Pagkugi sa Pagtabang

Ni Kynzley ug Jayme A., mga edad 11 ug 9, Arizona, USA

Kumusta! Kami si Kynzley ug Jayme. Naghimo mi og proyekto sa pagserbisyo aron sa pagtabang og pamilya sa among ward. Nagbuhi mi og usa ka nating karnero ug usa ka baboy ug dayon gibaligya kini sa tabo sa among lugar.

Ang amigo sa among papa nagkasakit og maayo. Miadto siya sa doktor makadaghan. Ang ilang pamilya wala makasimba sa dugay na nga panahon. Gimingaw mi sa among mga higala sa Primary. Gusto kaming motabang!

Nakahukom mi nga ihatag sa pamilya ang kwarta nga among nakuha sa dihang gibaligya namo ang among mga hayop didto sa tabo sa lugar. Ang kwarta makatabang nila pagbayad sa medikal nga mga bayranan.

Nagtrabaho mi sulod sa siyam ka bulan sa among proyekto. Nag-ampo ug nagpuasa mi nga makakuha mi og maayong mga hayop nga buhion. Samtang gibuhi namo ang among nating karnero ug baboy, migahin mi og daghang oras sa pagplano alang sa tabo sa lugar. Naghimo og mga shirt, nagparada, nangayo og mga donasyon, ug mitabang sa pag-organisar sa pamaligya.

Sa adlaw sa tabo, ang among mga hayop himsog ug kusgan. Maayo kaayo ang among nahimo sa pagpakita niini sa pasundayag sa mga binuhi. Nalipay mi nga makahatag mi sa kwarta nga among kinitaan ngadto sa pamilya. Gitapos namo ang among proyekto uban sa pagpuasa alang kanila.

Ang pagpaningkamot niini nga proyekto nakatabang namo nga mas mahiduol ngadto sa Langitnong Amahan. Nakat-on mi nga mas mosalig Kaniya. Gihimo namo ang tanan ug mitugot Kaniya sa pagtabang namo samtang naminaw mi sa Espiritu Santo. Naglisod mi sa dihang ang among mga hayop dili mohimo sa unsay among gusto. Apan nahinumdom mi ngano nga kami nagbuhi kanila. Gipaningkamotan namo pag-ayo nga makakita og daghang kwarta kutob sa mahimo. Misalig mi sa Ginoo ug naningkamot pag-ayo.

Nasayod mi nga ang Langitnong Amahan naghunahuna natong tanan ug gusto nga motabang kanato. Nalipay mi nga kami makatabang usab sa uban!