“Usa ka Wala Damha nga Solusyon,” Higala, Septiyembre 2023, 40–41.
Usa ka Wala Damha nga Solusyon
Ang ideya ba kaha ni Papa mahimo?
Kini nga istorya nahitabo sa USA.
Ang kampana mibagting sa dihang si Mr. Nickels misulat sa sinemana nga homework sa math diha sa pisara. Dihay daghan kaayo nga mga problema nga sulbaronon! Dugay gyod kini mahuman.
“Isumiter ang inyong homework sa Biyernes,” miingon si Mr. Nickels. “Walay mga pasumangil.”
Ang tanan nagbagulbol. Gisulod ni Derek ang iyang math nga libro sa iyang puno na nga backpack.
Ang bag-ong eskwelahan ni Derek lahi kaayo gikan sa iyang karaan nga eskwelahan. Karon nga siya anaa na sa ikaunom nga grado, mieskwela siya sa usa ka eskwelahan nga mas dako, ug adunay daghang estudyante. Ang mga klase mas lisod, ug siya usab adunay daghang homework.
Apan unsay labing nakapabalaka ni Derek sa tanan mao ang ubang mga bata. Pipila kanila ingon og maldito kaayo! Dili siya gusto nga adunay bisan kinsa nga masuko kaniya.
Gisagbay ni Derek ang iyang backpack sa iyang abaga ug naglakaw sa hawanan. Ang mga bata anaa bisan asa. Iyang giduko ang iyang mga mata ug naningkamot nga makalikay sa uban aron dili makabangga ni bisan kinsa. Usahay ingon og ang pagtan-aw sa uban makapasuko nila.
“Kumusta ang eskwela karon?” Nangutana si Papa nianang gabhiona. “Mas maayo ba?”
“Dili kaayo,” miingon si Derek.
Gibutang ni Papa ang iyang libro. “Kahibalo ka sa imong gisulti nako nga usahay nabalaka ka nga adunay masuko nimo sa eskwelahan nga walay rason?”
Mitando si Derek samtang siya nagtan-aw sa iyang homework.
“Nan, ako adunay ideya,” miingon si Papa. “Sulayi ang pagpahiyom kanila.”
Unsa? Dili kadto mao ang gipaabot ni Derek. “Ambot lang,” miingon siya. “Mura man nag lain kaayo.”
“Walay lain kaayo mahitungod sa pagpahiyom,” miingon si Mama.
Mitando si Papa. “Walay mawala kon sulayan. Ipataas ang imong ulo ug sulayi ang pagpahiyom ni bisan kinsa nga imong makita. Lisod kaayo nga masuko sa pahiyom.”
Si Derek naghunahuna sa ideya ni Papa. Nag-ampo siya mahitungod niini sa wala pa matulog, ug siya mibati og kalinaw. OK. Sulayan niya.
Pagkasunod buntag, si Derek nanaog sa bus. Ang pundok sa mga bata misuot agi sa atubangan nga mga pultahan sa eskwelahan. Si Derek naglakaw paingon sa sulod nga nagduko, sama sa naandan.
Apan si Derek nahinumdom sa ideya ni Papa. Pahiyom lang, siya naghunahuna.
Miginhawa og lawom, mihangad si Derek. Ang usa ka mas magulang nga batang lalaki nagpaingon kaniya. Siya mas labaw og usa ka ang-ang ni Derek. Tingali duha. Nagsul-ob siya og sports jersey ug naglakaw nga tag-as ug paspas nga mga lakang.
Si Derek hapit molingiw. Mao gyod kini ang matang sa bata nga sa iyang hunahuna motukmod niya nga walay pasidaan. Apan siya misaad nga mosulay.
Mao nga mipahiyom siya.
Ang nawong sa laing bata medyo mihayag. Human siya nakalabay, si Derek mihunong sa paglakaw sa makadiyot. Wala na siya batia og kakulba karon!
Si Derek mipahiyom sa mas daghang tawo sa iyang pagpaingon sa klase. Hapit silang tanan mibalos og pahiyom! Sakto si Papa. Walay usa nga masuko sa usa ka pahiyom.
Samtang misulod siya sa klase, si Derek naghunahuna nga ang junior high school dili diay makahahadlok. Adunay daghan pa gihapon ang angay kat-onan, ug aduna gihapon siyay pipila ka kabalaka. Apan ang pagpahiyom nakatabang. Tingali ang iyang pahiyom makatabang og usa ka tawo nga mobati usab og mas maayo.
Mga paghulagway pinaagi ni Daniel Duncan