“Ang Sayop nga Pagkahimo sa Cake,” Higala, Septiyembre 2023, 10–11.
Ang Sayop nga Pagkahimo sa Cake
Gusto ni Shiloh nga nindot kaayong tan-awon ang iyang cake.
Kini nga istorya nahitabo sa Scotland.
Nahuman ni Shiloh ang pagkolor sa iyang gidrowing ug gibutang ang iyang krayola sa iyang lingkoranan. “Human na gyod!”
“Unsa na?” nangutana ang iyang higalang si Lacey.
“Ang cake nga akong gihimo alang sa kontes sa eskwelahan.” Giisa pataas ni Shiloh ang litrato aron makita ni Lacey.
“Nindot kaayo nang tan-awon!” Miingon si Lacey.
“Salamat!” Mipahiyom si Shiloh. Monindot na gyod kaayo ang iyang cake. Giplano na niyang daan kining tanan. Ang cake dunay upat ka patong. Ang duha ka patong asul, ug ang duha pula—sama sa mga kolor sa bandila sa United Kingdom. Butangan niya og puti nga icing ang tunga sa matag patong. Sa kataposan, ibutang niya sa ibabaw ang labing maayong homemade nga cookies sa ibabaw! Sigurado siya nga siya ang ma-first.
“Unsay imong lutoon sa oven [bake]?” Nangutana si Shiloh.
“Di pa ko sigurado,” miingon si Lacey. “Tingali cake usab.”
“Mahinamon kong makakita unsay imong buhaton,” miingon si Shiloh.
Sa dihang nauli siya, andam na si Shiloh nga magsugod og pagluto [bake]. Gibutang niya ang drowing nga cake sa counter aron iya kining matan-aw samtang nagtrabaho siya.
Mainampingon nga gisukod ni Shiloh ang tanan nga sagol. Iya kining gisagol ug gibubo ang batter ngadto sa hulmahan sa cake. Dayon gibutang niya ang hulmahan sa cake ngadto sa oven aron lutoon ang unang patong sa cake.
Dihang nahuman na ang timer, gikuha ni Shiloh ang cake gikan sa oven. Gisulayan niya sa pagkuha ang cake gikan sa hulmahan. Apan dihang iya kining gibali, ang katunga sa cake ningpilit sa ilawom!
“Hala!” Misinggit si Shiloh. Gipakita niya kang Mama ang nabungkag nga cake. “Naguba ang akong cake!”
Gipikpik ni Mama ang buko-buko ni Shiloh. “OK ra na. Ayohon ra nato na.”
Gitabangan ni Mama si Shiloh sa pagkuha sa nahibilin nga cake. Mainampingon nilang gitakdo ang nabungkag nga mga piraso.
“Tan-awa,” miingon si Mama. “Dili gani ka makabantay nga nabungkag kini.”
Maarang-arang na ang gibati ni Shiloh. Makapadayon gihapon siya sa paghimo sa uban pang cake aron nindot kaayo kining tan-awon. Gisugdan niya sa paghimo ang sunod nga patong. Niining higayona, gipabugnaw una ni Shiloh ang cake sa wala pa kini kuhaa gikan sa hulmahan. Wala kini mabungkag!
Dihang nahuman ang tanang patong sa cake, gihapnig kini ni Shiloh. Gibutangan niya og icing ang tunga-tunga sa matag patong. Dayon mainampingon niyang gibutangan og pipila ka homemade nga cookies ang ibabaw sa cake. Human na!
Apan nimug-ot si Shiloh. Ang cake dili parehas tan-awon sama sa iyang gi-drowing. Ang icing nag-anam katangtang, ang patong nahiwi, ug ang tibuok nga cake nagtakilid sa pikas nga bahin. Nagkamuritsing! Nagsugod sa paghilak si Shiloh.
“Unsay problema?” Nangutana si Mama.
“Gusto kong nindot kaayong tan-awon ang cake! Karon dili na maayo ang tanan!” Gipahiran ni Shiloh ang luha sa iyang nawong.
Gigakos ni Mama si Shiloh. “Sa akong tan-aw ang imong cake matahom tan-awon. Ug sigurado ko nga mas lami pa kini!”
Milingo-lingo si Shiloh. “Ilabay na lang ni nako. Morag ma-iwit na ko ani!”
“Makatabang kaha kon mag-ampo ko?” Nangutana si Mama.
Miyango si Shiloh.
“Minahal nga Langitnong Amahan,” miingon si Mama, “nagpasalamat kaayo ko kang Shiloh ug sa tanan nga iyang paningkamot sa paghimo niini nga cake. Palihog tabangi siyang mobati nga malipayon sa unsay iyang nahimo. Sa ngalan ni Jesukristo, amen.”
Mibati og dugang nga kakalma si Shiloh. Gitan-aw niya og balik ang iyang cake. Tingali dili kini parehas nga tan-awon sa iyang drowing, apan Ok gihapon kining tan-awon. Ug nalingaw siya sa paghimo niini.
Sa pagkasunod adlaw sa eskwelahan, gilibot og tan-aw ni Shiloh ang ubang mga dessert nga gihimo sa mga bata. Wala na siya maghunahuna nga makadawat og premyo. Ang uban nga cake labihan ka nindot nga tan-awon.
Apan dihang gipahibalo ang mga mananaog, nakuha ni Shiloh ang ikaduhang dapit! Ug si Lacey ang nakakuha sa unang dapit!
Si Lacey midagan ngadto kang Shiloh ug migakos kaniya. “Nakadaog tang duha!”
Mipahiyom si Shiloh. Bisan og dili siya ang midaog, nalipay siya nga nagpadayon siya og paningkamot.
Mga paghulagway pinaagi ni Maryssa Dennis