela?”
“Ug hangyoon nato si Mama ug Papa kon makadula ba kita sa sulod niini,” miingon si Claire.
Mipahiyom si Noah ug mitando. Nalipay siya nga makahimo siya og mga kota ug makadula kauban sa iyang magulang nga igsoong babaye!
Nianang adlawa sa reses, si Noah nakigdula sa iyang mga higala sila si Ty ug Mark.
“Maglukso-lukso kita gamit ang usa ka tiil,” miingon si Ty.
“OK,” miingon si Noah. “Tan-awon nato kinsa ang labing dugay mahuman sa paglukso!”
Ang mga batang lalaki nagsugod sa paglukso. Si Noah mikatawa sa dihang siya nadasmag ngadto ni Mark.
Sa maong higayon, si Claire miagi kauban sa pipila ka batang babaye sa iyang klase.
“Hi,” miingon si Claire, nagwarawara.
“Hala. Mga batang babaye nagpaingon dinhi! Dili kita gusto nga makigdula kanila,” miingon si Ty. Dayon siya mihingalan ni Claire ug sa iyang mga higala sa ngil-ad nga mga ngalan.
Si Noah wala makagusto sa unsay iyang gibati tungod sa mga pulong. Dili maayo nga mohingalan sa mga tawo og ngil-ad nga mga ngalan.
Gitan-aw niya si Claire ug ang iyang mga higala nga mibaliwala ni Ty ug milakaw pahilayo.
Si Noah naghunahuna nga siya kinahanglang manalipod ni Claire, bisan og si Claire wala magkinahanglan nga iyang panalipdan. Siya iyang igsoon nga babaye, ug siya nagmahal kaniya.
Miginhawa og lawom si Noah. “Hoy, ayaw pagsulti niana, palihog,” giingnan niya si Ty. “Dili siya ganahan kon mosulti ka niana. Ug ako usab.”
“OK. Way problema,” miingon si Ty nga mikibo.
Nanghupaw si Noah. Mas naarang-arang na ang iyang gibati karon.
Nianang gabhiona, si Noah ug si Claire nagdula diha sa ilang kota kauban si Mama ug si Papa.
“Kumusta ang eskwela karon?” Nangutana si Papa samtang siya mibutang og kard sa tinumpi.
“Karong adlawa atol sa reses, si Ty mihingalan ni Claire og ngil-ad nga ngalan,” miingon si Noah. Gisultihan nako siya nga mohunong.”
Si Claire mitan-aw gikan sa iyang mga kard. Gihimo nimo?” siya nangutana.
Mitando si Noah. “Oo. Nasayod ko nga ang unsay iyang gisulti dili maayo o dili tinuod.”
Si Mama, Papa, ug si Claire mipahiyom.
“Salamat,” miingon si Claire.
“Nalipay ko nga nagpakita ka og pagtahod sa imong igsoong babaye,” miingon si Mama.
“Oo, maisogon kaayo kadto,” miingon si Papa. “Importante nga magpakita og pagtahod sa usag usa. Bisan kon kita kinahanglan nga manalipod sa atong mga higala.”
Mibalos og pahiyom si Noah. Nindot ang iyang gibati nga nasayod nga nahimo niya ang matarong nga butang.
Mga paghulagway pinaagi ni Violet Lemay